[align=center]يا طيبين السلامه اليوم في هذا الحلقة من قصص ( روما كمبني ) راح نتكلم بكل اريحيه " حلو يا مثقف " عن موضوع الضيف اللي جانا في نصايف الليل .( يعني بعد الساعة 12 والناس ارقود ) .
المهم نبدأ بسرد القصة التي هي في مجملها صدق ( نصااااااااااب ) المهم في يوم غائم ربيعي والاجواء تنسنس علينا بنسيمها العليل المحملة بالاتربة والغبار دق جرس الباب وانا ما بعد نمت علشاني ذيب عيون ساهره للبيت ما ارقد لين يذن الفجر احوس وادوس في البيت وافكك واركب افياش وغير مسامير كل شي اسويه بس في الليل المهم يوم دق الباب رحت افتح الباب الا ذاك الرجال الاشعث الاغبر الازرق الاشهب المترب المغبر ( احسبه حفار قبور ) وين يا ابو الشباب وش عندك تالي الليل قال ابوك فيه قلت لا عند الجيران ... اكيد فيه يعني وين هو فيه بس نايم قال قم اركض ثوره ( يعني ايقضه من النوم ) قلت يا الحبيب الناس رقود وين اثوره تبيه يشب فيني قال اقولك قم ثوره لا اطب في بطنك ... قلت وين يا عمي ( بطني بركة سباحة علشان تطب فيها ) قلت طيب اقلط ( يعني تفضل بالجلوس في ردهة الصالون ) المهم زرقت واقوم ابوي والقاء ( الشاكوش" ابوي " ) نايم قلت بصوت طفولي عذب ( بابا ) فيه واحد يبيك الرجال ساحب مسوي نفسه ثقيل في النوم علشان ما يقوم المهم واكرر عليه السالفه يا بابا .. بابا .. بابا وهو يلتفت علي وفي يده الساعه الخراش وهو يخمني به من قو الخمة دقة عيوني على الساعة ( ثنعش وثلث) تقول ساعة (بينج بونج ) حقت لندن بس عادي ابوي ( انا ومالي ملك ابي ) المهم قال وجع وش فيك سكران ماكل حبوب محشش .. قلت يا عمي وش هذا الكلام والله ما عرف السكر ولا الحبوب .. حدي حبوب الكيرم اجمعها للعيال في الملحق علشان اللعب قال طيب وش عندك قلت فيه واحد ( اشهب ):( يحبه قلبك موديل 2004 يبيك تحت قال وش ذا موتر وكاله قلت ضيف قال ضيف اعوذ بالله وش عنده ( اللهم اجعله خير ) .. ايهاب توفيق على غفله .. قلت قم البس وانزل له هذا هو جالس في ردهة الصالون المهم نزل الشاكوش له وقابله اثرهم معرفه قديمه ( الشباب ايام الطواقي الزري والفنايل العلاق والخنافس والثوب ابو 4 ازره ) حراكات شباب الماضي مو مثلنا رايحين فيها نواعم المهم ويقوم الشاكوش ( ابوي ) قال ازرق لبو عليان ورح لحوش الغنم حقهم واخذ لنا ذبيحه قلت يا بابا وش ذبيحه الفجر بيذن وانت تقول ذبيحه قل رح ( لافلقك - يعني لاشج راسك - ) بالطفاية قلت يا بابا خلنا نجيب للرجال فطور ( بيض عيون – طحينيه – اسكلوب – كورسون – كورنتو - ) قال بالله عليك هذا اكل ولا ايش قلت هذا تصبيره لين تخلص الذبيحه ونقدمها (( للقطو )) اللي جاني اكيد لازم يكون قطو فيه احد بياكل لحم الساعة 3 الفجر ، المهم زرقت لحوش ابو عليان وهناك كانت المفاجئة دخلت مخيم الغنم وادور الصبي ( المدير التنفيذي للاغنام ) واثاريه ابو الشباب زارق للمخيم اللي جنبهم علشان ابناء جنسه مسوين بارتي ( حفل ) واطقع ما يشوف ( يعني ما همه ) من ابو عليان والغنم هي مره في العمر هذي الحفله يحلفون ما يضيعها ، المهم احوس وادوس ابي احد يفكني من هذي المشكله ، المهم قلت ما بدهاش يا ابو عتب ( نزلت طيارة من الجو في الحلقة السابقه ) الان بتعجز عن اختطاف خروف غر اعذل ، المهم واقوم اشمر عن ساعدي وادخل الحوش بخطاء ثابته وقوام ممشوق يعني تراني ماخذ واحد فيكم ماخذ واحد فيكم بس الرجال اللي يقرب والله .. واشوف لك ذيك الخروفه صابغه راسها ( هاي لايت ) ومصبغة اضفارها ولابسه بودي وحاطه عطر ( دوتشي فيتا ) المهم وانا اتقربها ( يعني اقترب من الفريسه لا اخضاعها وارغامها على الخروج معي ) ، المهم وانا امسكها وهي تقوم تصايح وتقول لا تكفي فكني توني صغيره ما بعد شفت دنيا يا مجرم يا قصاب يا وحش وانا كاني ما اعرف اتكلم معها عربي والتفت عليها واقول بتعقلين ولا بدل ما نحطك ( مفطح بنقلبها مضغوط ) اعقلي با بنت المهم كسرت خاطري البنت تعرفون وين هي رايحه معي رايحه للقصاب المهم القلب قاسي ماعندي انا يمامه ارحميني ( يخلف الله علي امي اللي جابتني ) المهم والتفت على الخروفات الباقيات قلت لهم اذا وصل مديركم التنفيذي قول له اني اخذت وحده معي ما يمديني اكمل الكلمه اللي ذيك ( النطحه ) اللي بغت تقضي علي اثاريه هذا الخطيب الحبيب حقها ( من حقده نطحني ) الا والدعوة عندي مختبصه ما ادري وين انا فيه من قو النطحه صار فوق راسي ( عصافير تزقزق وتلف وتدور ) ، المهم وانا التفت عليه قلت وش فيك ياخي ما تشوف عساك العمى اللي يطسس يعيونك ( يطسس تعني يفقع ) قال لي الا انت وش اللي فيك ماخذ حياتي قلت بعد عودنا فيه انت ووجهك اللي كنه ( فتحت شاحن جوال نوكيا n90 ) لك حياة جعل حياتك نهايتها على يدي قال ايه هذي وش تبي فيها قلت عندنا ضيف وودنا نعشيه منها قال طيب على كبر الحوش ما لقيت غيرها انا بقولك شي بس بشرط تفك حبيبتي من هذا الموضوع تكفا انا طالبك طلب ويقوم يحب راسي ويسلم على خشمي قلت له يطب انثبر وعلمني وين البديل قال تعال خل اول شي البنت تروح وانا اعلمك قلت لها يا ماما روحي المهم راحت البنت واجلس مع التيس الكبير ( ريحته فاقعه سبدي ) صدق من قال صنان تيس فعال وقوي المهم قال شف يالحبيب شفت هذا اللي ماسك مجله قاعد يقرأ وحاط في فمه عود برسيم قلت ليه أيه وش فيه قال هذا هو طلبك كل المواصفات فيه ( شعر راهي ولحم وافي ) وصغير في السن بس لا يهمك النظاره اللي لابسها يسوي فيها نفسه مثقفه رح تله بكراعه ( الكراع يعني اسفل القدم ويطلق عليه في الكثير من البلدان العرقوب ) وحطه في الصندوق المهم وانا اتسحب خلسه واطمر على ظهره واللكمه كم لكمه لين داخ واشيله على كتفي واذبه في صندوق السيارة وادق سلف للقصاب تعرفون القصابين يرقدون عند البيبان متعودين على السعوديين ظيوفهم واجد وفي اوقات ما احد يتخيلها ( اللهم لك الحمد ) المهم واخذ ابو الشباب للقصاب والمسكين يوم عرف ان يوم ازف عطاني وصيته قال لا تفتحها لين يخلص مني القصاب ويكرتني في الكرتون قلت له تم .. المهم يوم خلص القصاب منه فتحت الوصيه ( وهي عبارة عن شنطة صغيرة ماركة فيندي ) ولقيت فيها نظارته الدائريه وقلم باركر ورساله مضمونها ( من الذبيح للتيس النطوح .. ستصلك رسالتي مع ابو عتب فلا تعتب عليه .. خلصت الحبيبه من قبضته واوقعتني في ضربته … فلا تستغرب ان يومك قادم .. مثل ضربتك له في المقادم ) وكتب هذا البيت :-
خلف غصن الشوك
وقدامي الجمر .. كيف امر
تركت امري لاصحاب الامر
المهم ضاق صدري وبكيت شوي ( بكااااااااااااااش ) المهم اخذت الذبيحه ودزيت للبيت لقيت الضيف يمسح على بطنه ينتظرني بفارغ الصبر قلت له ما فيه اكل الا بعد صلاة الفجر لا تقعد تتمسح وتحك جلمدك ( الجلمد يعني الرقبة من الخلف ) قال ايه طيب ( ولد اللذين يسلك لي ) ، المهم و بعد صلاة الفجر كل شي خالص وتم تقديم الوجبه للضيف خفيف الظل واكلنا ودغينا بهذا الخروف الجميل صاحب الرسالة المؤلمة والحمد لله تكللت مهمتي بالنجاح والاهم من ذلك شكرني ابي كثيراً واثنى علي وقال لي ( انت يا بني ولد عاقل تعرف كل شي ) فهذي هي مهمتك في المرات القادمة . بدوري انا فرحت كثيراً وقمت وسلمت على راس ابي ودعيت له بطولة العمر ثم نطق الضيف بقوله ( ان والدك قد انجب ولداً بار ) مهب عاقل سيبويه .
ما يستفاد من القصة
1 – لا يضيق صدرك من طارق الباب ليلاً .
2 – لا تخاف من المهام التي توكل اليك في حالة هجوم ضيف .
3 – اتبع النصائح ممن هم اكبر سناً من الاغنام لانه هو من اختار لي تلك الذبيحه ( يسلم لي والله ) .
4 – يجب التعرف عن انواع الاغنام وكيفية التعامل معها حتى لا تقع في اخطاء مماثلة كما وقعت انا فيها .
5 - اكرام الضيف واجب في احلك الامور واصعب الاوقات .
وسلامتكم
حقوق النصب محفوظه
روما كمبني ليمتد[/align]
رد مع اقتباس
![الصورة الرمزية ][ عبدالعزيز ][](image.php?u=78171&dateline=1208124844 "الصورة الرمزية ][ عبدالعزيز ][")
