ليالي رمضان والحلقة الاولى مع .. [ ابو عبدالرحمن ]

[ناعمة]

[align=center]بسم الله الرحمن الرحيم

/

بعد ماطرحنا الفكره وابداء الاراء فيها

تم الترشيح << ملعوزها الترشيح

والتصويت ان نبدأ بــ قائدنا

ابو حمني







/


وقلنا لازم ندق عليه بيجر علشان ناخذ موعد للقاء

المنسق والمعد للبرنامج



المنسق للبرنامج :الو .. حي الله ابو حمني
ابو عبدالرحمن :حياااك الله
كيف حالك
المنسق :الحمدلله تمام
بعد اذنك نبي نستضيفك ببرنامجنا برمضان متى يكون وقتك مروق لنا بس مو اليوم اذا مشغول..
ابو عبدالرحمن :خليني على اخر رمضان مع اجازة المدارس
المنسق : لاياخوي
ابو عبدالرحمن : طيب ممكن الحين
المنسق: نكون ممنونين لك
ابو عبدالرحمن : معي ساعتين اقدر اركز معكم
من بكره ببدا ابيع تحاضير وبيكون تواجدي للنت نادر
المنسق :ههههههههههههههههه بتفتح بسطه مساويك
ابو عبدالرحمن: ههههههههههههههههه معليش وقتي بعد اليوم شبه نادر على النت
المنسق : خلاص ننتظر باخر الطلعة تحصل استديو غرابيل

وجلسنا ننتظر ابو حمني لمده سويعات لكن يستاهل الانتظار
ثم وصل بكل ود الى الاستديو
ورحب فيه المنسق وجابه حد مكانه


وهذي مقدمة البرنامج .. ناعمة .. ومعها بسمة امل لكن حصلت لها ضروف تمنعها من تواجدها الليلة

ناعمة : حي الله بو حمني بقولك قبل مانبدأ تصوير

====

برنامجنا هو مايلي دردشه مع ضيوفنا
يعني وش يومك برمضان العصر والفطور والعشاءالى السحور
ومانبي رسميات ابد
يعني خذ راحتك بالسوالف مره

ابو عبدالرحمن : برنامجي اليومي دوام ونوم وفطور وطاش ماطاش وتراويح واستراحة وقران للسحور
ناعمة :ههههههههههههههههههه ليه عجل الله يهديك
ابو عبدالرحمن :هههههههههههههههههه باختصار
ناعمة : مابعد بدينا
ابو عبدالرحمن :طيب ابدي وانا بجاوب

ناعمة
يامخرجنا وينه مخرجنا
الكميرا الخلفيه
والاماميه
والجانبيات
كولوا 100%

ياسلام عليك يامخرج



المخرج : 3
2
1

ابدأ

==========

ناعمة : السلام عليكم ورحمة وبركاته
اسعد الله ايامك بكل خير ومسرات
افطار شهي باذن الله

حيوا معي ضيفنا الغالي وهو اول ضيف يشرفنا في برنامجنا الرمضاني

حياك الباري [blink]ابو عبدالرحمن[/blink]
ابو عبدالرحمن : وعليكم السلام ورحمة الله وبركاته والله يحيكم
ناعمة : كيف الحال وكيف اول يوم صيام معك
ابو عبدالرحمن :الحمد لله , وهالسنة حر بزيادة المفروض يعطونا اجازة رمضان بالكامل
ناعمة: بسم الله افطر الحين قبل ماتقول اجازة ههههههههههه
ابو عبدالرحمن : ههههههههههههههههههههههههه هههه
ناعمة : خبرنا عن يومك بعيد عن المدارس .. كالعادة برمضان وين تفضل فطورك .. بالبيت او برا البيت ؟يعني عند ابوك او اخوانك
ابو عبدالرحمن :انا وابوي جيران , اذا قمت قبل الفطور افطرت عنده واذا قمت مع الاذان افطرت على السرير
ناعمة :ههههههههههههه الله يخليك الوالد
يعني ماتدخل المطبخ مع الأهل ؟
اشوف واسمع كثر من الشباب يدخلون المطبخ برمضان << دقق على الشباب
هل انت منهم ؟ او لك وجه نظر اخرى

ناعمة :قولنا هل تدخل المطبخ للمساعدة في التحضيرات ؟

ابو عبدالرحمن :صراحة ادخل المطبخ بعد التراويح اذا طقني الجوع , وادور بقايا السنمبوسة واجهز عليها
ناعمة :والله شيء طيب مافي كلفة منوووب
وبعد الفطور وش روتينك الرمضاني ؟
ابو عبدالرحمن :صراحة مجمع القنوات اللي فيها كاميرا خفية جنب بعض واطمر من قناة لقناة وفاتح خط ساخن بالجوال مع كم واحد يعلموني وين احسن قناة فيها شي يستاهل اني اتابعه
ناعمة: هههههههههه
اكيد حاط سعود ومازن بالقائمة للجوال
طيب ماعلينا
تحب يكون العشاء قبل او بعد صلاة التراويح ؟
ابو عبدالرحمن :أي عشا ؟
انا ماعندي عشا فطور واحد من الاذان للاقامة
ماعندنا نظام اكثر من سفرة نهائيا
ناعمة:يعني مافي عشاء نهائي الين السحر تجلسون بدون اكل
ابوعبدالرحمن :ايه من الفطور للسحور واحيان لقمة خفيفه بعد 12 بالليل
ناعمة: والله نظام حلو مريح لاهل البيت
وليت من يسمع منكم وياخذ
بعد الترويح .. وين تروح هل لأهلك او لأصدقائك .. ؟
ابو عبدالرحمن :اروح للاستراحة سباحة وكورة وانترنت للساعة 12
ناعمة :اها يعني الوقت كله بالاستراحه
حلو
طيب متى السحور مادام مافي عشاء << بلشت في بطونكم ؟:11sted_re
ابوعبدالرحمن :هههههههههههههههههههههههه� �ههههههههههه
السحور قبل الاذان بنصف ساعة يادوب اغسل يدي واتوضى لصلاة الفجر
ناعمة : ماشاء الله عليكم والله من جد متبعين السنة
هذا بالنسبه ليومك تقريبا برمضان
طيب خبرنا شوي عن المدرسه لان اشوفك معصب من البداية عليها :خجل:
ابو عبدالرحمن : والله المدرسة مشكلة , العام داومت يوم واحد بس وباقي الايام غايب
وقبل العام داومت اسبوع
هالسنة شكلي ماني مداوم نهائيا
ناعمة :طيب هل بنظرك حل اننا مانداوم ونطالب بالاجازة
ابو عبدالرحمن :والله اذا اخذنا اجازة مانحس اننا انجزنا شي
عشان كذا لازم نغيب ونحس بطعم رمضان
ناعمة :الله يعين وياكم من جد هو تعب على المعلمين والموظفين
ونتأمل ان تكون هناك مكرمه ملكية كما عهدناها من قبل
ابو عبدالرحمن :امين يارب وعلى العموم مكرمتي ماخذها من راتبي يعني ان ماجت باخذ راتب العيد وطاير ثلاث ارباعه
ناعمة :عطني موقف طريف مر بك برمضان ؟
ههههههههههههههههههه الظاهر بايعها بايعها
موقف الله لا يهينك
ابو عبدالرحمن :العام داومت يوم واحد لان فيه تفتيش بالمدرسة , وجيت ونمت بغرفتي ولاقمت إلا قبل المغرب وسببت قلق بالبيت
ناعمة :هههههههههههههههههه يؤ اجل انا لوماصار فيه مكرمة حنا بنعطيك مكرمه
موقف مضحك وانت صايم ومالك نفس
ابو عبدالرحمن :امممممممممم
مرة وانا في الثانوية استاذنت من المدرس وقلت له بروح اشرب ورحت شربت لين دخت ورجعت جلست ويوم جلست تذكرت اني صايم واننا برمضان وقلت للجنبي اني رحت شربت قال والله اني احسبك تستهبل على الاستاذ
ناعمة :هههههههههههههههههههههههه� �هههههه








[/align]

[ناعمة]

وصلنا الى بريد البرنامج

هذة الابيات





ونقول لشاعرنا .. صح قلبك مليون ولا يكفي

[ناعمة]

ناعمة :هههههههههههههههههههههههه� �ههههههه
طيب الاستاذ ليه ماقالك شيء
ابو عبدالرحمن :يحسب اني استهبل عليه وبعدين الاستاذ هذا خبل
ناعمة :الله يشافيه يارب بس كيف خلوه يدرس ؟
ابو عبدالرحمن :يدرسنا علم نفس وعلم اجتماع
ناعمة :اها الله يكافينا الشر
ابو عبدالرحمن :مرة ماحضر عنده احد غيري ومع كذا وقفني يوم ماجاوبت وشرشحني وخلاني اوقف في اخر الصف
ناعمة :ههههههههههههههههههههههه ليه فيه احد غيرك متابع معه من يوقفك
ابو عبدالرحمن :دخل علينا المدير وهو يكتب على الصبورة وانا واقف في اخر الصف وقال له وين الباقين وانت تكتب لمين ووش عند العتيبي واقف هناك رد عليه بكلمة وحده ما انساها لين اموت : هذا عقاب تأديبي لانه يضحك لحاله مثل المجنون
وحقق معي المدير ليه تضحك قلت له انا لحالي بالفصل وجلس يسمع لي الكتاب من الاول ويوم اخطيت وقفني غصب اضحك وهو موقفني وماعنده غيري
ناعمة :ياربي ههههههههههههههههههههههههه ه
ابو عبدالرحمن :ويوم ضحكت قال لي رح وقف في اخر الصف اشوى انه ماطردني
ناعمة :كان طردتك وارتاح وارتحت معه
ابو عبدالرحمن :والله انه كتب على الصبورة لين داخ شكله متحسف على اللي كتبه لو طردني مهو لاقي احد يشرح له ويوم جاوبت معه قال لي تعال اجلس
ناعمة :هههههههههههه ولو فيه خير
اهم شيء نجحت عنده ؟
ابو عبدالرحمن :طبعا الطلاب ما يحضرون عنده لاننا في ثانوية مطورة وهو مايسجل حضور وغياب بس انا ماعندي احد يوديني البيت وصايم ولافيني شده اطلع من عند المكيف عشان اجلس في الشمس لحالي
ناعمة :والمسجد ؟ << تعطيك حلولها
ابو عبدالرحمن :المسجد مصلى بوسط المدرسة يفرشونه ويشيلونه في ثانوية الابناء بالرياض
على فكرة
اخذت مادة اختيارة في الجامعة في كلية الاداب ومن يوم جلست والطلاب يقولون دكتور خبل ويوم دخل علينا وشفته بغيت انهبل , لا وبعد جاني يسلم علي ويحضني قدام الطلاب شوي ويبكي , وكانت اخر مره اشوفه فيها ونجحت بممتاز
فشلني يقولون لي الطلاب اكيد انه يقرب لك هههههههههههههههههههههه
ناعمة :هههههههههههههههههههههههه� �هههه شفت وقوفك باخر الصف ماراح هدر
طيب .. في اول ليله رمضانية .. سعد الأب ماذا يحنو اليه في الصبا .. ومالذي يتمناه بمستقبله .. ؟
ابو عبدالرحمن : رمضان دائما مرتبط بالطفولة وبالايام الحلوة , ايام يكون فيها الشخص اقرب لله ويتمنى ان الجو الروحاني اللي يعيشه برمضان يستمر معه طوال العام
ناعمة :صدقت اجواء روحانيه
وش اكثر اكله تفضلها على مائدة الافطار ؟
ابو عبدالرحمن : انا مدمن سنبوسة مع شوربة احس لها مزاج مثل الشاني مع البرنقز
ناعمة :ياعينيييييي على المسكه االعنيفه
من جدك سعد
ابو عبدالرحمن :هههههههههههههه جربيه وبتصدقيني
ناعمة :شاني وبرنقز .. هذا صداع .. الله لا يقوله
ههههههههههههههههههه
ابو عبدالرحمن :ههههههههههههه افا
ناعمة: من جدك او تمزح هههههههههه
ومشروبك على الفطور ؟
ابو عبدالرحمن :فمتو طعم اللقاء
ناعمة :بكل تاكيد
طيب نظامك لغرابيل ذي السنه مادام بتعطل معي .. ههههههههههههه
متى بيكون تواجدك لغرابيل
ابو عبدالرحمن :بالعادة اتواجد بفترات متقطعة من بعد التراويح الى الفجر
لاني اقرا كتب على جهاز الكمبيوتر
ناعمة :حلو وقت تواجد الاعضاء
طيب .. تجاوز عدد المنسوبين لـ غرابيل اكثر من 80 الف عضو .. شعورك بالعدد الذي يزداد والله الحمد كل يوم ؟
ابو عبدالرحمن : الحمد لله هذا العدد كان بدون اعلانات او دعاية في أي موقع والتسجيل اليوم حوالي خمسين عضو وهذا مصدر سعادة لي ان اعضاء غرابيل هم انفسهم ينقلون صورة جيدة للمنتدى لبقية مستخدمي الانترنت
ناعمة : هل تطمح باكيثر من ذلك ؟
ابو عبدالرحمن :اطمح للكيف وليس الكم , وغاية طموحي ان يستفيد كل من يسجل وينظم لعضوية غرابيل
ناعمة :وهذا مانسعى له دوما ودائما .. اللهم اجعل كل مانعمله ومانخطه خالصا لوجه الله
طيب .. اخر ابيات نظمتها لنا ؟
ابو عبدالرحمن

[poem=font="Andalus,6,darkred,bold,normal" bkcolor="transparent" bkimage="" border="none,4,white" type=0 line=0 align=center use=ex num="0,black"]
وضعك لحالك بين معشر جيلك = مثل القمر وسط السماء متعلي
إن كان ما اكتب لك شعر واهدي لك = من غيرك اهديه القصايد قلي
وإن كان ما أسهر في غرامي ليلك = اترك حكايات الغرام احسن لي
وإن كان ظنك بتركك يا حليلك = أرقد وأمن في الغلا يا خلي[/poem]


ناعمة :الله الله .. صح لسانك
ابو عبدالرحمن :صح بدنك
ناعمة: تسلم
كلمه اخيره باللقاء
ابو عبدالرحمن : أول شيء أقول لأعضاء غرابيل تقبل الله صيامكم وقيامكم
واوصيهم ونفسي باستثمار هذه الفرصة التي لاندري هل ستعود لنا أم لا




ناعمة : وختاماً .. يعطيك العافية على سعه صدرك ومنحنا الفرصة للقاء معك
وشكراً لك

ونهاية حلقتنا نشكر كل من تابعنا
وانتظرونا مع ضيوف اخرين

[align=left]تحية .. فريق العمل [/align]

[سمووره]

نعومه وبسومه
الله يعطيكم العافيه يارب
لقاء رائع مع إنسان رائع
الف شكر وننتظر البقيه لا خلا ولا عدم منكم يالغاليات

[أبـو نـدى]

[glow1=00FF00] الأختان /ناعمة& بسمة أمل[/glow1]
الله يعطيكم العافية

[grade="00008B FF6347 008000 4B0082"]جهد رائع ومميز جدا[/grade]

لكما مني الشكر والتقدير

[ريما2007]

ناعمة

مشكوورة حبيبتي على هالموضوع الرائع

ننتظر الحلقة الثانية

[بـنـت الـشـيـوخ]

نعومة يعطيك العافية .. ودمتِ بـــ خير.

[نور حياتي]

ناعمه

تسلمين ع الطرح الرائعه

ابو عبد الرحمن

ماننحرم ان شاء الله من هالطلـــــه

[ناعمة]

نعومه وبسومه
الله يعطيكم العافيه يارب
لقاء رائع مع إنسان رائع
الف شكر وننتظر البقيه لا خلا ولا عدم منكم يالغاليات

/

سمورة الغالية
تسلمين على المرور

\
كونوا بخير

[ناعمة]

[glow1=00FF00] الأختان /ناعمة& بسمة أمل[/glow1]
الله يعطيكم العافية

[grade="00008B FF6347 008000 4B0082"]جهد رائع ومميز جدا[/grade]

لكما مني الشكر والتقدير

/
ابو ندى
العفو اخوي

\
كونوا بخير

[لــيــل]

( نعــــومـــة ).....و( بسمة امــــل )......


لقاء جداً ممتع.......


وجهد اكثر من رائع.......وتشكران عليه كثيراً.......


وموضوع مميّز جداً........


وهذا ماعهدناه منكما.......


بارك الله فيكما وفي جهودكما........


وجزاكما الله خيراً على اللقاء الخفيف جداً.......


دمتما بودّ.......


وتحيّةٌ معطّرةٌ بالورد........

[ناعمة]

/
ريما2007
منورة
\
كونوا بخير

[ناعمة]

نعومة يعطيك العافية .. ودمتِ بـــ خير.

/
بنت الشيوخ
العفو قلبي
:اموه:

\
كونوا بخير

[ناعمة]

ناعمه

تسلمين ع الطرح الرائعه

ابو عبد الرحمن

ماننحرم ان شاء الله من هالطلـــــه

/
نور حياتي
تسلمين على تواجدك


\
كونوا بخير

[ناعمة]

( نعــــومـــة ).....و( بسمة امــــل )......


لقاء جداً ممتع.......


وجهد اكثر من رائع.......وتشكران عليه كثيراً.......


وموضوع مميّز جداً........


وهذا ماعهدناه منكما.......


بارك الله فيكما وفي جهودكما........


وجزاكما الله خيراً على اللقاء الخفيف جداً.......


دمتما بودّ.......


وتحيّةٌ معطّرةٌ بالورد........

/
ليل
تواجدك وحظورك يسعدني


\
كونوا بخير