السلام عليكم
كم بيت في الوالد الله يغفرله .. وحبيت اطرحها بين يديكم ..
ياكبر شوقي يابو محمد من اول ليلة
وش بسوي لا غدت فرقاك عني جمعة
صابر وراضي وحملي ماعجزت اشيله
غير همك يالفراق الي جفته الرجعه
من صباح الله وانا ادفع عبرتي بالحيله
لين جاني فالمسى شيٍ يهل الدمعه
اجتمع شمل الضنى وعيوني تراعيله
المح اشباهك واشوف وجيهم مجتمعه
اجتمعنا كل منا حزنه مقديله
من رحلت وضيقتي في وسط جوفي شمعه
تتقد ماترفق بجوفي ولا تاويله
ما تطفيها مواساة العزى والجَمْعَه
رحت في دربك ودربك كلنا ماضيله
ماقطعك الله ابدعيلك وغيري سبعه
والثمان سهام ليلٍ زايدات الكيله
يالفقيد انكان سمعك ما سمعنا فـ ارعه
رح فمان الله وعفو الغافر وتسهيله
رح عسى الميعاد ميعاد النبي وربعه
اللهم صل على محمد