[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
على طاري عيونك لو سمحتي فسّري المجهول=عيونك ليه تبحر بي وتبعدني عن افكاري
عيونك اقسم بربي تشرّد عالمي المأهول=وتاخذني بعيد هناك عن ربعي وعن داري
أنا لو كنت ابيع ( اللول ) وادري نظرتك لي ( لول )=لصير لنظرة عيونك انا البايع وانا الشاري
تداري داخل عيوني عسى عين الحسود تزول=انا من يوم ما شفتك وانا داخلك متداري
أخاف إن البشر تفنى ,, وإذا ماتوا من المسؤول=يقولون المرض يمكن ,, واقول إلا وانا داري
أنا داري ذبحتيهم بهمسة حكيك المعسول=ولو يدري بك القاضي ,, حكم لك سجنٍ اجباري
أنا وأنتي تناسبنا قضية ( قاتل ومقتول )=قتيلٍ ما اعرفوا موته ,, رغم إن البحث جاري
حقيقة فعل مع فاعل ,, نصب من بعده المفعول=كشفت الفعل والمفعول ,, وصار الفاعل اسراري
إلا منك رفعتي الرمش جيت من الوله أسطول=وإلا منك تبسمتي ,, نخيت الفكر واشعاري
وإلا منك نطقتي اسمي ,, وقفت من الحكي مذهول=وتر صوتك يداعبني يحرّك نغمة اوتاري
وإلا منك سألتيني علامك !! ,, مدري ويش اقول=خذيني صمت في عيونك ,, نهاية كل مشواري
تعديتي جمال الناس ,,, وحزتي زين لا معقول=كأن الزين قدامك غدى في الظل متواري
( وفاء الخل ) و ( العنقاء ) وثالث مستحيل ( الغول )=ورابعها تراه انتي يحفظك ربي الباري
عطيتك كل أيامي من ( اغسطس ) إلى ( أيلول )=مدامك شهري الثالث عشر تفداك واختاري
خطوط العرض في قلبي تساوت مع خطوط الطول=وصار الوقت متساوي إلا من جيت لك ساري
شغلتيني بنظراتك ,, وصرت التايه المشغول=وانا في ذمتي قبلك محد قد حرّك أسواري
أدوّر للغلا قصه ,, وأدوّر للغرام حلول=عيونك أسئلة قلبي ,, وانا لعيونك القاري
وأدوّر للوله ليله ,,, عسى ليل القصيد يطول= وأدوّر للسحاب اللي يسيّل ميت أنهاري
معك كل النظر يحلا معك كل العيون تجول=تبين الصدق سميتك كذا ( ريموت انظاري )
معك كل الشعر يطرب معك كل الحكي مهبول=معك قلبي يصيح اليوم ( أحبك يا اجمل اقداري )
ثناياك الجميلة مثل لون الثلج في اسطنبول=لمحت الثلج في ثغرك وذاب القلب من ناري
ذكرت عيون تجذبني وقلت افسّر المجهول=وجيتك يا بعد عمري مدام عيونك الطاري[/poem]
رد مع اقتباس
