بسم الله الرحمن الرحيم
الانسان بتمر عليه لحظات يجلس مع نفسه فيها .. وأنا جالس مع السيدة نفسي جلست أتذكر
الحارة وأيام الحارة الله على ديك الأيام كنت واد فرعوني صراحة ربنا وكانت نفسي
على طرف " خُشمي " وعشاني زعول وعصبي من يومي كان يطلقون عليه بالحارة
لقب " شِمباشي " نظراً لهيبتي
ولأني تعودت إني آخد حقي بنفسي من أي إنسان يتعرض لي بشئ مو طيب وكبرت الحاجة دي
معايا ليومك دا ..
وأنا أتذكر ديك الأيام تذكرت إني كنت أجلس على سيارة جارنا مكاوي وتعرفوا " المكاكوة "
ناس حارين وآني حاجة تزعلهم ..
جارنا المكاوي دا عندهـ ولد أصغر مني بأربع سنوات تقريباً كان كل ماشافني على سيارة
أبوهـ يروح يعلمه ..
ومرة وأنا جالس عالسيارة الولد راح لأبوه وقاله .. شوية جاء الأب ومسكني من يدي
وقالي اصحى تجلس عالسيارة وأعطاني مع مسكة اليد " قلم " من اللي يحبه قلبكم ..
ياجماعة يد المكاوي كأنها مطرقة .. جلست ألف لف بالحارة من غير شعور ..
لدرجة إني جلست شهر أحس الكف على خدي " المصون " ...
ومن حرارة الكف دا قلت والله ما أسيبها لك يا .............................. << النقاط دي سبه
ومن يومها بحاول أدور ولد جارنا عشان أضربه لأني حلفت إني ما أسيبها له وبكل مرة ألاقيه يا إما
مع أمه أو أبوه إلى أن نقلوا من حارتنا .....
وتمر السنون تلو السنون ... ويريد الله إننا نتقابل بجامعة أم القرى بمكة " كنت يوميها أنا بالسنة التالتة ليه "
وهو ولد أول ترم .......
وكان وقتها حايس بالجدول لأن ياجماعة الخير جامعة أم القرى دي بتنزل للواحد أحيانا عدد ( صفر ))
وحدات عشان تتشحطط شهر على بال ماتضيف الساعات عموما أول ماشافني كأنه إنسان فاقد له واحد
عزيز عليه له 100 سنة وجلس يقول أهلا أهلا وكنت أقوله بعقلي " هلا هلا جيت وربي جابك "
جلس يقولي انت في أي قسم قلت له هندسة كهربائية قبل ما أحول لهندسة كيميائية قال حتى
أنا هندسة كهربائية وجلس يسألني ويطلب " النصح " وعند مين يدرس المواد أنا لقيتها فرصة
عشان " آآآآآآآآآآآآآآآآخد بتـــــــاري "
قلت له شوف ياسيدي ....
مادة الرياضيات 101 ... دي خدها عند الدكتور عيسى حمدان دكتور طيب وينجح ...
ومادة الكيمياء .... عند الدكتور عثمان مرزوق دكتور مايصحح الأوراق ويعطيك امتياز حتى لوماحضرت
ومادة الإحصاء عند دكتور توفيق المقرن دكتور مايحضر ولامهتم وينجح بالهبل ....
أخينا في الله راح لمسجل الشعب وطلب الدكاترة المذكورين أعلاهـ .. وقاله مسجل الشعب يابويه
مافيه دكاترة عندنا بالاسم هذا ...
راح رجع لي الولد وقالي مسجل الشعب يقول مافيه دكاترة بالاسم هذا ....
قلت له : تعرف الأيام دي تسجيل جداول أحسن شئ روح لعميد الشؤون الأكاديمية عشان
يساعدك .
راح المجني عليه للعميد وكنت أسمعه عند مدير مكتب العميد بيقول له دكتور
أبغى أسجل الرياضيات عند فلان وفلان وفلان من الأسماء الذي ذكرتهم له
راح العميد قاله ياواد انت تستهبل والا مجنون والا ايش حكايتك !!!!!!؟؟؟؟
قال له والله يادكتور ما أستهبل ........ قاله انت أحد قالك ان فيه دكاترة بالاسم دا
هنا ..
قاله المجني عليه : ايوه ولد جارنا ويدرس هنا بالجامعة قالي الأسماء هدي
وإن فيه دكاترة بالاسم هذا هنا .......
قاله ياولدي انت جايب لي " أسماء لاعبي الاتحاد والنصري القدامى " تلاقي العالم
دي بالسجن ياولدي وجاي تقولي دكاترة روح ياولدي الله يصلحك ......
ولاتخلي الرجال تضحك عليك
شوووووووووية أنا " فحطت " وحطيت رجووووووووووووولي حسيت بالنصر
العظيم لأني قدرت آخد حقي اللي ماقدرت آخده وأنا صغير
وهذي نهاية اللعب مع الكبار
وإلى اللقاء