[poem=font="Simplified Arabic,5,darkred,normal,normal" bkcolor="transparent" bkimage="" border="none,6,black" type=2 line=0 align=center use=ex num="0,black"]
عقارب دقايق ساعتي غاضها التاخير=على الموعد المذكور يا اهل المواعيدي
ليالي الخبر من عقبكم غير وانتوا غير=وانا حالتي هي حالتي ماش تجديدي
ألا يا فهد وين العذر كان به تبرير=وانا صاحبك ماني من اهل المناقيدي
عسى المانع اللي حال دون المجي لي خير=وعسى جوكم رايق ومن دون تحديدي
مشاريه خوّه وانت لك عندنا تقدير=وقدرك مشيَّد مايبي زود تشييدي
ولكن حالي يلزمه حسن في التدبير=على الله تِحَل وتنفرج عقدة القيدي
علامات الاستفهام تحتاج للتفسير=وانا اليوم ناوي ضرب حيدٍ على حيدي
أبعرف ثبات الهرج من نسخة التزوير=كفانا مجامل مع هوى زيد و عبيدي
مزامير بطرس تعتلي منبر التـنضير=تردد طلاسمها على الجهل ترديدي
أصالح هل الاصلاح وانشب مع التكفير=ولا نلت غير الشك في صلب توحيدي
ليا صار مردود اليمين الوفا تقصير=فلا عادها الله كسبةٍ حزتها بيدي
كسير المودَّه ما جبر كسره التجبير=وجريح المعزَّه ما نفع فيه تضميدي
لك الله بعض الاحيان ما اقوى على التعبير=من الهاجس اللي بدّد الحال تبديدي
شبيه امس مع قبل امس ما صار به تغيير=هجوسٍ تودعني والاخرى معاويدي
ولا كَنّ لي في الناس عِشره ولا عشير!!=أصامد عنا الوحشه من العيد للعيدي
يجوز الخطا مني ولا ابديت له تكفير=ويجوز الخطا منهم ولا بان تفنيدي
وتبقى الحقيقه في سما جوّنا تعكير=وهذا الوكاد ولا يبي زود توكيدي
بيوتي على المنكوس حررتها تحرير=ويسمى طويلٍ في بحور الفراهيدي
أجانس جناس ومن طباق الشعر تصوير=و لا فن تشكيلي و لا فن تجريدي
وإذا خانني التعبير ما خانك التفكير=معك عقل يوزن جوهر الماس بالجيدي[/poem]
وسلامتكم