[align=center]السلام عليكم والرحمه
قعدت ادوج بغرابيل ليما افتر راسي ومن الطفش دخلت على الفرفشه
قلت خليني اقول موقف صارلي ووسع صدري شوي معكم
طبعاً هالموقف حقيقي ماهو من الخيال
هذا الله يسلمكم
بعد ماتخرجنا من الثانويه كل وحده من البنات قررت وش تدخل تخصص انا قررت احياء وهدى قررت انقليزي ونحتري عمشا ماقالت لنا شيء
كلمتني هدى ذاك اليوم
قالت:شفتي عميش اهلها عيوها تدرس يقلون لثانويه ويسد وبتتزوج هالعطله بياخذها ولد عمها
انا:وشهوووو ..وش ذا على كيفهم هذا مستقبلها وهي تبي تدرس طيب مايخالف تتزوج وتدرس
هدى:لا ولد عمها معيي
المهم وتصمخني العبره واقعد ابتسي وتبتسي هدى معي
حاولت مع عمشا انها تقنع اهلها..مير تقول مرره معيين قلت طيب وشلون نشوفتس قالت في اي يوم امبارك زوروني..قلت يصير خير.
المهم بدينا الدراسه ولهينا راح الترم الاول وخلصنا الامتحانات يوم عطلنا قلت لهدى وش رايتس مانزور عميش قالت خلاص كلميها وشوفي يوم نروح لها
عميش:هلا بالقطوعين لهتكم الدراسه عني
انا:لاوالله انتي اللي لهاتس الرجل عنا
المهم قلت: بنجيتس العصر ونرجع المغرب عيت الا تعشون عندي قلت: طيب وين انتم فيه
قالت: بالدسمه
قلت: هي بعيده عن الدوادمي..قالت: لااااااابد قريبه<<<<<<تلعب علي هي وجهها
المهم انا لعبت على ابوي قلت بروح لوحده من صديقاتي وهي هنا عندنا بالحاره قريبه
لاني داريه لو اقوله صديقتي برا الديره بيعيي المهم قلت له على 11 الاني في البيت ..ووافق
وجاء المغرب ومريت هدى ومشينا وطلعنا من الديره وتعدينا اللمبات واظلم الشارع (وعمشاء قايله لي ابتلو لين تلقون على اليمين لوحة)
المهم ونمشي ونمشي ونمشي عيت هالوحه تجي
وكلم عمشا بالجوال
انا: هيييييه انتي وين لوحتكم تلعبين علي لاتروعيني ترى ماقد طلعت من الديره
عمشا: يابنت الحلال بلا خوف شوي وتشوفينها لاشفتي اللوحة ادخلي على البر عندتس خط ممشا سيارات.. اثرها ابتليبه
انا: وين نشوف هالخط بهالليوله زين لاجت اللوحة كلمتس
المهم ونلقى اللوحة ونلف عن الطريق ومغير قرقعت هالحصى ولا نشوف شيء ظلمة مغير نور السيارة واسمع نبح تسلابه مدري عوا ذيب من الروعه معد ادري وش انا اسمع
وحنا نتماسك انا وهدى من الروعه
أنا: هدى وش رايتس مانرجع لاعادت عليها هي وقريتها ساكنة بالربع الخالي ذي
هدى:وش ترجعين عقب ماقطعنا هالمشوار كلميها بس ليانا ضايعين
وكلمها
انا: الو الووووووووو عمييييييييش ووجع
عميش:هلا علي صوتس مااسمعتس
أنا:حنا على هالخط وين نروح
عميش: ابتتتتتتتتتتتتتتلي لين تلقين................(انقطع الارسال
أنا: لييييييييييين القى ويش تعالي وين رحتي
ابتس ياهدى انقطع الارسال وين نروح؟؟
هدى: هي قالت ابتلي خلاص ابتلي واتصلي لين يشبك
انا: وش ابتل انتي وجهتس ثم ناصل مكه مادرينا
هدى: ههههههه زين ناخذ لنا عمرره
انا: لاياشيخه رايقه انتي وخشتس..الله يستر مايصير فينا شيء والله ليذبحني ابوي ..لا ومن زين وجههي لاعبتن عليه
هدى: توتس تفكرين
أنا: وش يدرينيي تقول انها قريبه
__
وقعدت اتصل لين شبك وردت علي
أنا: عمشا والله لوريتس يالتسذوب..خليني بس اشوفتس والله لاتوطا في بطنتس
عمشا: ههههههههههههه ايه نشوف
انا: اقول عميش انا اشوف لمبات بعيده هذا انتم
عمشا: ايه حنا بتلقين اخوي اول ماتاصلين امشو معه
انا: انتي ووجهتس ليش ماخليتي اخوتس ياقف عند اللوحه يجسرنا
عمشا: ههههههه<<<<<<<<<<تضحك علي المجرمه
المهم انا كنت معصبه وارتفع ظغطي حاطه براسي اني ادخل وضربها ولا ادزها
يوم دخلت الا البنت حامل بطنها متر قدام مشاءالله
وتشوفني بطرف عين وتضحك وتقول:هاه توطي في بطني
قلت: ابتس انقلعي لاتقربين يمي ثم يطيح اللي في بطنتس يجيب راسي رجلتس
المهم قعدنا نضحك ونسولف ورجعنا..بس رجعتنا انا وهدى تفرق عن جيتنا رجعتنا كلها ضحك
مايستفاد من القصة::::
-لاتصدقين صديقاتس ابد انتي اسالي وجيبي العلم الصح
-لالالالالالالالالالالالال الالاتكذبين على ابوتس ابد
-لاتصيرين خبله مثلي خلي صديقتس المتزوجه هي اللي تزورتس انتي بنت وهي معرسه ماعليها خوف يجيبها رجلها
أنتهى
[/align]