خذاك غيري ؟ لكن الروح وياك
ماتبعدك عن روح مغليك حاجه !
خذاك غيري ؟ مو عذر كيف بنساك
ما انساك لو تصعب دروب التواجه !
طالت مشاوير الحزن جعل ممشاك
يبعدك عن درب الحزن وانزعاجه !
غبت وتركت اللي من الهم ناداك
يافلان ياطب الخفوق وعلاجه !
وينك رخصت الكون كله ابي ارضاك
وينك متى يترك خفوقك مزاجه !
كل اتجاهاتي ظلامٍ بلياك
كن الحزن زايد بجوفي نتاجه !
ياوين الاقي لي شبيه لمزاياك
وطلتك تشفي خافقي وانعواجه !
ماني بطالب غير قربك مع رضاك
ودونك ترى فرحي معقد حجاجه !
ارجع جعل منهو يعاديك يفداك
غيرك ابد ماني بمحتاج حاجه !