الــــــــــــSــسلاااااا� �ااااام عليكم ..
قمت من النوم مفزوع على صوت سيارة اسعاف وانا اتحسس جسمي وقول عسى ماجاني شي واناظر من طاقة غرقتي و القى ولد الجيران مجروح طالع من بيتهم وشايل في يده قطوتة المصونة وهو يمسح على راسها ويقولها تقومين بالسلامه ياروحي الظاهر انها حاامل وبيسوون لها عملية قيصرية ..
و توجهت لدورة المياة وانا قمة في الحزن يوم تذكرت ام جدتي كيف ماتت يوم جابت جدتي فوق طعس ولا اسعاف ولا بطيخ حتى جدتي يوم طلعت تقولها قبل لاتموتين يايمة روحي خمي بيت الشعر تراي ماانيب فاضيتن لك انتي ورجلك <-- ماراحت بعيد الله بلاها فيني ..
وانا افرش اسناني اللي كنهم طقة شياب جالسين على الرصيف ويقشمون حب جلست اطالع وجهي واقول رب كما حسنت خلقي بكسر الميم وضم النون حسن خلقي بفتح الياء المنونه شوي الا جااني كف على وجهي والتفت اشوف شبيهي اللي بالمراية يقول هذا الدعاء ماهوب لك هذا للزيون ضحكت ضحكة ذات مغزى وانا اسمع امي تقول يااحلى ولد في الدنيا قلت لشبيهي في المراية سمعت ! رد علي بتفلة وقال عجزت وانا اعلمك كل يوم القرد بعين امه وفي روايه حبيبته غزال ..
رحت وانا اقول امااااااه لبيك يااماااه امري تدللي عيوني وقلبي وكبدي وبنكرياسي كلها فدوه لعيونك ردت وهي تقول ياجعلي مانحرم من هالخشة اللي كنها بومة متوحمة بفار ياجعل يومك قبل يومي عشان تودي اخوانك المدرسة تأخرو اليوم ..
طلعت من البيت كالعادة وشغلت السيارة والتفت يميني لا مومعقول شي غير طبيعي انتابتني رعشة وانا اطالع والتفت بسرعة واسوي نفسي ماطالعت شي من هول المنظر وجلست استرق النظر ولازال الوضع على حاله تجرأت وحطيت عيني بعينها <-- بنت الجيران راكبة مع السواق وتبحلق فيه ...
واحط عيني بعينها ولانزلت عينها وانا اقول يارب وش هالبلوى الحين هذي بنت جيرانا يعني عيب اسوي لها شي واطالع بمراية السيارة واطالع شبيهي ويقبلني بتفلة ياغبي البنت تطالع معجبة فيك رح رقمها ..
واجلس في حرب نفسية التفت مالتفت عليها وانزل اخذ وردة من الحديقة اللي برى البيت والبنت تطالع فيني على بالها بعطيها الوردة واركب السيارة وانا افر الوردة في يدي واشم ريحتها والبنت زاادت نظرتها لي وكااني اشوف الانكسار في عيونها يوم ماعطيتها وجه وانا اقول الثقل زين ياالطير ..
رحت وصلت اخواني المدرسه ورجعت واستلقيت على فراشي وانا اقول ياربي وش اسوي في هالبلوى المشكلة اخوانها يخوفون اخااف اسوي شي يمردغون خشتي ويساوون بوجهي درج بيتنا واصير آخر عمري عتبه على باب بيتنا ..
ترن ترن جرس التلفون يررن وانا اقول من متى تلفوني يدق هالوقت ولا يمكن بنت جيراانا طلعت الرقم وتبي تكلمني وارفع السماعه وانا متردد شوية الا قال وصلك اهداء مسجل من الاهدائات والأغاني وافز من الفرحة لين صقع راسي بالسقف وانا اقول اخس ياالطير والله لك معجبات ..
وجلست اسمع الاهداء الى اخر قطرة وانا اقول حب زواج اولاد <-- على وجهة المسكين
ومع مرور يوم بعد يوم صارت توصلني اهدائات يومياً وبنت الجيران كل يوم اطلع الصبح تناظرني بشغف وانا اقول ياربي وش اسوي مع هالبنت وكل يوم انواع الكشخة يوم جزمة وردية ويوم حمرى ويوم صفرى <-- حتى العقال صرت البس الوان .....
وكل يوم نظرات الاعجااب من بنت الجيران تزيد واحس بالشوق في عيونها وانا كل يوم وجهي يتعكف قبل لا اركب السيارة ..
ومرة من المرات وانا راكب السيارة لمحتها فتحت دريشة السيارة وذبت شي مانتبهت له فتحت الباب ورحت اركض وياوجهي كنه جني مستعجل والقف ذذاك القرطاس اللي ذبته فاذا بي اجد كلنكسس ووصخ بعد انواع القرف ولانكسار وارفع خشتي لها واكلمها وانا اقولها حافظي على نظافة حارتنا <-- عاش مصرف .....
ضاعت كل امالي هباء منثور وباءت كل محاولاتي في التميلح بالفشل وقررت ذاك اليوم اني احسم الأمر لأن الحب بديت احس فييه يخترق الحجاب الحاجز بديت احس بشي غريب ..
قررت اني اكلمها واقولها يابنت انا ادري انك معجبه فيني ولازم تاخذين الرقم طلع الصباح وانا اسير بخطوات مثقلة للامام وخطوتين للوراء طلعت من باب البيت واشوف بنت الجيران ونظرتها المعهودة المليئة بالاعجاب والحب ورحت لين عند ناذفتها وطقيت عليها النافذة وانا اقول ادخل <-- وين فتحت النافذة ونظرات الاعجاب كلها انقلبت حدة وجفاء وهي تقول خير قلت لها سمعي بلاخير بلابطيخ انا ادري انك مفتونة فيني ومعجبه بجمالي ولازم انا اراعي مشاعرك واعطيك الرقم لاني عذبتك بثقلي ..
وماهي الا لحظات ويطلع اخوها من الباب وهو يقول افا وانا ولد ابوي تكلم اختي قلت له والله هي اللي كل يوم تطالع فيني وشكلها تحبني <-- يبي يوهق البنت .....
التفت البنت على اخوها وهي تقول اييه انا كنت اطلع فيه لانه يذكرني بكاضم الساااااهر في أغنيتة حافية القدمين ..
و من عقب ذاك اليوووووم و أنا أركن سيارة بعيد عن البيت علشان ما أشوفها و لا تشوفني ..
باااااااااااااااااايو ..