[move=right]نصيحه لكم اقطع الاتصال وانسخ الملف واقراه على رواقه علشان نخسر شركة الاتصالات ...نياهاهااههاها[/move]
انصحكم بقراءة الاجزاء الاربعه السابقه على شان تفهمون السالفه من طقطق لسلام عليكم
[line]
وينطلق بنا ابو صيته اللي حتى صيتوه يخب عليه ويجلس يلفلف بنا في الحواري يجي له ساعة ..
أنا : أنت يالحبيب ترى البنزين بيقضى وين بتروح وين مدرعم على الله
ابو صيته : وبعدين معك ما قلت لك ما أبى أسمعك و أنا أسوق أبي أركز ..
أنا : طقني الجوع وأنت تلفلف بنا قسما بالله هذا تعزير مو عقوبة أموت في تفجير ومعك وأنا جوعان ورانا آخرة ما تفهم ياخي لو شاورما مو شرط بالكتشب بعد
ابو صيته : اسكت قلت لك اسكت ولا كلمة الحين يقولوا في شارع العليا وين شارع العليا هذا ...كيف أروح له
أنا : الحين يا ثور أنت وين وشارع العليا وين أنت في الروضة ( شرق الرياض ) خلني أوصف لك ونفتك صدق الموت أهون من الحياة الشقية انا من زرقتني امي من بطنها وانا في شقاء واخرت الشقاء معك ياوجة الغراب المدفون في رماد
ابو صيته : ايه توصف لي ايه قالوا لك غبي علشان تودينا بعيد يا خادم الحكومة يا خادم الكفار
أنا : اها بس مو عيب واحد في عمرك يقول كلام أكبر منه أنت حدك بابا فرحان او برنامج افكار ..السالفة أني كرهت نفسي معك أي والله والله يشهد أني ما صارت تفرق معي إرهابي ميت .المهم افتك منك
ابو صيته : أنا قلت لهم يعطوني جوال يعني بس هم قالوا أنت ميت وش تبي فيه علشان تفضحنا بالشريحة
أنا : إلا سلم لي عليهم مستكثرين عليك الشريحة أنت حدك جوال لعبة ينور لك ويرن و أنت تنبسط ويغني لك اغنية بابا فين
ابو صيته : لا أنا بنزل وبسال واحد وين شارع العليا كيف أروح له
أنا : والله أني جاد خلني أوصف لك ونخلص قسما بالله عليتني ياخي الموت ارحم من مقابل خشمك
وينزل ابو صيته ويروح لبقالة علشان يستفسر عن الوصف ويقفل علي الأبواب و أنا ما أقدر أتحرك من السلاسل اللي مربطيني بها ويرجع للسيارة ومعه ورقة فيها الوصف ..
ابو صيته : الحمدلله عرفنا الوصف يالله حي على الجهاد
أنا : وش جهاده طالعين من الساعة 7 والحين الساعة عشر ..تأخرت على وقت فراشك ترى أمك بتزعل منك إلا أمك تدري وش أنت بتسوي
ابو صيته : أنا رجل وماني محتاج وصاية أحد علي ..ثانيا الصحابة كانوا يجاهدون وهم صغار وش فرقت يعني
أنا : يجاهدون مو يفجرون أنفسهم وفي ناس مسلمين ثانيا هالصحابة الصغار من كانوا يطلعون معه مع الرسول اللهم صلي وسلم عليه ومع الصحابة الكبار مو في سيارة كامري ومسروقه حتى الوصف ما يدلونه مو مع خشتك الى من شافها توقع الدرك الاسفل من النار
ابو صيته : أصلا أنت كافر ولا كان قلت الحقيقة إحنا ما نفجر إلا كفار .. والرسول يقول جزيرة العرب للمسلمين بس
أنا : يا ثور إذا جار الرسول كان يهودي وش تخربط أنت لا تصير مسجل تحفظ الكلام اللي يقال لك ولا تفكر فيه
ابو صيته : اسكت ما أبى اسمع كلمة منك يالله هانت شوي ونستشهد ..
وشوي واحنا ماشين في السيارة وداخلين شارع العليا إلا رحمة الله تنزل علي ويطلع في الشارع تفتيش
ابو صيته : ايش هذا لا ما ينفع ما قالوا لي ايش هاذا تفتيش ..شوف أنت لا تحكي ولا كلمة
أنا : ابشر من عيوني الثنتين بس عساك مجدد الاستمارة ومسوي التأمين و الرخصة اوف مشكلتك الرخصة عاد هم مانعين حتى التراخيص المؤقته يعني مالك عذر ..
ابو صيته : شوف قسما بالله هاه لو تفتح فمك بكلمه لا أكون مفجر السيارة في وقتها هاه فهمت
أنا : أوعدك من صميم قلبي أني ما راح أتكلم ( ايه هين ) ... وفي نفسي أدعي الله أنهم يوقفوننا علشان اصارخ لأني المشكلة ما أقدر أحرك يدي ويوم قربت السيارة من التفتيش قام الشرطي الله لا يعافي أبليس و يأشر لنا نكمل المسير ..وما صدق على الله هالبزر ( ابو صيته ) وكمل وهو يضحك
ابو صيته : شفت الله يحبنا ولا حب ينصرهم علينا نياهاهاهاهاه شفت كيف الله معانا من بيغلبنا ..... اقول لاتضحك ضحكتي لااقوم عليك <<< مربوط نياهاهاهاهاهاها
أنا : انتبه جعلك العمى ..هوووووووووووء طااع ( صدمنا ) في ليموزين
ابو صيته : الله يلعنه ايش هذا ليه ما يعرف يسوق
أنا : جت من الله ,, ايه هو ما يعرف يسوق والدليل انك صادمه من ورى
وينزل راعي الليموزين الباكستاني وهو يهاوش ويزاعق وشوي وتجي الدورية و أقول في نفسي جا الفرج من الله
وهم يتناقشون و أنا في السيارة ما أدري وش يصير
الليموزين : هازا واهد مافي شوف أنا يمسي كويس وهو يزي بومب من ورى
ابو صيته : اسكت يا حضرة الضابط أنا ماشي في دربي وفجأة هو طلع لي في الخط ما قدرت أتفاداه
الشرطي : تتصالحون فيما بينكم ولا كيف يا أخوان
الليموزين : لازم هو يدفع فلوس تسليه هازا بعدين شركة في يخصم علي وكفيل مال أنا يسفرني بلد مال أنا
ابو صيته : ايوة ايوة أنت غلطان لازم ترجع بلد مال أنت ..ليه مافي يعرف يسوق كويس
الشرطي : يا أخوان الله يرضى لي عليكم تتصالحون فيما بينكم ولا كيف
الليموزين : هازا لازم في شركة يزي علشان فلوس تأمين وتسليه سيارة بعدين
ابو صيته : لا ما في يجي أنت غلطان بس شوف علشان أنا إنسان كويس وفي يخاف من الله خلاص أنت روح في سبيلك مابي منك حاجة شوف كيف أنا مرة كويس معاك
الشرطي : يا جماعة الخير تراكم صيفتوا علي .تتصالحون فيما بينكم ولا لا
الليموزين : لا ما في سوله هو لازم مندوب سركة في يجي أول
ابو صيته : لا في صلح وخلاص يا صديق ما صار شي سيارتك ما فيها شي بس الصدام الخلفي شوي انعفط وتكسر بس والله شوي يتصلح يا رفيق
الشرطي : لاحول يا ناس والله لي ساعة معكم تعبت بتتصالحون ولا بتروحون معي للقسم نتفاهم هناك
الليموزين : لازم في يروه بوليس لازم ولا وازد مشكل
الشرطي : يالله تعالوا معي .. لقسم مرور العليا
ابو صيته : يا حضرة الضابط معي واحد مجنون وتونه معطينه حبوب مهدئه ومربطينه في السيارة ويالله مربطينه في السيارة .. وأنا أحاول أصارخ من السيارة بس ما يوصل صوتي .. والشرط صدق أني مجنون
الشرطي : خلاص أول ما تحطه في المستشفى الحقنا للقسم وأنا بأخذ رخصتك لين تجي للقسم
ابو صيته : مات.. معي رخصة أنا قصدي ضايعه قصدي في البيت ..معي بطاقة الأحوال تنفع
الشرطي : يا جماعة ما ودك تتصالحون ...هات بطاقتك ولا تتأخر علينا ترانا في مرور شرق الرياض
ويرجع ابو صيته وهو يرقص فرح ..الله يحبنا شايف كيف الله يحبنا لو الله ما يحبنا كان انكفشنا بس صدقوا أنك مجنون و خلوني أوديك للمستشفى ..ما بقى إلا الخطوة الأخيرة ونوصل للي نبيه
أنا : وش هالحظ ..المشكلة حظك عكس ريحتك هذا اللي يقهر ..
ابو صيته : الحين بقت لنا الإشارة الجايه بعدها نلف يسار وخلاص
أنا : وخلاص ونفترق يا أخي ودي أكذب و أصير مصري و أقول بتوحشني ولا بأفتقدك بس ماش ما يطاوعني لساني
ابو صيته : أنا إن شاء الله رايح للجنة قصر فوق في الفردوس أما أنت والله ما أدري عنك ماش تدخلها ولا لا
وتصير الإشارة خضرا وتو هالبزر بيلف إلا في سيارة جيب مظللة مسرعة جايه من الجهة الثانية ووراها سيارتين شرطة يلاحقونها ويالله يتفاداه مع أني ما توقعته منه و نصير إحنا وسيارة الجيب جنب بعض والشرطتين ورانا
ابو صيته : هذولي أكيد مجاهدين مثلنا لازم نساعدهم
أنا : لا والله مخلص الحين رايح تموت نفسك وتبي تفزع لناس في الدرب أنت ناوي تشنّع فيني ( تشنّع = تبشع وتعذب وتطلق كنوع من التعزير )
ابو صيته : هذولي مجاهدين مثلنا قصدي مثلي أنا بس هاه لحظة بزاحم ( بأحد ) الشرطة الفجرة
أنا : يا ابن الحلال من زين سواقتك يوم تبي تزاحم الناس ولا ناوي تسوي حادث ثاني
ابو صيته : الحين أوريك السواقة الصح بألف على الشرطة وأخليهم يخشون في عواميد الكهرب ... ويلف أبو الشباب ..ويضربون له الشرطة بواري ويكبسون .ويطلع خوينا ذروق ( ذروق = خواف مثل الدجاجة تنحاش من صوت القطوة ) .. ويرجع يلف الجهة الثانية وتقوم الدورية الثانية تضرب له بوري وتكبس ..ويرتبك وما دريت إلا السيارة صارت فوق وخشينا إحنا في عواميد الكهرب والحمدلله كنا رابطين حزام الأمان ولا نتقنا ( نتق ينتق ينط لا شعوريا ولا أراديا ) من قزاز السيارة والدوريات تركونا وكملوا مطاردتهم
أنا : عمى عمى الله لا يعافيك وش سويت فينا اشهد بالله إن الموت أهون من الحياة الشقية .
ابو صيته : الكفار الكفار شفت ايش عملوا فينا ..ويلهم من الله شوفت ( شفت بس بلهجتهم ) كيف عملوا فينا
أنا : هم وش دخلهم في ثوارتك ..بعد هم اللي قالوا تتفلسف وأنت ما تعرف تسوق
ابو صيته : المهم يالله نلحق على المجمع ونخلص مهمتنا ما بدنا نتأخر أكثر
أنا : اللي يسمعك يقول يبينا نخلص بسرعة علشان نسري لبيوتنا تراك رايح تنتحر تعرف وش معنى تنتحر
ابو صيته : أنا رايح استشهد مو انتحر الانتحار للكفار مو لنا ماشي تفهم شي كلام هذا لا تعيده
أنا : أفتيت يا سيادة المفتي ..طيب المفتي حقنا يقول هذا تخريب وانتحار ويعتبر من الإفساد وش رد سعادتكم
ابو صيته : هذولي علماء دولة اللي يسمونهم علماء السلاطين باعوا ضمايرهم من أجل فلوس السلطان
أنا : وش السلطان شايفنا في عمان .اسمه الملك والأمراء ..طيب الزبدة يعني رأيك نسحب عليهم سيفون ونتبع شيوخكم صح ليه ما ينطنطون على اسرائيل وعندكم فيهم لا تخلون فيهم ذرة وشف من بيقول لكم شي
ابو صيته : لا تغير الموضوع إحنا مسلمين غصبا عنكم ومجاهدين ضد حكومتكم الكافرة ..فاهم
صوت غريب ... تبون فزعة يا شباب ... سالمين سالمين حديد حديد ما في إصابات إن شاء الله ..الشباب دافيين أبيض ولا عرق ( ابيض = مخدرات ,عرق = خمر محلي )
ابو صيته : أنت مين هاه مين أنت ايش تبغى اعترف ..ترى معي متفجرات بأفجر الحي كله ابعد
الرجال : محاتسيك ( اللي يتكلم معك الآن ) أبو زيد اشهر سواق أوتوبيسات في الرياض خط البلدة . عساكم سالمين
ابو صيته : أنت كذاب أنت شكلك مع الشرطة ابعد ولا فجرتك ابعد
الرجال : تهبا يا ذا الوجه أثرك مو راعي حشيمة إذا معك متفجرات معي في السيارة عجرا أكسر رأسك بها
أنا : يا أبو زيد جزاك الله خير بس شكلك ما استوعبت هالبزر للاسف معه متفجرات لو فجرها تخسف بالحي كله إن تطلع المنطقة كلها آبار ارتوازية
الرجال : تهبا أنت و اياه الحين أدق على زيد يجيب ربعه والله نرضرض عظامكم الحين يالسلق موقف الأوتوبيس باب رزقي وأبى أساعدكم أن كنتم رجال أطلعوا من السيارة ولا الحين أطلع لكم أكسرها فوق روسكم
أنا : لا واللي يرحم والديك لا تحط عقلك بعقله .هو صدق ماله عقل بس السلاح بيد الغشيم يجرح ابعد عنه
الرجال : لا أبى أشوف وش وراه ولا بس كلام من بعيد ووقت الجد دجاجة تبيض
ابو صيته : إن كنت راجل اقترب هيا اقترب هاه والله أفجرك أوديك النار على طول
أنا : أنت انطم وش توديه النار معكم صكوك الآخرة يا أبو زيد بصراحة مدري من وين تفهم أنت بس الحاصل أن هذا إرهابي فهمت إرهابي
الرجال : وشو من التسعة طعش ( 19 تنطق كذا ) يا وجه الله آسف آسف والله طال عمرك ..أنا ترى ما أقصد شي والله وينحاش ويترك أوتوبيسه وهو يصارخ إرهابيين بيفجرون المكان انحاشوا والهنود من الأوتوبيس والناس تبدا تصارخ وكلها 3 دقائق وتمتلي المنطقة كلها سيارات مرور وتحاصرنا ..وميكرفونات
والى اللقاء مع الحلقه الاخيره من سالفتي سالفه وشوفو ايش يصير معي
الحانوتي المتربطاتي
رد مع اقتباس
