![][*+عجــايب+*][ غير متواجد حاليآ بالمنتدى](images/statusicon/user-offline.png)
![الصورة الرمزية ][*+عجــايب+*][](image.php?u=33&dateline=1164057206 "الصورة الرمزية ][*+عجــايب+*][")
السلااااااااااااااام على كل مصرقع ومصرقعة .....
شباب ... صبايا ....
موضوعي اليوم موضوع حبيت أنقله لكم لما له من الأهمية في حياتنا ..
موضوع يمس كل فرد وفردة ....
ويفكر فيه كل أب ولبوة ...
في سبيل تحقيق السعادة ...
لذا أعزائي ... الموضوع صحيح طويــــل
ويحتاج لكاس كبير من الحجم العائلي شاي
لتقرؤو معي هالموضوع وتعطوني رايك ووجهة نظركم فيه..
[MARQ=RIGHT]منقول[/MARQ]
عزيزي الأب المحترم بحكم إنتشار ظاهرة العنوسة هاليومين , و لأن بعض الشيّاب الله يهديهم قاعدين يجمعون في هالبنات عندهم في البيوت و لا خلوهم يعرسون ( أعرف واحد من شيبان حارتنا عنده ثلاث بنات ولا زوجهم .. يقول : أحتري الرابعة عشان تكمّل المشروع ) , و لأن البنات مصاريفهم كل ما لها تزود و تزود و تزود ( و إنت يالله راتب التقاعد يسدّك إنت و عجيّزك و شغالتكم ) فلذلك تضامناً مني مع الشيبان قررت إني أهديهم هالمويضيع المتواضع عشان يقدرون يصرّفون بضاعتهم و يترزقون الله ( لا تنسونا من المهر عاد .... ترى كل بنت أبوها يقرأ الموضوع و يزوجها لي من مهرها 25% ) .
1) في البداية يستحسن إنك تشتري بيجو بقس لونه بيج أو حليب شاهي ( تذكرونه ذاك حق البيوك 81 ) و إذا ما لقيت بيجو ما يخالف ممكن تشتري كوروسيدا بقس برضه بس لازم تصير بيضاء و إن ما صارت بيضاء ترى بنيّك مهوب معرسين , و لازم يكون الاصطب اليسار الورّاني مكسور و الرفرف القدّامي اليمين فيه دقشه ( أدري بعضكم يقول وش يخنبق ذا القحطه بس سووها و ما جاكم علي البيجو ذا له تأثير سحري شوفوا الفرنسيات إذا أبطوا ما أعرسوا يشترون بيجو على طول ) .
2) السواق حقكم حبّذا يكون أطرم ما يحتسي ( عشان ما يعلّم المعاريس إن بنيّك قبلهم يروحون للمشاغل و الأسواق ) و إن حصل شويّب هندي صافق الـ80 سنة فهذا عز الطلب , طبعاً إن لقيت مواصفات إضافية يعني أصقه و عميان تراها كويسة بس المشكلة إنها ما تتوفر بكل الألوان ( ما فيه منها إلا لون واحد بنّي محروق و مهوب عميان ... أحول ) .
3) المفروض يكونون كلهم مدرسات ( تخبرون أدرَج في السوق ) لكن لازم تشغل كل الوسايط حقتك عشان تنقلهم للرياض كوسيلة إغراء و جذب للمعرس و إن صار فيه إمكانية يا ليت تصير مدرسة علوم في إبتدائية و تخليها تقنع المديرة و المساعدة إن أمها و أبوها متوفين و عاجزين عن العمل و إنها لازم تروح تطل عليهم كل شوي و بالتالي لازم يخففون نصاب الحصص حقها ( يعني حصتين في الأسبوع فيها بركة <== والله لو إنها تدرس قطاوة ) و إذا ارتاحت من الشغل هذا له فوائد عديدة يأتي على رأسها إن الشيب يبطي ما يطلع في رأس البنت و أيضاً يديها ما تنعدم من الطباشير ( أقول هم يستعملون الطباشير للحين !! ) .
4) شلة الشيبان اللي تبشك معهم لازم يكونون من صفوة القوم ( يعني مهوب فراشين مدارس بنات أقل شئ .. أقل شئ يكونون موظفين في وزراة المياة <=== خلوا القصيبي ينبسط يمكنّه يقرأ موضوعي و يخصم لأبوي في الفواتير ) و الشيبان ذولي لازم يكون إنتاجهم كله عيال مهوب تماشي اللي عندهم بنات مثلك و ينافسونك على السوق ( شغّل مخك معي بالله منيب قاعدن أشرح لك كلش ) .
5) لا بأس من أنك تسوي زحمه قدّام ذا الشيبان كل شوي يعني كل 10 دقايق انطل لك كلمة ( ولو بدون مناسبة ما يخالف ) زي كذا : " بنتي المدرسة منيرة اللي عمرها 23 سنة و راتبها 7000 ريال عيّت اليوم تروح للعزيمة مع خواتها تقول بأقعد في البيت أوسع صدر أميمتي " , أو إذا جاء فيديو كليب في الدش ( الشيبان طايحين فيه من تالي ) لنوال الزغبي أطمر تسذا تسنك مقروص و طيّر عيونك في الشاشه بعدين أقعد و خلك طبيعي و إذا قالوا لك ربعك : سلامات عسى ما شر ؟ قل لهم : " أحسبها بنتي أمل جعلها السكني ( <== ميد نوال طبعاً ) ... والله ياهي تشبهها الخالق الناطق " <== أحس إنهم بيشوّتونك عقب ذا النصبه .
6) إذا طلعت تتمشى إنت و حدا هالشيبان عقب العصر ( مغير دوران الله يجزاهم بالجنة في عقيق ابن موسى و حي الغدير يدورون أراضي تسن الواحد في مخباه مليار ريال و هو تلقاه لابسن ثوبن مفصّله عند شمسان اللي في شارع الظهيرة من 30 سنة ) و جيتوا داخلين للرياض قل له : خلنا نمر على شارع التخصصي بأشتري بوية سوداء , طبعاً بيتلقّف و يبنشدك : وشو له البوية ؟ , قل له إنت بكل برود : " البنات الله يصلحهم يشتكون من ركيباتهم يقولون إنها بيضاء مرة و يخافون أحد ينظلهم و يبون يخففون بياضها شوي و يسوون تمويه على أهل الشماسيّة " .
7) كل يوم أطلع من البيت و رز في مخباتك الفوقيّة من أمهات خمسميّة الزرق $ و إذا قابلت شايبن من ربعك ( اللي عندهم عيال موظفين و سنعين ) و سألك : وين بتروح له ؟ , طلع الخمسميّة و قل له : هذي لبنتي الله يصلحها تبيني أروح أحطها في حسابها في البنك .. تبي تكمل الميتين ألف اللي في حسابها اليوم بذا الخمسميّة , و خل سعابيله تقوطر .
8) حاول تشدد على بناتك في الغطاء و قل لهم : أنا ما عندي بنات تلبس نقاب ولاّ برقع ... غطاء كامل يعني غطاء كامل لازم تتسترون و لا أحد يشوف منكم و لا نتفه ( طبعاً إنت قصدك مصلحتهم لأنهم إن كشفوا وجيههم ولاّ عيونهم عز الله خاسوا في تسبدك ) .
9) إذا كان عندك جيران أجاويد و عيالهم معطيهم الله من الجمال ( اللي انحرموا بناتك منه ) حاول إنك تأخذهم و تمشيهم معك و تدّعي بهم يعنني عيالي حلوين , طبعاً العالم بتقول ذولي عياله !! أجل بناتهم وش بيطلعون ( الأسطورة القديمة حقت " الغزال في الشارع و القرد في البيت " أنا أتوقع إنها غلط و غير صحيحة لأنها اكتشفت قبل إكتشاف اللوغوريثمات و بالتالي هذا يدحض تلك النظرية دحضاً مبرحاً ) و حاول ما تخلي عيالك الصدقيين يطلعون للشارع مهوب عشان أخلاقهم ما تخرب لكن ( بما إنك أبوهم فأخلاقهم خربانه شد بلد ) عشان ما يحوقون الشغل كله عليك .
10) يا ليت تجيب شغالة مزيونة و تخليها إذا صاروا الشيبان عندك تجيب الشاهي لكم و تدخل و أول ما يقزونها إزعق عليها و قل : عودي يا بنت فيذا رجال .. فشلتينا قدامهم , طبعاً هم بيقولون في أنفسهم : يا حليلها ذا البنيّة مزيونه والله .... و كل واحد بيخطط لولده عليها و مهوب طالبن إن ولده يشوفها ... بزعمه ما يبي يحرجك و هو قازن الشغل كله ( الضعيّف ما يدري إنه ملعوبن عليه ) .
عـزيــزي الأب
* تطبيقك لهذه العشر خطوات المذكوة أعلاه يضمن لك الآتي :
1- إنك تصرّف بناتك الشيون كلهم و خلال مدة وجيزة .
2- مخباتك بتمتلي بالدراهم اللي جتك بليّا تعب .
3- بتحس بطعم كلمة " يا خال " اللي انحرمت منها سنين .
4- البيت بيخلى لك إنت و المدام و بترجعون تلعبون حبشه زي منول .
5- بيستاسع صدرك و إنت تشوف الشباب اللي إنت موهقهم بذا العرس و هم ما يقدرون يقولون لك ولا كلمة ( لااااا و غصبن عنهم يحبون رأسك بعد ) .
* الأعراض الجانبية لهذه العشر خطوات قد يشمل الآتي :
1- يمكن واحد من الشباب ( المأسوف على شبابهم ) يغتالك إنتقاماً منك و ثأراً لشبابه الضائع .
2- إحتمال يصير مأذون عقد الأنكحة يمون عليك ( من كثر جياته لبيتك ) .
3- يمكن روحاتك للمحكمة تكثر عشان بعض رجال بناتك يبون يرجعون البضاعة و يأخذون دراهمهم .
4- الـ 25% حقتي منيب مرجعها . والله ما تشد منها قرش ( داري إني نذل ) .
5- على الأرجح إن بناتك بيرجعون لك و ينشبوك في حلقك مرتن أخرى لاااااا و هالمرة مطلقات بعد ( صطرني إن قدرت تصرّف وحده منهم هالحين لو برأس مالها ) و معهم شلقة بزارين بعد .
*
*
*
((((وصل عن طريق الايميل ))))
ولكم مني كل التحيات ....
عجوووووووووبة
رد مع اقتباس
احس الي حاطها ذا ماعنده سالفه ( أحلفي )
