[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
اقدم لكم هالقصيده تعبر عن نفسها
.
.
يالله تجلي كل همٍ صار في قلب مهموم=ياللي تعرف العله اللي بالصدر واسبابها
كن الرحى في وسط قلبي يدرج له كم يوم=يلوي عروق القلب والاضلاع زاد احدابها
ماعاد نرضى بالمجامل لو يجي حب الخشوم=والهرجه اللي نستحي منها نبي نبدابها
كله سبايب بعض ناسٍ ضيعوا كل السلوم=ضاعت علوم اهل الوفا ضاعت وصكوا بابها
والمشكله لا صاروا الجهال من نسل القروم=الله يعوضهم بخيرٍ في نهار حسابها
الضحكه اللي وسط قلب اصحابها تخفي سموم=وانته ليا قفيت في ظهرك يدق نصابها
لا بوه لابو صحبته لو كان شيخ يقود قوم=يانعنبوها من صداقه ويش عاد ابغابها
لن كان جا مني ردى ياجعلها لي ماتدوم=جعل المنيه ياعرب يشتالني مخلابها
اشفق على شوفت هل الطالات قاضين اللزوم=اللي ليا جات العلوم يثبتون اطنابها
اهل الكرم والجود واهل الطيب في كل العلوم=اللي يعزون اللحى ويكرمون اشنابها
وختامها يالله تزيل اللي بقلبي من هموم=ياللي تعرف العله اللي بالصدر واسبابها
وصلاة ربي عد مالاحت بروقٍ في غيوم=على النبي المصطفى خير الرسايل جابها
.
. وسلامتكم
محمد منصور الروقي[/poem]
رد مع اقتباس
المشاركة الأصلية كتبت بواسطة محمد منصور الروقي
