اليوم بقولكم سالفة واقعية وصدقية وحقيقية << صدقوه يا الربع
رحت للمستشفى علشان اتبرع بالدم لقريبي ( طبعاً أنا فصيلة دمي مميزة وهي vib + )
طبعا كما معروف عن مستشفياتنا ما فيها اللي يملا العين ,, كلها حقل تجارب في الضعوف ,, ولو تبي اي قسم تقعد ساعة حتى تلقاه إلا قسم التبرع بالدم مكتوب كذ
ا ( هنا تتبرع بدمك )
أنا قريت هاللوحة وقلت : زين اللي ما كتبوا ( هنا تتبرع بالدم جعلك الفقر خخخخخخ )
ودخلت قسم التبرع بالدم ,, ولقيت واحد لابس نظارات وش كبرها ( كنه آنسة مينشين اللي مع سالي ) حتى إنهم يدلعونه ( بيتر خخخخخ )
شاااايب ,, وعمره فوووق الستين ,,, وباين عليه عنده ثقافة فلبينيه من كثر ما يشوف السساتر ( جمع سستر ) ,, واحس إنه مظلوم في بيته ,, ومهوب ماخذ فرصته خخخخخخ ,,, ومعقد بشكل غير طبيعي اكثر من تعقييد سلم الرواتب لموظفي الحكومة ..
الموووووووهم ..
يوم شافني ,, داخل عليه وكني غزال ( ما شاء الله علي ) ,,
قال وش عندك يا ابو الشباب << راعي ددسن 85 مهوب في مستشفى
قلت : أبد طال عمرك ابي بريال خبز ( طبعا قلتها في نفسي ) .. جاي اتبرع بالدم
قال : من الحين اعلمك ترى ما فيه إجازة لأنك جاي بعد الظهر .
قلت : شرهتك على اللي داوم من ثلاث أيام ,, الله يخلي أبو فيصل << لا يروح تفكيركم بعيد ترى اقصد مديرنا
قال : هات يدك
وعطيته رجلي خخخخخخخخ وعطيته يدي
وأنا أقول وش هالشديد اللي ما ينطق له اصبع
يوم شفته يقيس الضغط والنبض كنت اقول الله يستر ,, ألين شفته حاط السماعات على رقبته وانا اللي أغسل يدي وامد كراعي وانسدح دريت إن ما عندي أحد ,,
قال : أنت ما أفطرت ؟
قلت : لا ,, ليه ,, ضغطي منخفض ؟
قال : لا دقات قلبك سريعة .
أنا في هاللحظة مكذبه مكذبه لو ينط فوق وينزل ,, وشلون درى إن دقات قلبي سريعة والسماعات على رقبته ؟!!
قلت له : أيه هذا الحب وانا عمك خخخخخخخ ( عمه مين ,, والله إنه كبر جدي )
وقمت أسرد عليه قصة من قصص مغامراتي العاطفية .. وصكيته بأبيات شعر .. قلت فيها :
اسمح لي اناديك يا دكتور **** حتى ولو إنك هلامة *
حبيت لي من بنات الحور **** وفي الآخر تصير خدّامة
فيها الدلع والغنج محكور **** بس عيبها تحمل اقامة
البرقع يخفّي المستور **** غرتني العين والهامة
بالمكنسة شفتها فالسور **** وتشيل في يدنيها قمامة
عرفت ما احبها الا ثور **** ما يحسب الدرب قداّمه
برهتبخهتبخبرىبىرباور**** هختهتخهبعهباعامه << اخرط على الشايب وهو فاق فمه
رح جر لك يا غبي حنطور **** والطب لا تقرب احكامه << بديت اسبّه
اسمح لي اسميك يا طرطور **** كذاب من قال علاّمه
وياليل لدان لدن دانه *** مالو المليح ما يكلمني
* هلامة : زلابة ,,,,,,,,,,,,,,, طرطور : شخصية مهمشة في المجتمع
قال : صح قلبك ,, مصافحة أكثر من رائعة << طلع من حقين المنتديات
قلت : صح بدنك وسلمت رقبتك
وبدون مقدمات خش بي سالفة عرض مالها ترابط مع قصيدتي خخخخخخخ
قال : يا اخي مدري ليه يخلوني أنا أعلّم الناس بنتائج تحاليلهم ,, يا اخي يرسلونها للمختبر وهم يعلمونهم ,, أمس علمّت اثنين إن فيهم سرطان ,, وواحد فيه إيدز ,,, وكل يوم على هالحالة يا اخي إنها حاجة تقهر ,, يجون يتبرعون وانا اصدمهم بالأمراض الخبيثة
قلت : بلاه من خشتك اللي ما تجيب العافية
وجلس يخرط على راسي عن قصصه مع الناس اللي يبلغهم إن فيهم أمراض خبيثة ... طلع ثلاث ارباع اللي تبرعوا مرضى
طبعاااا أنا في اللحظة هذي هجدت
والرجال قام يدوّر عرق في يدي علشان يحط ابرته ويشفط دمي مثل ما تشفط الاتصالات مخابينا ,,
والتفت علي وقال : كذا ما ينفع ,, وين طست عروقك ,, ما اقدر اسحب منك دم ,,
قلت : وش رايك ,, عقب سوالفك ,, صفقني إن لقيت عضلة فيني فيها حركة مهوب عاد عرق أنت ووجهك ..
وأخيرا لقى فيني عرق ( وشكل العرق اللي لقاه ما سمع سوالف هالأرفل )
وانا منسدح على السرير وفي اثناء سحبه للدم ... قام يسولف علي في عدة محاور
مرة عن أضرار التدخين وجاب لي قصة نسيبه واخته .. وكيف إن اخته قدرت تقنع زوجها يترك التدخين ,, طبعا أن عديتها له ,, لأن قصته سماعها وأنا في رابع ابتدائي وعارف إنها مهيب له ,,
والثانية عن السياحة في ( أبها ) ,, وكيف قضى الإجازة هو وجارهم ( 35 يوم مع بعض ) ,, أنا شكيت إن له شقق هناك ويبي يغريني علشان استأجر منه .. بس طلع ما عنده سالفة ولا عنده حتى شجرة رمان هناك خخخخخخخخخ
ومثل ما يقولون الثالثة ثابتة .. قال : أنت وش تشتغل ؟
قلت : مدرس
قال : تعرف محمد التميمي ؟
قلت : كأني سمعت الاسم هذا ,, في أي مدرسة ؟
قال : لا هو مهوب مدرس ,, الرجال عسكري بالدفاع الجوي
قلت : سقهاااا
وكل ما جاء يفتح موضوع سكرته في وجهه عفته وعفت سوالفه ,, قال النصر فاز على الهلال ..
قلت : الله يزيدنا فيها جهل << على باله بيقفل الموضوع
إلا هو صافقني برد ,, قال : اي والله الكورة أشغلت الشباب ,, وعندنا بطالة غير طبيعية
<<< قعد بها
قلت في نفسي : لو إنهم مقاعدينك الحين وحاطين براتبك أربع سساتر والله إنه أصرف بلا سعودة بلا هم ,, وقفت السعودة عليك
ومن سالفة إلى سالفة .. ألين سحب مني الدم وانا أقول يا رب تعدي على خير
وراح بسرعة واخذ ورقة وقلم وكان ماسك القلم بطريقة رومانسية بيده اليسار وخربط فيها كم كلمة .
وقال: خذ هالورقة
قلت : وش فيها ( بصراحة خطه ماله ملة .. مهوب عربي ولا انقليزي ولا أوردو .. كنه جرة داب )
قال : كاتب لك فيها عصير ربيع أو أي شئ فيه سكر ,, لإن جسمك بيحتاج لها بعد التبرع .
قلت : تمزززززززح وقمت اضحك بقووووووووووة
قال : صدقني جسمك الحين يحتاج كمية من السكر والسوائل
هو قال صدقني والا ما قالها وانا اللي اضحك أقوى من الأول ههههههههههههههههههههههههه ههههههههههههههههه
الرجال يحسبني اضحك على نقص السكر فيني وانا اصلا اضحك على طلباته .. كان يقدر يقولها لي بدون ما يكتبها في ورقة ,, شكله يسمع بالوصفات ويبي يطبقها علي
انا قايل الشايب هذا عنده عقدة نقص وعلى باله دكتور وبيكتب لي روشيتة ( وصفة )
المهم رجعت له ورقته وحطيتها في مخباه ,, وأنا أضحك وطلعت
واسمعه يصيح لي بصوت عالي : لا تنسى تشتري عصير أو أي سوائل فيها سكر
والتفت عليه واقول بصوت أعلى من صوته : استرررررررررررررررريح يا شيخ لا يطق لك عرق
رد مع اقتباس
[/align]
ماعندي توقيع 
