يامن لعيـنٍ سهيـره ماهتنـت بالمنـام
تسامر الهاجـس اللـي هيـج اشجانهـا
من بعـد ماودعـت ربـعٍ عـزازٍ كـرام
كن المدينـة خلـت مـن كـل سكانهـا
العصر يوم الخميس الساعه اربـع تمـام
يوم امطـرت غيمـة الأحـزان هتانهـا
مادت بي الأرض مدري وش حصل بالتمام
ميـر الوكـاد ان شـيٍ زلـزل اركانهـا
في ركبهم من لها بالقلـب عالـي مقـام
مايمحـي رسمهـا لـوطـال هجرانـهـا
ياطيـر بالله بلغـهـا كثـيـر الـسـلام
وقلهـا الـروح بعـدك تنسـج اكفانهـا
وقلها القلب عـن كـل الغناديـر صـام
مـن دونـه أبـواب والبيبـان بيبانهـا
الخوف لو طال من دون الوصال المقـام
وادفع ثمـن نبـض قلـبٍ ذاق حرمانهـا