[poem=font="Simplified Arabic,5,blue,bold,normal" bkcolor="transparent" bkimage="backgrounds/49.gif" border="none,4,gray" type=0 line=0 align=center use=ex num="0,black"]
الغزالة يالعتيبي جافلة = ضبيةٍ متحصنة فوق الهضاب
لو تغمّض عين ماهي غافلة = للخيانة حاسبة ميّة حساب
مااتعرف ملاطفة ومجاملة = مااتعرف إلاّ ترانيم الغياب
شفتها مرة ومرة قاتلة = وانفتح للجرح منها ألف باب
كنت طالع والغزالة نازلة = وصرت نازل والغزالة بالسحاب
يوم لدت بالعيون الذابلة = هبْتها وأنا أحسب إني ماأهاب
أشّرت لي ماأظن مجاملة = المست في نظرتي معنى السراب
عندي احساس إنها متفائلة = إني أحميها من عيون الذياب
رحت أتابعها ولاهي حاصلة = هي تراوغ بي وأنا أزيد اقتراب
قرّبت مستاحشة متزاملة = كنها الباحث عن دروب الصواب
ويوم حسّت إنها متحاملة = سلّمت في همس يغني عن كتاب
تمتمت قالت بحسرة : راحلة = واضحكت مدري خجل وإلا عتاب !
وطاحت عزومي وحلّت ناجلة = في حياتي يوم فكته الحجاب
رحت أصافحها وكانت واجلة = من فضاعة خوفها جف اللعاب
نيّتي والله ماهي عاطلة = ليه مدري صابها مني ارتياب ؟!
إختفت مثل النجوم الآفلة = كنها يوم اخفقت خفقة شهاب
المكان أصبح صحاري قاحلة = مابقى إلاّ عطرها ذكرى عذاب
قمت أطالع بالوجيه الخاملة = يمكن ألقى بينهم بعض الجواب
مالقيت إلاّ العيون العاذلة = جعلها للنار في يوم الحساب
قالوا العذال يابن العايلة = وش تبي فيها وهي حلم وسراب
إنت أصيل وهي مجرد هاملة = لاتمرّغ علم ربعك بالتراب
وش تبي في حيطةٍ متمايلة = خلها تولّي عساها للذهاب
يالعتيبي حيرتي متعادلة = بين نار العشق وارضاء الصحاب
بعدها أعيش غربة شاملة = أقطع الرحلة تصبّر واحتساب
لعن أبو من قال عنها جاهلة = ماقرا بعيونها سبك الخطاب
ولعن أبو من قال ماهي كاملة = مابها لو دوّروا شيٍّ يعاب
طول ... شكل.. وفوق هذا عاقلة = من يحاول لمسها يلقى العقاب
لعن أبو من قال عنها سافلة = مالمس بكفوفها طهر السحاب
لأقبلت تقول وش هاالناحلة = ولاأدبرت تشكي من الحمل الثياب
ولاجْلست تقول هذي راجلة = ولامشت ياكنها زرقات داب
عيبها الوحيد ماهي عادلة = من بغاها تطعنه في ألف ناب
مدري هذا طبعها أومتجاهلة = تذبح المسلم ولاتقبل عتاب
قبلها اْسمع عن نجوم القايلة = وعقبها عاينتهن والراس شاب
جعل عذّالي بها للآكلة = جعل تمسي ديارهم فقر وخراب
شعر \ حمدان بن سالم العنزي[/poem]