[grade="000000 000000 000000 000000 000000"]اول شي كل عام وانتم بخير وعيدكم مبارك ..بمناسبة ارقاة الدماء واكل اللحوم والشحوم ..
زي منتم عارفين الحين كل واحد لاقط بزارينة واخوانة ودوجان في سوق الغنم والماشية والواقفة .. كل واحد يبي خروف وش زينة ويتميلح فية عند ام عيالة انة يعرف يشتري[/grade] .
[grade="0000FF 0000FF 0000FF 0000FF 0000FF"]ابقولكم سالفتي يوم رحت انا وابوي سوق الدبش . قال ابوي ياشرقاوي قلت لبية قال امش معي خل نروح ندور ضحية لوالدينا عشان نذبحها بكرة ونفطر على كبدتها عاد اهم شي عند ابوي الكبدة ... قلت سم مشينا ركبنا الصالون الازرق ومفتحين الدرايش وطايرين وكلن منا فاتح كشرتة للثاني . يوم اقبلنا على السوق قام ابوي وقفل الدريشة لا شعوريا . والتفت يمى بعين حمراء بصراحة شكيت في نفسي اني مسوى شي . مع اني ماتغديت والا افطرت ابد على العشاء الى تعشيتة البارح شورمة بالمخلل .. الا يوم دخل يدة حدر المرتبة وانا الى ارتعت قلت وش بيسوي اكيد بيطلع شي ويضربني فية . وانا الى قامت ضروسي تقرقع على بعض واقول في نفسي واللة ماسويتها .. الا يوم سحب غرشة طيب وقام يبخبخ في الصالون الا يوم انكتمت من الريحة واللة يالريحة الاولة ابرك من الى بخها .. عطر من سنة جدتي وطاقتة الشمس ولا بعد من الى يحطونة على مغاسل قصور الافراح ..
مادرينا الا كل واحد صاقع راسة في السقف عاد دريت انا وصلنا سوق الغنم .. اللة واكبر الا امة محمد مجتمعين وداقين اللطمة مدري عشان مايعرفون بعض والا من الجو الى هم عايشين فية .. وانا الى اسوي بغترتي كذا وكذا وخليت مايطلع الاعيوني وشوية من خشمي عشان اتنفس منة .. قلت ابوي وين تبينا نبدا منا والا مناك قام ولف براسة يمين ويسار كنة يدور القبلة من وين .. قال الا مناك حاس ان ضحيتنا تحترينا قلت مشينا على بركة اللة ومن حوش في حوش تقول ناس رايحة تخطب ويدورن الزين [/grade]..
[grade="FF0000 FF0000 FF0000 FF0000 FF0000"]قلت يايبة اخلص علينا كلها ذبيحة وانت اشغلتنا عليها قال اسكت ساكت لوة ترنق بتشترية لك ماخليت شارع ولا سكة الا درت فيها .. قلت شف هذا الهندي خل ندخل حوشة .. قال ياللة خل ندرعم ودرعمنا ... ومن العجلة كلن منا صقع كتفة مع الثاني . وانا جالس ادور براسي وكل خروف مدنق براسة وخايف اقولة اطلع انت والى عاض على براطمة والى جالس يحك نفسة في الشبك عشان نقول عنة وسخ ولاينفع وجربان .. الا يوم سحبني ابوي وراء شوي وتقدم احسب اني في صلاة وكثروا الجماعة .. قام ابوي وهو هايج على الخرفان ويمشي ويلمس فيهم من وراء وعلى ظهورهم وكل واحد يقول في نفسة ترظاها على نفسك وعلى عيالك .. انا قلت واللة ابوي مهوب بسيط وانا الى توقعتة عاقل ولاهو راعى الحركات هذي .. يوم خلص ولا حصل شي يسوي مد يدة لى وقال شم قلت ليش قال اقول شم يوم شميت يدة الا فية ريحة غريبة ريحة عطر وش زينة قلت يبة فية ريحة حلوة في يدك قال واللة قلت عني تراني راعى عطورات من يومني صغير وصديقات امي اذا شافوني يحبحبوني ويقولون وش حليلة ... ماندري منهو طالع علية .. قلت فية خروف مظبوط بس وينة وقمت وصفطت ثوبي على نص بطني واتنحنح واقول ياولد وامشي في الحوش وانا رافع خشمي فوق . الا وشوف ذاك الى جالس في الزاوية ومستحي وانا الى اقرب منة شوي شوي الا قام يقول براسة كذا وكذا ( يعني كنة يقول مهوب انا ولاتوهقني) قلت اهين واحط وجهي بوجهة ماعاد باقي الا كل واحد يبوس الثاني بوسة من زين النفس .. الا يوم اخذت نفس عميق وطلعتة بشويش وهو يطالعني ومدنق راسة قلت يالملعون انت راعي العطر امش امش معي وهو معيي واجرة مع قرونة واقول ابوي امسك الخروف الى بيطلق وجهك بكرة قدام امي واخواني .. واقوم اركب فوق الخروف وابوي يلمسة من وراء ويتاكد انة مفحوص . والاهوب راعي كذا وكذا .. قال ابوي توكلنا على اللة هذي ضحيتنا ....[/grade]
[grade="000000 000000 000000 000000 000000"]ركبنا الصالون ومشغلين اغنية( ياسارية خبريني ) وكلن منا يتهزهز ومبسوط وابو الشباب الى وراء جالس يصايح حاس قلبية انها اخر ليلة لة .. قال ابوي وش رايك نكلم امك عشان نشوف وين نحط الخروف فية لين بكرة .. قلت ياللة .. طلع الجوال وقام ودق على امي . امي هلا ابو شرقاوي بشر شريتوا قال افا عليك مع غمزة وهو ملتفت على الدريشة مايبيني اشوفة .. قال وشذا صوتة الى عندك قالت اسن السكاكين لبكرة قال بعدي يالتخمة يم الزين كلة . اقول وين تبين نحط الخروف في سور بيتنا . قالت اهااا بس تبي تخيسنا وتروع بنيتنا . خلة في مزرعة خوالى مع خرفانهم . قلت سمي يم شرقاوي . وهو الى يعفط الطارة الا انا جاي في حظنة من قوة لفتة . حطينا الخروف في الحوش مع ابناء جلدتة وانا اهمس في اذنة ترا الوعد بكرة . وهو يقول براسة ابشر ..
يوم اصبحنا وصلينا . وكلن منا لبس ثوب النوم المخطط . رحنا يم خروفنا وندورة الا ماليقناة موجود وقام ابوي يصفق بيدة احسب عبداللة الجمعان جاب هدف .. الا وشوفة منسدح الارض واجيك طاير واقعد اهزهز فية الا مايتحرك الظاهر انة بلع لسانة من كثر الصياح ملعون الجدف . وجلست اطالع ابوي وهو يطلعني ويقول هذا الى اخترتة اللة لايبارك فيك ولا في اليوم الى اخذتك معي فية ..
يالربع وش السوات الحين مع ابوي علموني [/grade]
رد مع اقتباس
شرقاوي هذا صايرن لي بالضبط 
اتطمش ..
