[poem=font="Simplified Arabic,4,darkred,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
هيضني البارق اللي لاح وقت الغروب = والغيمة اللي سواد الليل خيّالها
تمشي على مهلها ريمٍ تخاف الهبوب = تخشى يطير الشعر ما يمسكه شالها
حتى اعترضها سنا برقٍ غريرٍ لعوب = يلعب بسيفه يغازل همّه اشغالها
تركض ويركض وراها مثل ذيبٍ قنوب = ضاقت وصاحت برعدٍ تنخي خيالها
وقامت تعبّر وتصرخ اتعبتها الدروب = لولا البرَد ما تركها البرق في حالها
يا غيمة السعد هلّي واغسلي للذنوب = ياعلّ تصحى ضماير طـال مقيالها
خلّي خيالي يغوص ولا يهاب الغبوب= يرسم امل في شفاه الصمت لاجيالها
اسرج حصان القوافي وانطلق للخطوب = الحرف سيفي وفكري درع باهوالها
متعلقٍ في خيوطٍ من سراب كذوب = يوم امرست وصفقت بي ضاع مدهالها
ابحث عن الفجر الاعرج في صحارا القلوب= يالله دخيلك تلولس بين اسمالها
قررت حبس الخيال وكل فكر مْحسوب = واطلقت خيل الشعر في الحب تجوالها
ياحب وينك ترى في الحب مااقدر اتوب= فالروح تشكي فراقٍ الروح واهمالها
يا زين ذيك الليالي والخواطر تجوب = والحب يجمع شتات قلوب بوصالها
تذوب فيني وانا في شهد ريقك اذوب = واقطف ورودك وفلّك والثم هلالها
البدر يكسف إذا شافك يقول مْحجوب = وتسري نجوم السماء تبكي على اطلالها
وترقص خزامى الصحاري للغزال الطروب= ياليل ياليل طوّل ..غنّي موّالها
ويا فجر ليتك تأخر لين وقت الغروب= فالحب ناره كفايه تشعل ادلالها
فنجال واحد ينسّيني طريق الجنوب = فنجالٍ ثاني يفك رموز ارسالها
فنجال ثالث اسافر مع خفايا الغيوب = وارجع إلى الفكرة اللي كنت رحّالها
الله على الحب لا منّه سكن في القلوب = يروي عروقٍ ظمايا يحي اوصالها[/poem]
رد مع اقتباس
