[align=center]
استغرب من هـ التناقضات اللي عندنا؟! وعلى قولة عبدالرحمن بن مساعد
ابغى لسؤالي اجوبة ...
ليه البر والتقوى .. مليان في جرايدنا ؟!
وهموم هـ الشارع بعيده عن قصايدنا؟!
يعني مثلا السعوده؟!
طايحين علينا في توظيف (المرأه) وان نص هـ المجتمع معطل وكلام طويل عريض؟! اذا جيت للصدق تلقى اللي قاله او قالته مو مقتنع فيه؟! بس (بليس) كابس عليهم .
الحين انتم ووجيهكم لا قين وظايف للرجال عشان تدورون للحريم؟!
احد قايل لكم اننا في (الهند) الحرمه هي اللي تخطب وتدفع المهور وتأثث البيت؟!
لا ومن زين الطبايع يبون يشغلونهم (مندوبات مبيعات) يدورن في الشوارع. ويشغلونهم سنترالات في البنوك:) لا والبلى تلقى مدرائهم الله لا يوفقهم:) يقولون لازم تكونين مع العميل لبقه؟!
لبقه يعني (مطمطي حكيك) وتميلحي وتغنجي؟!
انا محاتسيكم (جتني ) كم مندوبه مبيعات وآخرتها في رمضان لشركة عطور؟!
لازم تضحك لك؟!
لازم تحط هـ الطيب اللي (يشمه) جدك في قبره؟!
لازم (الميك اب) كامل؟! على قولتهم المندوب لازم يكون حسن المظهر! سلمني على المظهر.
الا المفروض يقولون بدال المظهر ان المندوبه لازم تتمصخر؟!
وبعد شفت والله العظيم في مستشفى كبير في جده. واعتقد ان هـ الشيء موجود في اغلب المستشفيات .وفي قسم الأنتظار في العيادات فيه بنات (شوفتهم من الله عيشه) على قولة الوالده اذا شافت بنت زينه(تبي تخطب لعيالها) ماقصدها شي.
المهم بنات يصبن قهوه؟! يقال لك ضيافه؟
يعني الناس مدام انها معارضه يشتغلون السعوديات مضيفات في الخطوط السعوديه؟! خلوهم مضيفات أرضي:)
بذمتكم شفتوا مصخره اكثر من كذا؟
لا وانا اتميلح ذاك اليوم مودي اخوي الصغير قلت والله قهوتك ماش؟!خفيفه مرره؟
اقول يازيني ساكت.
والشي اللي يجيب لك الضغط والسكر لو ان عمرك 15 سنه محلات الـ(لانجري) ملابس داخليه نسائيه يبيعون فيها رجال؟! وياليت رجال الا شباب واغلبهم عزوبيه؟
وتلقى الواحد فيهم جاي يشتغل(سربته) عشان يبي يكحل ولا يتعرف له على بنات؟!ولا همه الراتب؟! تلقى البدل اللي يلبسها والحلاقه الشبه يوميه اكثر من الراتب اللي ياخذه؟!!! قسم بالله شي (مقزز) لا تحسبون مقزز يعني رافع القزاز.
مقزز يعني شي يحوم الكبد ويجيب القرف.
اجل احد يرضى على اهله انه صاحب المحل يعرف مقاس(السنتيانه) ولا...................... ولا تخيلوا تقول له الحرمه ابي مقاس كذا ويقول لها صغير ولا كبير عليك؟!!!قسم بالله مدري شلون يقولون علينا بلد محافظ.
والله الملابس الداخليه معروووضه للقاصي والداني؟! ولو فيك شوية حيا انت يالرجال تبي تتطلم عشان ماتشوف هالمناظر؟!
واذا جينا لمحلات الذهب90% من روادها حريم ورى مايوظفون الحريم فيها؟!
ياناس صحصحوا مانرفض شغل الحريم ولا في شغلهم عيب؟! العيب والله اننا نشغل الحريم في شغلات رجال ونشغل الرجال في شغلات حريم؟!
بس بعد عني اسأله؟!
ليه تفشل الأسواق النسائيه عندنا؟!
مااعتقد الحريم او الرجال مايبونها؟! بس فيه اسباب؟!
ليه نجحت بس في اماكن الغزل؟! مثل المملكه واسواق الراشد وغيره؟!!
اتمنى من الجميع التفاعل وذكر بعض المواقف والحلول
تعمدت ان اكتب بالعااااميه وسامحونا على اللغط.[/align]
المشاركة الأصلية كتبت بواسطة أمل عبدالعزيز
