بسم الله الرحمن الرحيم
السلام عليكم ورحمةالله وبركاته
...........................
.:التطعيس :.
ماذا تعرف عن هذه الهواية ...الرائعة ..(عني لو يسمحون للنساء بالسواقة كنت أول وحدة بهالطعوس )...
هنا ...بعض الخبرات من أفواه أصحابها عن طرق وكيفية التطعيس...لمحبي هذه الهواية..
ولا ندري مامدى صحة الخبرة التي طرحوها لكم ...
نبدأ الحوار مع الخبراء :..
س/ابي اعرف التطعيس اللي يجمع بين الاسلوب الفني و السلامة
ج/
لتطعيس ماينفع ندرسه نظري
لازم عملي
لكن نعطيك بعض من غشامتنا
شف
الدرس الاول
هواء الكفرات لايزود عن ثلثين ابد والا تراه بيبلشك
اترقى الطلعات الا بالثاني
اذا حسيت ان الموتر بيغطس والا طاح عزمه حاول انك تطرح وجهه
لاتكسر الطارة ابد الا اذا شفت الموتر ماشي صح
ولاتكسره في الطلعات ابد الا لين تصير طارة مرة
لاتفكر تسيف الا لين تصير محترف
س/
طيب فيه سؤال وش افضل سيارة في التطعيس هل الهايلكس و الددسن و شو افضل نوع من الجيوب.؟؟
ج/الهايلكس مامثله ابد
واليك ماذكر في كتاب (( الهايلكس وطعس الفنجال))
للكاتب الكبير مشخوط
الباب الاول الفصل الاول
وردنا في مطلع هذا الزمان موتر بطران وارد اليابان
مخصص للبران
عزمه قوي ماينفع للظهر الطري حديده شديد مربط تربيط
مايغطس لافي رمل ولاطين ولا تسمع له حنين
الفصل الثاني
تولعنا نحن العتبان بالهايلكس مروع الضبان
فتفننا في تظبيطه
حتى اصبح شغلنا الشاغل
بداية من التضليل
الى جنط الدوج
والرشه والطربال
مداخله ..من أحد المحترفين :.
بالنسبة للتطعيس..فشف قبل لا تطعس..لازم تحط اشياء في بالك
وهي اشياء ضروري لكل من يبي يطعس..سواء في الثمامة او بالربع الخالي:
1- اولا لازم معك ماطور هواء..لو انك بالثمامة يلزمك ماطور..لانه حتى وانت بالثمامة وجنبك محطة تبي تلقاها زحمة ويالله تمسك سرا وساعة الين يجيك الدور وطبعا في غير الثمامة شئ ضروري
2- ايلا بغيتا تطعس..لازم تكونون اكثر من سيارة وهذا ايلا صرتا تبي تدخل الدهناء او غيرها..لانه لا قدر الله تحتاجون السيارة الثانية وهذا يصير كثير
يعني تطيحون في فنجال او تتعلق السيارة يبيلكم موتر ثاني عشان ان احتجتوا تظهرونه او تدورون فزعة لكم :)
3- واهم شئ لا تركب الا مع سوّاق (مهوب سواق ابو فيزه) اقصد سواق بر وراعي تطعيس..يخوي انا عندي حكمة مولفها لحالي ولا عمري قلتها لاحد (طاعس مع سواق بكورلا ولا مع غشيم بشاص)
وش رايك؟؟!
وهذه اهم شئ..ولو يصير معك اكثر من واحد يصير احسن..صحيح يبي كل واحد يسوي فاهم ايلا غرزتوا او توهقتوا ويبون يتهاوشون وكل يدّعي انه فاهم..بس انهم ارحم ..
فيه اشياء واجد..وهي لا تخاطر وتدخل جوا ولا معك ماء..لان الماء ضروري ولو قلتا راس مالها عشرين كيلو ما تستاهل برضه لازم يكون معك ماء ولو انكم سواقين..لانه ضرووري.
.:مداخله أخرى :.
شف بجاوب على على سؤال اللي هو وش الافضل الهايلكس ولا الددسن؟
طبعا مافية مقارنة الهايلكس اكيد وانا يامحاتسيك معي هايلكس ولاتحسب اني امدحة لانة موتري لاواللة بس اسأل مجرب ولا تسال دختور.
اما بالنسبة للتطعيس فهو مثل ماقالوا لازم تطبيق .
بس بقولك اشياء تستفيدها في التطعيس .
اول شي اذا كان موترك دفرنس حط في الكفرات 10
اذا كنت تبي او 15 بس 10 افضل .
ثانيا : لاتسوي فاهم وتتمشى بالثالث تراك معك دفرنس مهوب شاص . يعني الثاني بس.
ثالثا : اذا بغيت ترقى لك طعس لازم مثل ماقال خوينا لاتلف بالطارة وانت ترقى الطعس ابد ولا بيثولث عليك الموتر يعني بيغرز .
رابعا : اذا شفت ان الموتر ترادا عزمة العن والدية بالاول يعني ردها للاول .هذا بالنسبة للمرقى .
خامسا: مثا ماقال الرجال لاتحاول تسيف الا متعلم
التطعيس يعني هالنقطة يبيلها تطبيق نظري .
سادسا: ادري انك بتعابط وتسيف بس اسمع اول ماتسيف بقولك وش بيصير لموترك بينقع في محلة
طبعا بتقول برقص للموتر بقولك ماينفع لانة يبي يغطس زيادة .
الحل اذا بغيت تطلعه في هالحالة لا زم يصير معك كم واحد اول شي برح للكفر على الجهة اللي
نازلة بعدين خل اللي معك يسحبون وجة الموتر
لتحت عشان يذبون وجة الموتر بعدها خلهم يدفونك من مقفى الموتر وانت ادعس لة واكسر الطارة للجهه اللي تحت يعني اللي تحت الطعس.
سابعا : في اماكن اغسل يدك تطلع منها الا بسحب من موتر ثاني وهذي اكثر شي في الدهناء ولا الرملة . اللي وهي الرباضة وهذي منكان تشوفة وانت مقبل علية تحسبة ارض يابسة يعني الموتر بيمشي فيها زي سلام عليكم بس اول ماتطبها بتنقع فيها ولازم سحب .
بعدين لاتنسى العيار لازم يكون معك في كل طلعة
وهذا اللي اتذكرة هالحين واذا ذكرت شي ثاني قلت لك .
مداخله من آخر:.
اذكر اول مرة طعست كنت بلحالي مسوي ثقة
لكن والله قعدت ثلاث ساعات غاطس ماعندي احد
لكن بعدها تعلمت صح
واخذت الدروس حبه حبه
ماخذ مقلب انه سواق
شف انت تعلم في منطقه رملها مهوب واجد يعني على الاطراف واستهبل وطلع اللي براسك فيها
وبعدين مع الايام بتفهم الموتر بتدلي تعرف متى تشب على الموتر ومتى تريحه
وتعرف زحف الموتر وشلون تحكمه
لانه في الرمل ماراح يمشي على اللي تبيه بالسانتي
تراه يزحف كثير
بعدين الفرامل لاتلمسها
تراها تغطس بالموتر غطسات
بعدين كل شي الا الطين
تراه العن شي
يعني انس تطلع
غطست فيه مرة معي جيب ديزل
والا لو كان بنزين كان طفى لان السيارة غطست الى البيبان
وحالتنا حاله
يعني الطين اذا شفته اخرط الريوس
والله فيه بلاوى بس ماتجيك الا اذا قضبت الطارة
والتطعيس تراه فن
يعني مواقف ويبي من يسبقها
مداخله ..من ناحت آخر :.
زين والله اللي عينت مكان افضي اللي بخاطري عن التطعيس والمواتر والتلغيم واللزي منه
المهم بالنسبة للتطعيس هو نوعين تحدي وعادي واصلان مافيه عادي لانه كله مناحس وتحدي ولازم يطلع لك ملقوف ويتحرش فيك قدام خلق الله ومالك الا تدوس بخشم موتره
المهم التحدي انك اطعس بموترك من بطن الطعس اللي هو القاع الين راس الطعس سيده ولاتلف يمين يسار وذا يبيله سلندر غاز وكفرات جرافة وسواق درجة اولى لان باخر الطعس الموتر بطير فيك وهنا السواقة لانك بتجي الطعس وانت تمشي حول ال 120 او اكثر
والنوع الثاني اللي هو العادي مالك الا وارد التويوتا الجديد وخصوصا الستاندر بمكيف واحد ومن دون خطوط على جنبه وركب له كفرات بيلون او 900 والهوا على ال15 وعندك هدرز نغمة تصج اللي حولت وخل جيرك بثنين وطعس وانت مرتاح ولاتنسى الدبل الصغير شغال طبعا
اقول احد بيتحدى سباق وموتري تويوتا ستاندر 2000 بس بشرطين اول شي من دون فتح الكبوت والثاني مايكون الموتر اللي بيتحداني بورش او فراري يعني من المرسيدس الجديد الستمية وتحت ..
مداخله .,
بالنسبه للمواتر عليك بلاندكروز شاص مقفص واخر دفعه منه كانت 97 هذا أبطر موتر في العالم في وجهة نظري ويسمى عند حقين المقانيص ابو صفيره
اما الونيت تراه خفيف الوزن لكن سنايدي ويعجبك
وفي بالي ان الواحد يقدر
يطعس على خفيف بأي سياره يلقاها لين يحس أنه تعلم زين بس لايغوص في مناطق صعبه خللك يارحمان يارحيم على الحواف وعلى الأجناب حقت الطعوس بعدين شفلك شاص وشف دربك
ولاتنسى لاخذت سياره خفيفه خلّ معك كم جلاله ( زوليه . او سجاده ) عشان لاغرزت تحفر وتحط الزوليه وتطلع سيارتك
والمويه المويه يافالها حط معك في السياره لو انت محترف مدري ايش ماتضمن وش يصيرلك في الطعوس
لاتنسى البوصله تراها مهمه لابغيت تغيّب في الصحرا عشان لاتضيع
هذا اللي في بالي
مداخله :.
فيه اشياء يجب ان نعرفها في البر واشياء يجب ان نستخدمها
الاشياء الى يجب ان نعرفها
اذا كنت في طعوس فستلاحظ ان السيف سيكون باتجاه واحد يوعاده يكون ظهر الطعس شمال والسيف جنوب فعندماتعرف هذه الاشياء ترتاح
الشي الثاني
اماكن شغل الشيولات وحتى لو كانت قديمه ابتعد عنها فهي تكون خطيره ويغرز فيها الموتر بسهوله ومن الصعوبه انه يطلع
ثالثا
لا تتردد وهو شي مهم يعني حدد مسارك بسرعه ولا تتردد ومثال على ذلك انكوانت تطعس ومنطلق فوق الطعوس تلقا قدامك سيفوبعدين تترديد تلف يمين او شمالوالنتيجه انك بتطير من فوق السيف او تمسك فرامل او تغرس او تلف في وقت متاخر وهذا يسبب الانقلاب لا سمح الله فيجب انك بسرعه تحدد مسارك قبل لا يحدث الممنوع
رابعا
اذا غرز موترك
اول شي تسويه ازل ونسم الكفرات على 15 وبعدها امش بسهوله ولا تحفر تراه قديم الى يحفر الان نسم الكفر وامش اما اذا كنت بعيد عن بناشر او ما معك مكينه هوا فانصحك تخلي الهوا على عشرين ولا تمشي على الزفلت خلك محاذي له اذا كانت المسافه كبيره
خامسا
احذن من ان تغرز سيارتك وتحتها عشب ترا احتكاك عمود الدوران بالعشب اليابس يحررق السياره وتشب النار تحتك وانت ما تدري الا والدخان يطلع من السياره ولا تقدر تحركها ولا تقدر تطفيها لان النار تحت السياره وهذا الموقف حصل لي حيث انه غرز موتري فوقرمث واحرك بفعل الاحتكاك واحترقت السياره ولا انتبهت الا والخان معي جوى السياره ولما جيت ابي اطفيها كانت غايصه في التراب من التغريز
سادسا
لا عندما تحب ان تقف فوق طعس مثلا انتبه لا يكون فيه نار او ثار نار ترى تحصل كثير ناس يدفنون النار ولاكن ما تطفى فالحراره كفيله بان تذيب او تشعل اي شي فوقها كبطن السياره مثلا والى فيه التانكي
سابعا
ابتعد عن الغرباء فمثلا تطعس حول مخيمات العوائل احتراما لخصوصيته وثانيا لانك لا تعرف وش في الخيمه يمكن ناس سكرانين او ناس شكاكين يعني يمكن يرمونك وانت منت منتبه لهم وهذي تحصل كثير انت تتمشى وناس يحسبونك تبي عوائلهم ...
ولا زال الموضوع مفتوح للبحث و التقصّي عن الموضوع حتى نكتب موسوعة عن التطعيس و نطبعها و نوزّعها في مناطق التطعيس المعروفة حتى تعم الفائدة .....
[align=center]7
7
7
الصور التي من جد أعجبتني عن التطعيس[/align]
رد مع اقتباس
