معوكس
البعض مع الأسف (حاط) رجله بدون (بريك) ويتكلم عن نظام الخصخصة وكيف أنه رايح ينقذ أنديتنا من الانفلات وزنقة المال وتسوّل أعضاء الشرف ليل نهار، أيضاً بعضهم ما شاء الله عنده استعداد (يبربر) عن هذا النظام ويفتي لك عبر الصحف والتلفزيون وما يتكلم إلا بالملايين وإذا طلبت منه وشلون نطبق الخصخصة يرفع (بوزه) وقام يراعي للجوال (بعد اذنكم جاني اتصال) عشان يضيع الموضوع وجاب سالفة جديدة.. اللي حارقن دم قلبي انه حتى سواقنا صار ينظِّر في نظام الخصخصة وكيف أنه حسب لهجته العربية المكسرة يقول (فيه فلوس كثير.. بعدين هذا إدارة شطب على أعضاء شرف) يا ناس استحوا على وجيهكم الرياضة والمجالات الأخرى صار يحلل فيها الولد والشايب والبنت والعجوز وحارس العمارة والسواق والفاضي ويمكن الخادمة بعد من كثرة جلوسها عند (حريمنا) اللي مازل يطالب بعضهن بدخول الملاعب بدل الدخول في الجامعات والحصول على الشهادات العليا.. لا ومن حب الموضات كل وحدة معها 3جوالات (مستعملة) بدون شرائح.. عشان تقهر صديقتها وتلقاها مصيفة عند أجدادها في أحد محافظاتنا اللي ما به خدمات وإذا جت زميلاتها قالت أبوي ودانا (تباريس) قصدها باريس.. المهم نعود للخصخصة ونقول كبروا المخدات لين يصحونكم من النوم ويحطون النظام على السفرة ، تبون الصدق واصلوا ولا تقومون لانه رايح يصير زي نظام الاحتراف اللي بس يوقع اللاعب والمدرب على (المخالصة) وما تدري الا وهو هاجم على الإدارة بخطاب شكوى.
@ الأستاذ معوكس...
وش هالاحتفالية الاتحادية بطلال المشعل تصدق توقعت أنهم جابوا بطولة
برجس الرشيدي - بريدة
- لا تستغرب كلها أيام ويقضبونه طريق القهوجي وخالد مسعد وخل هالاحتفال ينفعه!
@ الأخ معوكس .. المحترم
من يحب ياسر القحطاني يمتلك مليون تبرير، ومن يكره القناص لا يملك إلا الحبر والورق. هذا ما قالته جماهير الزعيم دوماً؟
متعب صويان - الرياض
- روعتن قلت يمكن مليون يورو.. ترى الأقساط هبلت بي؟
@ عزيزي أبو المعاكسين
من هو أقرب الأصدقاء إلى نفسك والذي تبدي له أسرارك
حميد الأشرم - طبرجل
- هالزمان لا تطلع أسرارك وعش بسلام والا تحمل ما يجيك!
@ إليك يا معوكس وأقول فيه متى تبدأ الخصخصة والانتخابات في الأندية؟
- مشهور القنيعان - بريدة
- إذا تم افتتاح أكاديمية (أتي البرشا) في جدة!
@ أستاذ معوكس...
ماني مصدق أن فيه سعوديين ودهم يتوقف ياسر القحطاني من الاتحاد الآسيوي؟
جميل السويدي - حائل
- في زمن الولاء لمن يدفع لازم تصدق والا ترى يطالبون ابن همام بايقافك!
@ تحياتي لك يا ابوالعواكيس
ممكن تعطينا رأيك في الاستقالات بالأندية وأقصد أعضاء الإدارات؟
خالد المفضي - الدمام
- ما رايح يروحون بعيد هالسنة إقالة والموسم الجاي يقنعونهم يكملون النصاب.
@ أستاذ الكل معوكس..
من هو لاعبك المفضل وبماذا تنصحه؟
نومان البريك - بقعاء
- حمود الفشقة قبل ينتقل للدوري الأوروبي ويتطاقون عليه الارسنال وبرشلونة!
@ صديقي معوكس..
لو عرضوا عليك المشاركة في برنامج شاعر المليون هل ستشارك؟
شامخ العويرضي - الطائف
- ماعندي مانع خصوصاً أن أم العيال شاعرة وتسلفني كم قصيدة أشخص بها أمام الحضور والمشاهدين!
@ أستاذ الأساتذة معوكس..
ألا تتفق معي أن الإعلام ظلم برونو وأن هذا اللاعب سيكون له شأن كبير؟
ساير الشمري - حفر الباطن
- أشوف العروض انكبت عليه وأبو مديد موزيها عنه تعب من الاستقبال والتوديع!
@ حبيب الكل معوكس
يا أخي نورتنا يوم الاثنين بزاويتك الرائعة وكلامك الكبير عن بعض الإداريين واصل يا بوالعواكيس
عزيز الحربي - المدينة المنورة
- يا بلادي واصلي والله معاك واصلي!
@ الأخ معوكس
أجمل تحية لك ولصديقك صياد وش رأيك بطلال المشعل الصبح ينفي وبالليل يوقع للاتحاد؟
أسامة شفلوت - أبها
- على باله يبي يوهق الحراس وهق بعض الناس
@ الأخ معوكس .. المحترم
النصر يطالب اعتماد 19بطولة في سجله، هل يعقل ذلك يوجد له هذي البطولات يمكن تكون بطولات تنشيطية أو رمضانية؟
متعب الشمري
- يا عمي في زمن المعقب الكحلي كل شي جائز!
رد مع اقتباس
