. . . ( بعض من قصائد معجزة الشعرعبدالله ابن زويبن ) ...!!

[منصور الحربي]

[align=center]مساءكم سكر :[/align]


[align=center]تحت إلحاح بعض الاعضاء أضع بين يدكم بعض من قصائد ( معجزة الشعر )خالي عبدالله بن زويبن الحربي كما وصفه

الشاعر الكبير عبدالله بن عون بذلك حين لقاءه به أول مرة قبل عام تقريبا ... وساورد لاحقا بعض المساجلات بينهم

وكذلك قصيدة الشاعر الكبير غازي بن عون ( الدرة ) التي جارى من خلالها قصيدة أبن زويبن ( سمعت لي كلمة مدري

وش اقصاها ) .. اتمنى أن اوفق في تقديم بعض الملامح لشاعرية ( ابو بندر ) :[/align]

[poem=font="Simplified Arabic,5,black,normal,normal" bkcolor="transparent" bkimage="backgrounds/29.gif" border="double,4,gray" type=1 line=1 align=center use=ex num="0,black"]

لي حاجة عيت تحقـق مـن العـام = عيا يطيب الحـظ لـو قلـت أظنـه

يفـز فـزة غاتـر عقـب مـانـام= جنـه حلـوم مزعجـه وأيقظـنـه

وجدي على تحقيقهـا وجـد صـدام = علـى يديـن بـالـولاء بايعـنـه

وبلاده اللـي ماعرضهـا للاسـوام = وعرش الرئاسة والجيوش المرنـه

اللي قذايفهـا تعـدت ورى الشـام = شاميـر يـوم ولايتـه روعـنـه

وبيوته اللي من سيراميـك ورخـام = خطط وصممهن علـى كيـف فنـه

ماتنتـعـدد تكلفتـهـن بـالارقـام = ماهـو مواطـن عايـدي يبهضنـه

حاكم من الحكـام ويصـدر الخـام = دار السريـة والــدول يدعمـنـه

متريّس له دولـة شعبهـا اقسـام = ويلعب على القسمين شيعه وسنـه

مخلـي ٍ شيخانهـم تقـل خــدام = يمشون خلفه خوف ماهـو محنـه

ملا البيوت مـن الارامـل والايتـام = وملا السجون المظلمـة والمجنـه

ياليـن طشنـه مقـاديـر الايــام = مـن النجـوم النايـفـة نزلـنـه

مثل الوليشة بين عـدوان الاسـلام = من كـل صـوب كلابهـم ينهشنـه

او وجد عـود يرتكـي كـل ماقـام = على كفوف يديه مـن كبـر سنـه

الليا غفل بايامـه الماضيـه هـام = والليا انتبه من غفلته ( جر ونّـه )

من عقب ماهـو للمغاويـر مقـدام = الليـا غـزا صـم الرمـك يتبعنـه

ومروبع يزمـي مثـل عـز لـزام = الليا اقبلن شيـب الغـوارب نصنـه

بظهورهن ربـع كريميـن وحشـام= الليـا جذبهـم صـوت نجـر يدنـه

يجذب له الغايـب وسمـوه عـزام = من كثـر مايجـذب شراريـب بنـه

اليوم كل اللي بقـي جلـد وعظـام = والمال خمس اشياه والبيـت عنـه

ولاله عيال ينصرونه الليـا انظـام = الا بنـات ٍ بالهضاااايـم شـونـه

ياقلـب خلـك للروابـع والاوهـام = رفيـق درب وكـل هــم ٍ تبـنـه

والا انتفض واربط محقـاك بحـزام = وعن قوم ( وش سويت ) خافيك كنه

والشر عنك خـلاف والخيـر قـدام = والصبر في وقـت المعانـاة سنـه [/poem]


[align=center]وهذه قصيدة أخرى تعبر عن نفسها :[/align]

[poem=font="Simplified Arabic,5,black,normal,normal" bkcolor="transparent" bkimage="backgrounds/29.gif" border="double,4,gray" type=1 line=1 align=center use=ex num="0,black"]

ياعزوتي يابدر مااقرب حضايبـك = على الخطا والصبح حبك نقـازي

نوب تنسينا الشقا فـي عجايبـك = ونوب تولعهـا بليفـة وقـازي

ادناة مايرضيك وأدناة مااغضبـك = تلقط الغلطات لقـط الجهـازي

ماهي عداوة يوم اطالبك واضربك = أنته حفيد جدودنا ماانـت نـازي

لاشك انا يابدر ابنصحـك وادبـك = واعطيك عن كل المعاني أجـازي

تلقى فوايدها ليـا خـط شاربـك = بها على كل الوصايـا أمتيـازي

خلك شمالي عند زلـة قرايبـك = وعلى الحقوق الليا نصنك حجازي

لاتذخر المذخور من دون واجبـك = اوف الحقوق اللازمات بنجـازي

للضيف والجيران ليّـن جوانبـك = وبالطيب جاز وبالردى لاتجـازي

احلم على زل رفيقـك وصاحبـك = ادمح خطاهم لاتصيـر انتهـازي

يابـدر والله ماتخونـك مناسبـك = لك منسب طيب وساس عـزازي

أفرح ليا قالوا هاك العود جاذبـك = يصير عندي مفخرة واعتـزازي [/poem]


[align=center]وهذه قصيدة ثالثه :[/align][poem=font="Simplified Arabic,5,black,normal,normal" bkcolor="transparent" bkimage="backgrounds/29.gif" border="double,4,gray" type=1 line=1 align=center use=ex num="0,black"]



سقوا سقى الله من مطر كل ناشـي = ربعٍ لهم في منبت القفـر مغبـاش

يتلون درب اللـي لبرقـه تواشـي = كثحه على حد السما تقـل لطـاش

كم مـرة بيـن السفـر والغطاشـي = دكوا على جول المها منه وأنحـاش

وبنوا به اللي مثل روس الدشاشـي = مثل القور ماهن هداريس وعشـاش

لاشافها الجيعـان جـاك متحاشـي = يقلط على بيض المناسف والاكبـاش

وصفر من الصالي لهـن اجتواشـي = يصوك ريح ابهارهن كـل ماغـاش

والتمر والمركـا ودمـث الفراشـي = زل ٍ برومـا لـه مـوزع ونقـاش

ماحسبـوا تـال الشهـر للمعاشـي = ولاسعروا حمل البواخر على الطاش

بالسوق عملتهم ماغيـر المواشـي = اللي من اللي ينبت الغيـث تعتـاش

وإن جـاء بلدهـم زاد ولا قماشـي = وسمعوا ووافاهم بالاخبـار طـراش

ودوا لسوق البيـع فاطـر وحاشـي = والمندرج بالسوق من باق الادبـاش

والطيب سعره صعـب ماهوبلاشـي = فازوبه اللي يدفعون الثمـن كـاش

ماجاب غيب قلوبهـم كـل واشـي = بين القبايل ذكرهم يدهـش ادهـاش

مافض مجلسهـم خطـاة الدفاشـي = اللي يتوع بكلمـة تصطـح الجـاش

همـاز لمـاز هـبـود اريـاشـي = سبـاب نمـام مـراوغ وهــلاش

الليا نصحتـه زاد شـره وطاشـي = انحل امانه وانفـرط تقـل رشـاش

ينبش جثث ناس بها الـدود ماشـي = وسط اللحود اللي توحـش توحـاش

حـرااام فيهـا مايجـوز النقاشـي = جنايز حـدر الثـرى كيـف تنـاش

كل العلـوم الطيبـة فـي تلاشـي = تمضحلت واللي بقي ( طاش ماطاش) [/poem]



[align=center]وهذه رابعة :[/align]


[poem=font="Simplified Arabic,5,black,normal,normal" bkcolor="transparent" bkimage="backgrounds/29.gif" border="double,4,gray" type=1 line=1 align=center use=ex num="0,black"]


إن كان تنشد عن علومي وأنا صبي = ابتذكـرهـا واعلـمـك عـنـهـا

لو هي بصفحات ٍ طواها الزمن طي = جرة مطر جاهـا عجـاج ودفنهـا

ألعب طواريق الهوى مع هل الغـي= اثقـل المعنـى واخفـف لحنـهـا

والشعر يبقى في قلوب العرب حـي = ولا كل من سوى القصيـدة تكنهـا

وأنا حداها حدي الاصعـاب بعصـي = واقودهـا قـود الاديـب برسنهـا

والحب مردوده على صاحبـه سـي = كم ضحكـة ونَـات قلبـي ثمنهـا

أذكر سنة تسعه وتسعيـن هجـري = الـف وثلاثميـة بدايـة زمنـهـا

زلت بي الاقدام للشمس مـن فـيَ = اقـدار والاقـدار تومـر وتنهـى ّّ

غافل وجتني من كوت خافقي كـي = كية عطـب لـولا طبيـب مكنهـا

أبعدت مضربها عن الصـدر بيـدي = ولدَت على كبـدي برمـح طعنهـا

وعرفت ماتخفيه في صدرهـا لـي = من واقع النظـرات منـي ومنهـا

نظرت فيهـا مثـل نظراتهـا فـي = وعجزت اقاومهـا وصديـت عنهـا

كل النساء ظلماء وهي بينهن ضـي = غطت شعاع الشمس أشعـة بدنهـا

من الذهب تلبـس خلاخيـل وحلـي = سـود محاجرهـا وحمـر وجنهـا

مدري تسمى من ومنين ومـن أي = وش هي قبيلتهـا وموقـع سكنهـا

راحت وانا مااعرف من اخبارها شي = الا رمـوز الموتـر اللـي حضنهـا

مدينة من بيـن ابـو ظبـي ودبـي = لعلهـا كاننـهـا هــي وطنـهـا

تمطر عليها السحب هـذي ورى ذي = وديـم الليـا قفـى تراهـا ودنهـا [/poem]


[align=center]وهذه اخر القصائد في الشيخ عليان بن راشد الطهيمي الحربي خلال مزاين الابل قبل عامين والتي وصفها الكثير من

الشعراء بالاسطورة ونالت اصداء وااااسعه :[/align]



[poem=font="Simplified Arabic,5,black,normal,normal" bkcolor="transparent" bkimage="backgrounds/29.gif" border="double,4,gray" type=1 line=1 align=center use=ex num="0,black"]


راكب اللي والنجـوم اللامعاتـي = في سماهن والصباح يشع ضيه
بين حي الجامعة والمرسلاتـي = استدار مع الخطوط الدايريـة
ما التفت راعيه يـم اللافتاتـي = حافظ كـل الخطـوط الريسيـة
أول أسمه بالثـلاث المفرداتـي = رقم خمسة بالحروف الأبجديـة
تـو لوحاتـه عليـه مركباتـي = صادرات من مـرور الناصريـة
وارد تـوه حديـث مواصفاتـي = يلتهـب بديـه ويلمـع داخليـه
كن طبلونـه جهـاز مراقباتـي = في حدى المستشفيات المركزية
شاشة لنباتهـا مثـل السفاتـي = للدمـاغ مخصصـة والباطنيـة
تنكشف به بالضروف الطارياتي = دقة القلـب السريعـة والبطيـة
وكشنه الداخل زلـول ناعماتـي = قبتـه وارضيتـه والجانبـيـة
والمراتب من جلود الزاحفاتـي = ماآدري هو جلد داب أو جلد حية
ماقطعت الشك ميـر مموهاتـي = مثل تمويـه البـدال العسكريـة
بديه أدهم والخطـوط مذهباتـي = مثل عقد الماس في عنق الفتية
والزوايا والركـون مصفحاتـي = مايله والواجهـه مثـل الخليـة
بين شمعات صغـار مربعاتـي = والعلامـة وردة فـي مزهريـة
يوم مريت العيـون الساهراتـي = قوةٍ للأمن في حجـم السريـة
قبل ما آقف عندهم واطلع اثباتي = صفو العسكر ودقوا لـه تحيـة
مشترينـه للديـار النازحاتـي = والخطوط المتعبـات السرمديـة
الطوال اللـي تشـق النايفاتـي = باتـلات مثـل بطـن البندقيـة
ماتخاويـه الريـاح الذارياتـي = والوحش والطايرات المروحيـة
كن له جنحان مثـل الطايراتـي = يرفعنه فـوق مـدري جاذبيـة
وكن ماله من خلاف مساعداتي = قوة الماطـور ترفـع مقدميـة
وان عطيت ابه الفجوج الخالياتي = فزته تعطيـك عـزم ومعنويـة
ماوقف يطبـخ بلوفـه ذايباتـي = والشراب مغلـق مـن تانكيـة
وإن نظر راعيه مع كل الجهاتي = مايشوف الا الخلا والمهمهيـة
للسراب وللمعاصيـر اعتماتـي = عبلةٍ جردا وشمـسٍ صنقريـة
وأيس المسكين من تالي الحياتي = وأرتكى فوق الكفر يكتب وصية
كن جَلده جَلد خيـل هاجماتـي = أول الغارة فرس شيخ الغزية
أن هجم قدم السبـاق الأولاتـي = يشتبك هو والعدا فـوق العبيـة
وان رجع يثني خلاف التالياتـي = يقهر السبـق ويرجـع للرديـة
وإن كسب حم الذرا والمسرجاتي = مايخيب ضن من قـال الحذيـة
غازيٍ يبغى النقى قبل الفواتـي = غاديٍ له عند عدوانـه شفيـة
أزعجنـه بالصيـاح الناعياتـي = كل ما نادى المنادي في سميـه
أتعجـب بالعلـوم الماضياتـي = وألتفت في موتري واذكر مزيـة
مع جراديح الحـزوم النابياتـي = كن حذفه للحصى حذف أهوشية
لا وطى له مروةٍ راحت شتاتـي = كل قطعة طيرت مثـل الشضيـة
يم حايل من شمـال امغرزاتـي = ماقصد غير الطهيمي في مجيـة
ناصٍ عليان في موضوع ذاتـي = مايسـده واحـدٍ مابـه حميـة
ما يسده غيـر راع الواجباتـي = يوم ولد اللاش يبخل في طليـة
والدلال الصفـر دايـم والماتـي = من قديم الوقت راعي شاذليـة
والعشاء كثر الضيوف امفطحاتي = كل واحد له ذبيحة فـي صينيـة
كنس ماهن مـن المستورداتـي = ما يجيب البربـري والساكنيـة
ما يجيب الا السمان الغالياتـي = يتخير فـي نجـد نجـد العذيـة
بين حايل والقصيـم مربعاتـي = بالفياض اللي مناضرهـا بهيـة
من بعد سيل الوسوم مسيلاتـي = مرتين امن المـزون العقربيـة
أول النـاوة سيـولٍ جارحاتـي = وآخر الناوة قرى صمد وشغيـة
الزهور اللي على روس النباتي = يشبعن إبها الضحى وأرضٍ مرية
ما تثنن بالمـراح مهوجراتـي = ولا عطوهن من علاج البيطرية
والمداخـن بينهـم متعاقباتـي = كل وحدة راسهـا ياخـذ أوقيـة
ما قطع فيهن عطور السيداتـي = ريحة المعمول ولـى الجاونيـة
مايخلي نافذه لأهـل الشماتـي = جعـل مايبقـى لتاليهـم بقيـة
وله عوايد بالعطايا المعجزاتـي = الجيوب الشهب يعطيهـا هديـة
ومن بغى يزعل من العلم الثباتي = ما عليَه منـه والله مـا عليـه
إن زعل يرد البحور المالحاتـي = إن رضي ولى إيبنط في طميـة
يا ولد راشد بـدون مجاملاتـي = حايزٍ كـل المزايـا الجوهريـة [/poem]


[align=center]أتمنى أن اكون قد وفقت في تقديم مايشبع نهم القاريء الكريم ... ولكم تحياتي [/align]

[الخنفري]

بيض الله وجهك وجهة الخال

[سـعـد الحويماني]

منصور

ابيض وجه

صح لسان خالك

وماقصرت وافي

[فايز ماجد]

الله الله يامنصور

وخالك شاعر غني عن التعريف

صح لسانك

ولسانه

وتسلم يمينك على النقل

تحيتي لك

[عبدالرحمن الجبابرة]

تسلم يا منصور على هذا النقل المميز والعرض الرائع


وصح لسان الخال الشاعر المميز عبدالله بن زويبن

فعلا قصائد جميلة يشعر المتذوق بروعتها وأصالتها عند التغني بها

لا عدمناك يامنصور والمزيد المزيد من إطلاعنا على مثل هذا الإبداع



مودتي

[سعد الحويماني]

اشكرك