السلام عليكم ورحمة الله
ببراءة الأطفال قال لي أبني دحومي
بابا من هو ماجد عبدالله ووش قصته مع النصر
صراحة ماعرفت وش اقول له لأن ماجد عبدالله فوق الوصف واخاف اني اقول له الصدق ويجي بعدي مدرس دحومي بالمدرسة ويلحس مخة
قلت له هذا لاعب وبيترك الكورة
قال لي طيب يلعب مع مين قلت له يلعب مع النصر ومع المنتخب
قال لي طيب انا ماعمري شفته يلعب
قلت هذي سالفه طويلة هو من حبه لسامي حلف مايسوي اعتزاله إلا بعد سامي الجابر , ويمكن غيرة لاعبين
قال طيب ماقد شفت له اهداف
قلت حرام عليك ياوليدي
ماجد جايب 3 أهداف في بطولتين كاس الامم الاسيوية 84/88
منها هدف خرافي في الصين اللي محتكرة كل بطولات اسيا إلا كورة القدم للرجال ماعمرهم حققوا شي , وكان الهدف الوحيد لان هدف شايع مايحسب وبهذا الهدف اخذنا كاس اسيا, وكان بيزيد حصيلته من الاهداف في كاس اسيا 88 لكنه للاسف ضيع بلنتيين .
قال طيب ما جاب اهداف بكاس العالم
قلت له ما جاب ولا قول للاسف لكن حقق له انجاز شخصي بكاس العالم وهذا الانجاز ماحققه اي لاعب سعودي لانه مالمس الكورة 39 دقيقة ويكفيه فخر انه لعب بكاس العالم, وغير كذا لو ما انطرد قدام الامارات كان ما مثلت الامارات العرب وشرفتهم في كاس العالم .
قال طيب وكاس الخليج او العرب ؟؟؟
قلت هذا هداف الخليج كان يحط اهداف في قطر وعمان والبحرين وما كان يحب يجيب اهداف في العراق والكويت , ومن يوم ترك الكورة وبدا يحلل بالقنوات ويوجه اللعيبة جبنا بطولة الخليج مرتين وكاس العرب .
قال طيب يابابا ليه مهتمين فيه وهو ماسوى شي
صراحة زعلت من كلته وقلت له
ليه ماسوى شيء , محد ينسى انه من اسباب تاهلنا للاولمبياد وهي اهم من كاس العالم وكافح كفاح الابطال قدام المانيا وانصكينا 7/0 وسنتر سبع مرات وكافح قدام البرازيل وجاب هدف وانصكينا 3/1 وبعد ماجد ماسجل احد في البرازيل إلا مرزوق العتيبي وسجل هدفين .
قال طيب يابابا كم جاب هدف
قلت له والله مدري ياوليدي لكن يقولون خمس مية ويمكن اكثر واللي حاسبها اخو ماجد وفي ذمته
قال طيب اللي يجيب 500 هدف اكيد انه لاعب
قلت له مهو شرط اول كانوا يلعبون بالدوري في العصر وبعد العشا ونص اللعيبة حافين وكانت المباريات تنتهي عشرة صفر وخمس طعش صفر , وغير كذا اول يعتمدون على راس الحربة وكل الكور له هو لحاله أذكر أن يوسف الثنيان يشوت الكورة براس ماجد وتجي هدف .
وهذا اللي كان مضيع منتخبنا لانهم اذا راقبوا ماجد محد يسجل لكن بعد ما تغير نظام اللعب وصار فيه راس حربة ثاني والغوا الاجنحة وصار فيه وسط مهاجم تقدمت الكورة في بلدنا وحققنا بطولات ما كنا نحلم فيها واكبر دليل انه لعب سامي جنب فؤاد وسعيد العويران والهريفي ومسعد وصارت الكورة على مسماها لعبة جماعية
قال يابابا اخر سؤال
يقولون في المدرسة انهم قايلين لماجد مانسوي لك اعتزال لين تفك الدنبوشي اللي انت مسويه للنصر .
قلت الله يهديك ياولدي لاتصدق الدنابيش والخرابيط النصر كان مشغول بماجد وبطولات ماجد وانجازات ماجد ولانه صعب تسوي نجم من لاشي فهم ضيعوا وقتهم في هالموضوع ويوم سامي سوى حفل اعتزاله قالوا الان لازم نخلي ماجد مثل سامي ونسوي له حفل .
والمفروض اي واحد لعب في المنتخب ان الاتحاد السعودي هو اول من يكرمه ويتكفل بحفل اعتزاله .
رد مع اقتباس
