يا سعود يا مشكاي ويـن التدابيـر
لا تشتكي جور السنيـن وشطفهـا
جور السنين يحل ويمر ويصيـر
راجع زمانك وأكثر الناس شفهـا
الناس لاحقها من الوقـت تأثيـر
وتصبر على باس السنين وصلفها
تميل ميلات المقادير وتغير
وإن وصفت بتعذب اللي وصفهـا
فإحرص على قرب الرجال المناعير
اللـي دروب المرجلـه تحترفهـا
تلقى بخوتهم معـزه وتقديـر
ومجالسٍ ما دنّسـت مـن عرفهـا
تاقف معك لو همّك اكبر من النير
وبعزمها حتى الصعاب تعسفهـا
ولا قدر الله ثم رمتـك المقاديـر
الرجل منهـم وقفتـه لا وقفهـا
تسوى لها فزعة صفوف وطوابيـر
ما هوب لا شاف الصمايل حرفهـا
يقلط على الشده كما سالم الزيـر
وتامن به الديره وهو في طرفهـا
لا ما زهمته قام يشتح كما الطيـر
لا ضف جنحانـه وكفـه عكفهـا
وأهل الردى مالك وراها مداويـر
جنّب مجالسهـا وجنّـب ولفهـا
لو إضحكت لك في السنين المياسير
لابد في وقـت القسـا تكتشفهـا
تفِرح بك الشمات لو ذنبك صغير
وتحتار في أصغر غلطةٍ تقترفهـا
ويصير همك كبر هضبة شمنصير
لكـن جنـّب معرفتهـا وعفهـا
الأنذال رفقتها مهونـه وتقصيـر
وتِكثر عَنا نفسك وتكِثر حسفهـا
فالرفقه اللي ما تدّلك علـى خيـر
............................
ولا تـرادع جاهليـن المحاضيـر
ولو تعترض لك كلمة اللاش طفها
وإحفظ السانك لو بلوك المعاثيـر
الكلمه اللي دون ميـزان خفهـا
يجوز ترمـي كلمـة دون تفكيـر
واصبح سودان القلوب تخطفهـا
وإصدر لياما عفت صدارت بعير
لا ترتجيها وإطلب الله خلفهـا
وترى النصيب يصيب ما فيه تغيير
لو تجبد أمواج البحـر وتغرفهـا
وعذر الرجال الطيبه خله يصيـر
أبيـك تعذرهـا وتقبـل آسفهـا
العذر يقبل لا حصـل فيـه تبريـر
من الرجال اللي صريـحٍ هدفهـا
في كل شي قد تجـوز المعاذيـر
الا على أعراض الرجال وشرفهـا
أقولها وانا الـذي سلوتـي غيـر
البعد عن ضيق البيـوت وكنفهـا
وأسج في خبت كستـه النواويـر
حيثه ظفر روحي وحيثه نصفهـا
وأسواق الأسهم والذهب والدنانير
لو سلموها في يـديّ إصطرفهـا
ينوبها ملحاٍ من إبـل المناصيـر
إرعابها زهر الفيـاض وقطفهـا
رد مع اقتباس
