طفــــششش بالجمله + خبال بالجمله ...!!

**ހވޱالـހވޱ** · 11-10-2012, 11:48 PM

السلام عليكم

بنسوار وبنجور وكموسافا وكش عليكم

للمره الثانيه

والله ياان فيني تمسيكة رقص مدري وش طرا لها..

ملاحظتين :

أولاً : حمسني موضوع مسببه قلق قلت زين يمكن نحصل أهتمام وهيك علشان نسدح أبداعنا سدح ..

ثانياً : شغل تبص من بعيد لبعيد مالها سنع خلك قدع وقدعه للأناث ورد رد يحمسنا نكتب ومالها داعي الرسميات وشكراً وعفواً ماأعترف بهالحاجات ابد ..

×××

في الحقيقه والواقع ..

تعرفون الفتره هذي ايام مدارس والطفش والطفشنات التي تحدث للعاطلين عن العمل والداجين بسوق الأسهم ..

جلست لين قبل العشاء << عاد أهلي هالحين مايتعشون الا 12 مسوين مع الموضه خخخخخخخخخ ..

من قوة الطفش دقيت على واحد من الشباب الله يذكره بالخير أبي أسولف معه قاللي والله مافيك خير ياروح الروح .....؟؟؟ ماعاد شفناك لابمنتديات ولا بشقه ولا شي تقول بيننا وبينك ثار ..

قلت افا وانا اخو رحمه << بدون تعليق ...وشو له..؟؟ قال مسوي لك تكريم وحفل تخرج وما صرت تخش حتى سكاي بي ..

عاد قلت له ماعليك ياراقل يا انا يا هالنت << ذلني تقول أول مره يعلم واحد على الأنترنت ..

قلتله ابي اكتب فيه لين يشوتوني منه رقالتنا << ممسكه معي القاء بدل الجيم ..

طبعا طعشيت وجلست ابي اطلع ويوم دقيت سلف الأكسنت ناظرة مافيه بنزين وخويكم مطفر والوقت دراسه مالها داعي تطفى عليك قدام الطلاب قلت ياولد كل تبن وارجع البيت << يحاسب نفسه كل فتره ترو خخخخخ ..

ومن زود الطفاشه والطفيش والطفشكنتا قلت ياولد نروح ندور في هاليويتيوب والمواقع منها فله ومنها نفك ازمة طفش << ركز على كلمة طفش ..

عاد وأنا أقلب في رسائل الأيميل وأطب في صفحة المنتدى قلت ياولد أنا مغير كاتب موضوع واحد مو معقول ..

وأروح سيدااااااا لمنتدى الغربله والاقي موضوع مسببه قلق قلت ياولد خلنا نكتب وش ورانا النت مجاني والأمور طيبه << سقى الله ايام الفواتير أبوي كان بيسوي فيني جريمه مع أول شهر تعلمت فيه النت ..

كل منا يصيبه الطفش والملل وفى روايه اخرى الزهق ولذلك ومن اجل اعضاء ومشرفين منتدى غرابيل قدس الله سرهم جبنا لكم (( انا ورجلي ومخي وجريدة الوطن )) عمل درامي اخباري مشترك له في الثلاجه من عهد يوم كان القطو نمر << أبوه ..

جبت لكم طرق للتخلص من الطفش ومجربه ومضمونه 100% طبعا كل هذا بعد مالاحظنا الطفش على وجيهكم الواحد يدخل المنتدى تقول خشته مغسوله بكلوركس منتهيه صلاحيته ..

×××

ولكن فى البدايه يجب ان نعرف الطفش :

الطفش هو :- ان تكون طفشان <<قل قسم ياشيخ ..

وله تعريف آخر هو ان تكون طفشان وبقوه ..

وله تعريف اجنبى كما عرفه الباحث المستشرق سعودي الملقب(مهند) << أخوي الصغير وهو التــفش وخير دليل على ذلك اذا سألك شخص اجنبى وقال لك aydyhwe sldldlf(( << اذا احد عرف يقرا له الي يبي )) ..

يعنى هل انت طفشان يانفررر ..

×××

انواع الطفش:

سمول <== هذا للي عنده بلاك بيري وايفون طفشان و ماحصل بنات يسولفون معاه ومستحي يقول ..

وميديم
ولارج
وأكس لارج <=== وهذا النوع يصيب البنات وبكثره ..
كيف تمردغ الطفش (( تمردغ = كلمه بمعنى تتخلص منه))
عزيزى اليك هذه الخطوات والنصائح لكى تتجنب الطفش ..

1- اذا كنت فى البيت والوقت متأخر وجالس لوحدك والأهل نايمين اكيد بتطفش , طيب كيف اقضى على الطفش ابد سلمك الله رح الى عداد الكهرب وأفصل الكهرب عن البيت ..

على طوول راح يصحون الأهل مذعورين وانت سو نفسك مذعور ولاتدرى وش السالفه ..

وبعدهاا راح يتنكد نومهم وراح يجلسون معك ويزول الطفش عنك وانت مسوى نفسك بريء << بشهادة من عالم الذره والفيزياء المعروف في عالم اللقافه مهند ((أخوي تم التوضيح مسبقا)) ..

2- اذا كنت طفشان ولاعندك شىء تسويه ابد ادخل غرفه وطف النور وأستخبى ورا الباب وياحبذا تلبس لك عبايه والا قناع وأى واحد يدخل قل لـــه بخ بوووووووو <<< لست مسؤلاً عن رده الفعل ..

3- غير فرش البيت يوم شيل الكنب حق المجلس حطه بالصاله ويوم شيل كنب الصاله حطه بالسطح << يسمونه تغيير فى الديكور مما يؤدى الى عدم الملل .. ويستحسن ان تكون الوالده تشوفك عشان تاخذ لك كم دعوه طيبه ..

4- بالنسبه للبنات(( طبعاً في هذه السالفه استعنا باحسن صديقه في العالم الأخت لولو)) اذا طفشتى مره روحي للمرايه وأجلسى مقابلتهاا وغيرى شكلك يعنى حطى روج اصفر وظل اخضر واصبغى شعرك برتقالى وحطى مناكير أسود وياحبذا تحطين عدسات فسفوريه قسم ياشيخه يتغير شكلك وتقولين وشذا الجنيه وهذا مايسمى بتغيير اللووووووك ..

واذا كان فيه مشروع زواج لك في عشر سنوات وقبل لا احد يشوفك ..

5- برضو للبنات اذا طفشتى حاولى تخترعين أكله عطى الخادمه اجازه وأدخلى المطبخ وطبقى كتاب أبله عطيات لأتعس الوجبات مع ملاحظه عدم تقديم هذه الوجبه الا للأخوه والأعداء يعنى فيه احد مزعلك قدمى له الوجبه ..

6- بالنسبه للشباب طفشان ليه تروح تغسل سيارتك بعشرين او بثلاثين ريال ابد الله لايهينك جيب لك سطل مويه ( وفى روايه اخرى ماي ) ومعه شويه صابون فيرى وفنيله من فنايلك ( يمتنع أستخدام السراويل ) وأشتغل فرك فى الكفرات الين تدوخ وراح يزول الطفش وينهد حيلك وتنام ..

7- بالنسبه للبنات اذا طفشانه ولاعندك شىء تسوينه بالبيت ابد اقلبى بيتكم ذاك اليوم يوم الكنس والغسيل العالمى يعنى نظافه غير طبيعيه والأدوات المطلوبه مكنسه طويله عدد اثنين ( الثانيه تحطينها عند الباب وقت هوشه ) عدد واحد مساحه عدد واحد مكنسه صغيره للأماكن الى تحت المغسله والأماكن الى ماتوصل لها المكنسه الطويله وعدد واحد لى مويه وتشبكينه فى الدينمو وأدهرررى غسيل مع ملاحظه عدم لبس الكعب العالى اثناء الغسيل علشان اى وحده بتستخدم الكعب راح يكون موقفها صعب قدام هيئه الأمم المتحده ..

وياليت يكون يوم جمعه علشان البلديه ذاك اليوم معطلين ولاعندهم دوام اخاف يقطعون المويه وتقولون انا السبب آخر شىء عدد خمس فنايل قطن ( دبريها من فنايل ابوك والا اخوك ) تستخدم الفنايل للزجاج فقط ..

8- للشباب والبنات طفشان حاول تخلى نفسك مفيد وجيب السواق وانتى جيبى الخادمه وحاول تعلمونهم اللغه العربيه الف بااااء تاااء ....الخ << مع ملاحظه انك ماتنسى لغتك وتقول لأهلك ايسسس فيه مسسسكله وفي هذا المجال اسآلوني يوم جتنا رحمه حتى اسمها ماتعرفه ..

طلعنها بنت ناس بعد ما كانت رخمه << رخمه على وزن رحمه مو ..

9- امسك قلم وورقه وقول انا بصير شاعر او شاعره<< لامانع تكون فاتح قسم الشعر اذا أنزنقت الطش لك بيت والا بيتن ثم أدعسسسس ..

10- بالنسبه للبنات ادخلى اى محل فى اى سوق واذا شفتى اى شاب ( تمساح ) قولى بصوت عالى يالى ماتستحى تعاكس بنات الناس وأنسى الباقى الناس الموجودين بالمحل راح يحتفلون فيه احتفال غير مسبوقه ..

11- للشباب والبنات من المعروف الايام ذي قوة حر مو طبيعي يعني كل واحد يفتح درجه ويرتبه ويشيل الصوف والشيرتات القطن والاسترتش المصبوغ (( اي شي ثقيل يعني)) الملابس الصيفيه ويدور وين موزي الكوت ويخيطه اذا مقطوع ويزين وضعه للدوام اليوم الثاني لأن البرد جآآآي ..

12- للشباب والبنات اللي يدرسون من المعروف أنكم تحتفلون بالكتب بدون فايده يعني الطفش صار طفش وملل ويكثر كتابة الاشعار على الكتب اثناء المذاكره << (( ما اقصد أحد)) بدل هالخربشه وتضحك على نفسك مسوي تذاكر وماعندك الا الدجه شف لك ورقه فاظيه ومرايه وارسم خشمك واذا قدرت ترسمه من جميع الجهات يكون ازين بعد ونزلها لنا هنا نسوي تصويت على ازين خشم ..

13- (( والله يا ان فيه حتسياً كثيراً ملا راسي لاكن ما نبي نطول الموضوع)) ..

×××

الطفش والطقس :

يؤثر الطفش فى الطقس والطقس فى الطفش يعنى كل واحد منهم يؤثر على الآخر..

فصل الشتاء :- يتميز فصل الشتاء بالشتاء اقصد بالجو البارد ومعه تهدى الأعصاب ويقل الطفش ويكثر النوم واذكر اخر شتاء كان فيه طفش عندي ..

مره ابوي عصب علي صكني كف فكك وجهي وكف في برد << حلها ..

فصل الربيع :- ماعمرى شفته ولااعرفه بس اسمع فيه يوم بالسنه ..

فصل الخريف :- برضو مثل الربيع .. بس الي اذكر انا دايم نسوي مرقوق فيه ..

فصل الصيف :- ويسمى فصل الطفش الموسمى لأن الرياح تهب من جهة ارتيريا وتنخفظ كلما اقتربت من البحر الاحمر وتديور وترجع يوتيرن عند المحيط مدخل مدينة جيزان واول منطقه عندها هى الشرق الوسط ويتوقع هطول الكثير من الطفش فى المناطق الجنوبيه والشماليه الشرقيه ..

مع وجود زخات من الطفش كلما أتجهنا جنوباً وعلى عكس ذلك تكون المناطق الوسطى طفشاء صافيه ودرجه الحراره خمسه وخمسون طفشه مئويه مع وجود تيارات طفشائيه منخفظه ويطول النهار طفشتين ونصف الطفشه ويقصر الليل مدرى كم طفشه وطول موج البحر طفشتين وعليها كم طفشوشه وينصح بعدم التسبح الا في البانيو <<< حسن كرانى على غفله ..

×××

فاصل اعلاني

للي يعرفون البلوت بسسسس

يقلون لك كان فيه محشش ماسك خط السااحل ومركب معه ركاب

وكلهم معطينها << معطينها على حشيش الحمد لله بسسسس

ماعلينا

مسكهم عسكري في نقطه وهو بعد كان معطيها << تعيدها بعد يادلخ

قال اثباتاتك واثباتات الركاب

جمع السواق اثباتات الركاب .. وجلس يخبسها والعسكري يناظر فيه

يوم خلص

قال للعسكري : قــص

قال العسكري : رح

<< وضحك الجميع من نكتتي خخخخخخخ ..

×××

باااك

آخر اخبار الطفش << ام الدلاخه الاخبار بعد النشره الجويه ..

سقوط اربعه صواريخ طافشنكو بعيده المدى على جنوب العراق ..

سقوط طائره من نوع طفشانكا ايرلاينزز ومصرع جميع الطفشانين على متنهاا بمافيهم طاقم الطفشانين الجوييين ..

انفجار قنبله طفشانيه فى محل بيع خضار مما ادى الى سقوط بعض الطفشانين بعض اصاباتهم طفشانيه بقوه ..

انهيار العمله الطفشيه فى بورصه الأطفشا العالميه للأسهم ..

وصول ممثل هيئه الأمم الطفشانيه كوفى طفشان الى السودان للتفاهم حول تطفيش السودانيين من اراضيهم << هذي حركه ..

فوز الأهلي (( خــبر موثوق)) على الجزيره بأربع أطفاش مقابل طفشين << ويتوقع رده فعل غير طبيعيه من الأماراتيين على هذه المهزله ..

وقد عقد الأماراتيين اجتماع صحفي حظره الصحفي زيزفون كوم << مندوب المجله هونيك .. وقال بصريح العبارة :

(( اصلا لعيبتنا كانو تعبانين وااااايد يعني ييبونهم من قطر ويودونهم يلعبون في صناعية جده هذيه مو بمنطق شنو ذيه)) ..

ونتوقع حصول بعض المشاكل بين بعض بنات المنتدى الأماراتيات والأهلاويين ... هذا ونؤكد لكم أنهم وسيوضعون تحت المجهر الامني تحسباً لأعمال الشغب ..

ومن جهة اخرا وصلتنا انباء هذا اليوم انا ياسر الطفشاني قد انظم الا قائمه افضل طفشانين في اسيا مع أحمد طفش وطفشين مطر ومعه كم كوريين وايرانيين واوز باكستاني وكم نفر نسيتهم << ينظر في جريدة الوطن لهذا اليوم ..

×××

ملاحظه:

يا اخوان انا طفشان عندكم حل للطفش خخخخخخخخخخخخخ ..

طيب والي ابوه متحلف لو مايحصل وظيفه هالسنه يطلقه . قصدي يطرده وزاد الطفش نكد وش الحل ..

موضوع مستعجل وفيه شطحات كثير بس من فتره ماكتبت<<< لاعمرك تكتب والى يرحم والديك مره ثانيه ياليتك يوم رحت مارديت ..

والموضوع مو بذاك الاهميه بس شفت أن القسم يبيله مواضيع وناس يكتبون بدال النقل قلت يا روح الروح افزززززززع بحكم انى شخص راعى فزعات ..

جمعت طاقم العمل(( رجولي ومخي وعقلي وجريدة الوطن)) وسوينا هالعمل ..

السموووووووحه منكم على الإطالة ..

ارفواااااااااااااااااار << سمعتها في مسلسل مكسيكي اليوم الظهرLBC<< للي يبي يشوفه معي خخخخخخ

ملاحظه روح الروح للترميز فقط ويمنع المبالغه في الذبات

دمتم بود