ياهلا بالاعضاء الزينين.
مساء الخير ان كنتم في الصباح وصباح الخير ان كنتم في المساء
(صدقوني تجي كذا)
شمــــاء يالبي الفرقه والجدايل
http://sabalmnal.********************************************/Untitled-1%20copy.jpgعلى الرابط شيماء
عاد اسمعو القصه..
معاني الكلمات
الصحيــه =مستوصف الاسنان الحين
تواسى=تعدل أو تصلح
سعابيل=كريم شعر ويستخدم كمزيل للدسم العالق باليدين
تسورب= تنهمر
الباحه=مهيب اللي في الجنوب لا مثل فتحه الهوايه بس على تحت....الحين على بالك وضحتها
الطشت =إناء داءري الشكل تحطون فيه مويه للضحايا
البدايه..
صحيت في الصباح الباكر....(مهوب مني من الشمس اللي لعبت في وجهي..خبركم مطرحه في السطح)
مسحت خشتي باطراف كمومي وقمت اتمغط واحك شعري بيديني الثنتين .. المهم انتبهت للي تنشر الهدوم بسطح الجيران وفز قلبي...وقمت احط سعابيل وامسح بها خشتي عشان الخط اللي طالع من خشتي وواصل اذني واحط سعابيل والبق قذلتي (من جد لو ينشف ريقي اموت)واقعد اتميلح عندها واتركى على طرف الجدار واطالع الشمس على بالي اشوف الشروق وهي لاعبةً في وجهي كني جربوع يلاحقونه في كرتون... المهم انتبهت لي شماء وصارت تلعب بجدايلها بعد عمري وتحاول تعدل عيونها هالحولا اللي وحدة تناظر السماء والثانيه تطل مع الباحة..قلت وانا مستحي بس بس ...عشان تلتفت قامت وصرخت وشالت الطشت قالت وينه ملعون الوالدين وينه....ارتعت قلت منهو قالت البس خلني اقطع ذنبه...قلت الله يخلف على امتس تسمينه بس مسويه متطورة اسمه قطو ...قالت المهم وينه..قلت طار ...والله لانتف جنحانه لوني شايفته... (شديدة بس احبها)
قلت شماء شماء
قالت هاه
قلت وش اخبارتس
قالت وش دخلك
قلت اهم شي انس طيبه(عادي متعود على التهزيء والطق)
عاد خربتها وقلت لها انا اذا شفتس احس كني مقلطٍ بصدري حسن بلون وزبيدة ومعهم ابورايش..احس بقلبي يرنع..
وآخذ نفس قلت تعبت ابيتس تنتبهين لحبي قالت: وينه!! confused: قلت منهو قالت لي حبي اللي تبيني انتبه له...لا ياشماء افهميني ياعمري انا احبتس...ردت علي بفهاوة وقالت لي هاه قلت يعني اتزوجتس ونعيش في سبات ونبات ونخلف جراذي وحشرات ...قالت بس ...قلت وش بس لا تقولين ما ابيك الله يخليتس ياشماء قالت بس انا ابي واحد زين وانت وووع....عاد ما قدرت اصبر قلت انتي وجدايلتس اللي كنها دركسون دباب ..قالت جعله في ضروسك الللي كنها ضغطات فيديو نظامين(اللي يطلع شريطه على فوق)قلت حلوة حلوة هههههههههههاهاي
تعرفون ما ابي ازعلها ومثل ماتعرفون متعود على التهزيء...
قلت لها اسمعي انا ابيتس كذا لاتغيرين شي فيتس ياروحي وانا اي شي تبين اغيره فيني اغيرة..
قالت زين سنونك وافكر... (من زين وجها تفكر)
المهم اجتمعت مع عيال الحارة بالعصريه ومعنا عليان والشله كلهم واستشرتهم اللي قالي طب في زليب على خشتك ..
.. واللي يقول تعلق مع سواق الشيوخ بالشنطه ولزق خشتك بالارض زمينها تتواسى..المهم كثروا اقتراحاتهم الغبيه كونقرس الحارة...وانا ماش ما اقنتعت...
جاني عليان وقال في البيت ياخيي انا حاسن بك وودي اساعدك ...ناظرته وخميته وقلت يابعد عمري ياعليان وفجاءة قام يصارخ ..ابعد ابعد ويصيح قلت وشفيك قال سنونك قبصت ديدي..ضاق صدري من هالسنون وقلت عليان شف لي حل قال ابجيب الرشا(حبل عريض) وابربطه من الجدار الى الجدار الثاني وانت تعال طاير وخله يلخ بخشتك قلت والله فكرة ياعليان يالله بسرعه (ياناس قا يل لكم دلخ).... ظبطنا الحبل وما بقى الا ابدا....المهم جلس عليان على الجدار وبدا يزاعق سعيدان سعيدان هوهو ...انا خذني الحماس وجيت طاااااااااااااااااااااااا ااااااااااير وما دريت الاسنوني تنشب في الحبل وابدا اتدودل (اي اتأرجح..ياعيني على اللغه)سنوني ناشبه في الرشا كني سلسلة معلقه على صدام ليموزين باكستاني...المهم ويجي عليان ويفكني ..ووطى عليان وجهي تشققت رجليه الضعيف وما نفع...ربطت وجهي بمغاغيط وماش مزعت خشتي المغاغيط...
المهم اني مانمت
ويوم اصبحنا ...واطلع للشارع واقابل مصطفى خوينا وينتبه لوجهي انه ممزع بالمغاغيط قال شو ياسعيدان اللي بوشك قلت لا تقلب المواجع يامصطفى قال شو ياسعيدان بتخفي عليي قلت لا انت احس ن واحد من اصدقاي والسالفه تسذا وتسذا..... قال مصطفى بسيطه سعيدان اعمل تقويم لاسنانك قلت وتظبط يامصطفى قال ايه ولو قلت واتزوج شماء السبهه..اااااااااااااااااا اااااااااااااة يامصطفى احبها اكثر من العسكريم (ابو الحب اللي تعرفه انت وخشتك)
قال ربي يوفقك ياسعيدان روح للمركز وخليهم يعملوا لك تقويم...قلت طيب الحين اروح للشرطه قالي شرطة شو قلت هماك تقول المركز قال لالالالالا المركز الصحي ...ما بتفهم انتا (ياعالم كل الناس تهزءني)
قلت هاة وانا وش يدريني ماقد دخلته اي شي يجيني يوديني ابوي للمطوع يتسويني vvsmileواطيب ...
المهم عزمت قلت لعليان بروح للمركز قال عليان وش انت مسوي ياويلك من ابوي قلت لا المركز الصحي ..قال عليان تقصد الصحيه قلت ايه الصحيه قال مهيب زينه تراهم يغزون ابر (الله يرحم والديكم انتم والمطوع اللي معاملكم معامله دجاج شوايه لو واحد مزكوم يتسويه بسيخ في خشمه)...
عاد قمت الصبح ورحت للصحيه (عيادةالاسنان حالياً) عشان احط تقويم ...قابلت بالاستقبال واحد معه اللي تسطع الذبان ووجهه ما فيه شعروراسه اصلع كنه بلورة االالوسي ولا بطاطسه مسلوقه في زيت(عادي تصير لاتدققون74 ولابس نظارة كنها مريات جمس 79 ...قال لي وش عندك قلت ابي الدختور سنوني قالي اهااااا (عاد مسوين ان عندهم دخاترة ما عندهم الا دختور واحد ويعالج كلش واذا مرض هو جاء يتطبب عند المطوع:confused قالي طيب وش اسمك وكم عمرك وبدايشخبط بقراطيس عنده وقال انتظر دورك التفت يمين يسار ما فيه احد قلت له لا يكون هالذبان بيدخلون قبلي ...اللي تهشهم من اليوم... قال انطم قلت:طيب(قايل لكم ماعندي مشكله)..
جاء دوري ودخلت على الدختور وانسدحت على كرسي الحلاق اللي حاطه قدامهmdr .. قال لي: وش عندك
قلت الله لايهينك دقن..قام هو وصمخني بيدة ذااللي كنها ملاس قدر ذبايح على حواجبي الين صفت جنب شنبي..عاد تكتفت وتأدبت وعرفت ان الله حق وقعدت اناظره وانا ساكت وما اشوف الا شنبه ذا اللي كنه عاظ مكنسة يد.. (ياحليل شنب الرويشد) ..
المهم قلت له يادختور.. ابي جسر احطه على سنوني عشان تواسى..قال :ايش
قلت وان مدنق ومستحي الله يسلمك سنوني..قال لي: لايكون الاصابع اللي في وشك هاي تسميها أسنان ياأبني ..عاد سكت وقلت يادختورابي جسر (وين ياعمي تطلب فلافل مو جسر انت وجهك )
قال ياابني انت تحتاج ورقة اصلاح عشان نشوف اسنانك اللي تتكلم عنها..قلت دكتور يقولون انك تعرف تصلح جسور ... مسوي بأقنعه
قال انت ياابني نحط بفمك جسر البحرين وما بيعدلوة..والااسمع ابني اعطيك نصيحه لوجه الله ..
قلت تكفى يا دختور ..
قال : شوف لك يا ابني شبك مزرعه ولفه على اسنانك وان شاء الله تزبط... (حتى ابو شكيب صار يذبmeanie
قلت يادختور يعني ما في امل حاول الله يخليك .... قال شو حاول ياابني يالله اتيسريالله ...قمت وقلت لها انت اصلاً ما تعرف من شفت هالحبل اللي معلقه على رقبتك وانا داري انك عنز(تعرفون اسمع بالسماعه)قال ايش ايش قلت:رح بس من شفت في غرفتك مربى وجبن وانا عارف انك بياع مقصفm (خربها يوم شاف ان ما فيه فايدة )
المهم طلعت ودموعي على خدي وافكر وش بقول لشماء ... وعليان يقولي لاتخاف بتزين ما عليك..قال رح للرياض وهناك يزبطونها ...قلت تتوقع قال انهم يزبطونها قال لي: انا سامع ان في الرياض ورش شغلها زين...(خلاص ما عندي مانع اروح لو لمصلخ)قلت وشلون طيب اروح للرياض قال الصبح تعلق بسيارة سواق الشيوخ واذا رحت للرياض اسأل اللي في الحارة هناك ويعلمونك..قلت خلاص بكرة اروح كله عشانتس ياشماء
رجعنا للحارة حول المغرب ا لا الحارة تخترش والناس رايحه جايه ووقفنا ان وعليان نبي نعرف القصه قالوا لنا اليوم بتتزوج شماء عبيد قلت وشو بتتزوج عبيد وجه الفستقه ليه وانا وقعدت انا ظر الناس وهم يعلقون الانوار ويفرشون الفرشات وعليان يناظرني وانا ساكت كني بزر مسويها بالفصل على نفسه ورحت اركض للبيت بسرعه ورقيت للسطح وخذت فوطة البيالات وحطيت وجهي بالزاويه وامسح دموعي ونخا.... .... وتعقدت واسمع الناس برا تغني بالعرس وانا اصيح وابتسي وامسح دموعي وامشي بالشوارع واقول لو زادت جروحي لو طلعت روحي ماانساتس ولا انسى حبتس ياشماااااااااااااااااء... شماااااااااااء شماااااااااااء(طالع محمد حمزة بمسلسل اصابع السمك) ومهما طال الزمن اناعنتر وشماء هبله ...
من الخيال شباب من الخيال .....
الجريح
رد مع اقتباس
