فالبدايه هذي اول مشاركه لي في المنتدى اللي دخلته فالبدايه كزائر لكن فالحقيقه اعجبني بكل مافيه وحبيت اني انزل قصايدي فيه اللي اتمنى انها ترقى لذائقتكم وحبيت اصافحكم بالقصيده هذي ولكم شكري وتقديري
لونك تصدق بحرفك كتبته حرفك المزعوم
ولونك تصدق بوصفك وصفتك وانت قدامي
ولونك عارفن طبعي عرفت ان الرجال عزوم
ولونك صادق بحلمك حلمت الحلم باحلامي
ولكن جيتني كذبه تصحي خافقي من نوم
لون لي خافقن جيته ورحت ولابعد نامي
اخذ منك همومن لك ورحت ولاعليك هموم
سقاك اعذب قراح الماء قبل تشكي انا ضامي
عطاك ادفى الحنان وانت جيته ماعليك هدوم
لزمك بكل حالاتك ولا مجبر بالالزامي
انا من حطك بعينه وجندلك رموش سهوم
ولكنك عميت العين برموشي وبسهامي
وانا اللي حطك بقلبه ولكن صرتله جاثوم
تجي مثل الخيال اللي وقع صدقه على اوهامي
انا المعطي وانا الفاقد وانا المعطى وانا المحروم
وانا اللي شاري ايامك وانا اللي بايع ايامي
انا اللي مارفع نفسه عليك وقال انا من قوم
وانا صدق الشعور اللي تحلى بطبع الاسلامي
علامك ترسم البسمه وتخفي نابك المسموم
ورا شفاتن وراها ثلج بعده جمرك الحامي
عطاك الله عيونن دعج وشفاه وخصر مرسوم
وشعرن منتثر ليله سواده مصدر الهامي
بك اوصاف وعليك رسوم انشهد ياعليك رسوم
كانك رسمتي بيدي ومن حبري وبقلامي
رسمتك تحفتن فاقت خيالي وانتظرت تروم
على بروازك الاجمل عيون وتحتها لثامي
وشلت بنفسك البرواز وقلت تدوم قلت تدوم
ولكن ماقدرت تدوم ياجرحي والآمي
كذبت وعشت بي كذبة غرام بحرفك المزعوم
واثر حرفك مهو حرفك لون الوصف قدامي
حبيبي قلتلك كلمه ترا طبع الرجال عزوم
ولونك كنت لي صادق حلمتك يول احلامي
رد مع اقتباس
