بسم الله الرحمن الرحيم

شلونكم بنات ؟ اطلب من الله ان تكونون بخير

انا استفدت من هالمنتدى وحبيت افيدكم بمشكله
كانت موجوده عندي وموجوده عند وااااااااايد حريم ومتوهقين فيها
ومحد على حسب علمي لقى لها حل .. لكن انا لقيت واتكلم عن تجربة

+ مشكله سواد الشفايف وحول الشفايف +

انا جربت كل الخلطات وماكو فايده ابد ابد لكن جمعتلي جم فكره واستخدمتها
والحمدلله الحين بقرب على الشهر والله ثم والله ثم والله ان خف السواد من شفايفي
وحول الشفايف بنسبة 50% والله يشهد على كلامي
وان شاء الله على الشهر الياي بيكون اختفت هالمشكلة

لكن خواتي حبيباتي صدقوني مايمشي تستعملين الشغله يومين وتقولين مافي نتيجة
لازم تستمرين وتغصبين نفسج وانتي لي شفتي النتيجه من اول اسبوع راح تتشجعين وتكملين

+ الاشياء اللي نحتاجها +

سكر - زيت جوز الهند الغامج - ليمون -عسل - زيت اللوز المر ( اللي تكون علبه صغيره مو الكبار ) مهمه هالنقطه
مرطب شفايفه اسمه (Avene)
حامي الشفايف من الشمس (dermocare) من انتاج صيدلية بوتس نفسها

المرطب والحامي من الشمس تلقينهم بصيدلية بوتس

+ طريقة الاستخدام بالملي تستخدمونها +

1- تخلطين السكر مع زيت جوز الهند تسوينهم سنفره ويفضل تحطينه بعلبه وتخلينه
طبعا تستخدمينه مره الصبح ومره بليل ومهم مهم مهم جدا ان تستخدمينه بعد ماتفرشين اسنانج
مو قبلها

2- ماتطلعين بالنهار إلا وانتي حاطه الحامي من الشمس للشفايف

3- بالنسبه للمرطب طول ما انتي في البيت حطي منه كل ماشفتي شفايفج نشفت
ردي حطي منه خليه 20 مره باليوم ولا 50 عادي المهم يظل مرطب على طول

4- بليل قبل لاتنامين وبعد ماتفرشين اسنانج وتسوين السنفره مالت الشفايف
تدهنين شفايفج بزيت اللوز المر الاصلي الي يكون علبه صغيره لانه مركز

5- لازم تشربين ماي عشان الجفاف

لازم ياعزيزتي تنتبهين ان السنفره تكون بعد تفريش الاسنان عشان توخر اثار الفلورايد
وتستفيدين كثر الامكان من الخلطه والحمايه والترطيب وهالكلام تسوينه يوميا

والحين 3 مرات بالاسبوع تحطين هالخلطة 10-15 دقيقه
تخلطين عسل + ليمون

وبس تم بحمدلله وعساكم تستفيدون بإذن الله واهم شي المثابره
وماتملين من اول يومين اذا تبين شفايفج تصير ورديه وخاليه من السواد

وهالخلطة ماهي مجانية
ابي منكم الدعاء بظهر الغيب برضاه سبحانه وتعالى

مع السلامه