مساكم الله بالخير كلن باسمه
والله يا جماعة الخير اني مستحن منكم وانا اضيف ذا الموضوع
ما شالله اشوف الطبخات الللي عندي (بروستد ربيان )( ودجاج دكسي بالباربكيو )(وكعكة شوقلاطه) ومن هالاكلات الطيبه
فقلت يا ولد يا فاهم
وش انت تعرف تسوي
قلت والله اعرف ابربسلي كبسه بس انها تطلع ما عليها تنوكل :)
لذلك هذي نصيحه للشباب اللي ما يعرف يطبخ كبسه تعال اعلمك وشلون تنطبخ
1 - قطع الدجاج والا اللحم عاد انت وذوقك...و قطع بصل اللي الله يقدرك عليه يعني بصلتين ثلاث وان كانكم مجموعه واجده ست سبع (عاد انت قس ) وكثرة البصل مهيب تضر بس مهوب تملالي القدر بصل وتقعد الاذاك تدعي علي ...فانتبه
2 - احمسه في زيت الين ما تشوف انه احمر وبدا يتغير لون البصل ...
3- هالحين كبلك صلصه بالمقدار اللي تبي بس لا تكثر يعني علبه والا علبتين همن كب عليه الدجاج وزد عليه مويه الى ثلاث ارباع القدر تقريبا
4- حط ملح ولا تكثر يعني حط شوي وذق حط شوي وذق الين ما تطلع المرقه مالحه شوي ( يعني ما يصلح تنشرب مرق من زود الملوحه يعني ) ولا تكب الملح كب وحط مها بهارات وحركات وكل ما شفتا شين عندك في الدولاب كبه في الرز :)
5 - غط القدر واصبرله نص ساعه ان كانه دجاج وان كانه لحم الله يعينك على الصبر يعني اذا اوفيتلك ربع ساعه رح شف اللحمه هي لانت والا لا
عاد اذا صار حاشي اهيييييييه يبيلك تصبر صبر ايوب الين ما تستوي اللحمه :)
6- بعد كذا طلع الرز واغسله على مقدار الشخص (وغالبا اذا كانو كل الشله شباب كل شخص عن كاس ) وكب الرز على البرابيس اللي انت سويتها قبل شوي
7- اصبر للرز حدود ثلث ساعه وتكون النار عليه خفيفه اين ما يتشرب الرز المرق
8- جبلك ملاس وانسبلك في بلم (وااللي في الجدر يطلعه الملاس )<== على قول اخواننا الكويتيين
9- بعد ما غرفت الرز في بلم كله بالهنا والعافيه بس تكفى لا تدعي علي :)