علاج البشره
اول شي تسوينه هو انج تغسلين وجهج بالماي للتخلص من اي اوساخ
بعدين اخذي وعاء صغير حطي فيه ثلج وقليل من ماء الورد , وحطي وجهج
فيه كثر المستطاع ( ادري بارد بس وايد مفيد ) كرري هالعملية لمدة 5-7 دقايق
بعد ماتنشفين الوجه اتحطين قناع طبيعي بسيط , انا كل اسبوع انوع
احيانا استخدم قناع الفراولة واحيانا الموز واحيانا الافاكادو , بقولكم عن الفراولة
واللي حابة اتعرف عن الباقي انشاءلله مره ثانيه ( لول مابي اطول عليكم)
قناع الفراوله = 3 حبات كبار من الفراولة اتقطعينهم وتنعمينهم بالملعقة
واول ماتحسين انهم صاروا ناعمين حطيهم على وجهج وخلي القناع لمدة
10 دقايق , اول ماتخلص هالدقايق غسلي وجهج بماء الورد
هالقناع يساعد على نضارة البشره
*سكرب طبيعي للجسم
ممكن في العشر دقايق اللي تنظرين فيهم سويلج سكرب سريع للجسم
اخذي زيت زيتون وملح وافكري جسمج زين ( طبعا بحركات دائريه)
اذا خلصتي حطي على جسمج كامل ماي دافي ..
*الأنف
بالنسبة للخشم , انا الصراحه خشمي فيه حبيبات سودا جربت كل شي ومانفع
الحين صرت احط شي اسمه Honey & Oat scrub mask
هذا سكرب للوجه بس انا احطه على خشمي واخليه 10 دقايق وعقب
اخذ فوطه صغيره وافرك خشمي بعدين اغسله وانشفه واحط لصقات بيوريه
ماقولكم ينظف 100% بس الحمدلله مايبين وخصوصا لاني اشقر بعدها
* غسل الوجه
الحين وانتي في الحمام ( الله يعز اللي يقرون ) اغسلي وجهج بغسول طبي
انتي متعوده عليه ( انا شخصيا استخدم نيتروجينا لان وجهي فيه حرار
ووايد نفع معاي)
وانتي تغسلين وجهج بالغسول ركزي على المناطق اللي فيها حرار ( اذا عندج طبعا)
خلي الغسول شوية على الوجه بعدين اغسليه بماي بارد
*غسل الجسم
بالنسبة للجسم , اللي انا شخصيا اسويه هو اني اول شي احط سكربت معطر
من البودي شوب (انا استخدم البابايا) على جسمي وافرك جسمي عدل بالليفه اللي على شكل قفاز عارفينها طبعا
بعد مااخلص اغسله بالماي واحط جل الاستحمام , انا بشرتي
حساسه واي جل استخدمه او اي صابونه يسببون لي حساسية ويطلع لي حرار صغار
في رقبتي وظهري , بس الحمدلله الحين استخدم جل الاستحمام من دوف
ريحته اتجنن ومايسبب لي اي حساسيه ويخلي البشره ناعمه
* تنظيف المنطقه الحساسه
بالنسبة لتنظيف المنطقه الحساسه , في بنات يستخدمون الصابون الطبي من الصيدليات للتنظيف .. انا شخصيا استخدم فوطه صغيره واحط فيها غسول الاستحمام
من بيبي جونسون وافرك المنطقه بعنايه , هالغسول وايد زين لان ريحته حلوه
ومايسبب حساسيه وطبعا نظافه هالنطقه وصحتها اهم شي فعقب ماخلص
اركز على هالمنطقه واغسلها بالماي الدافي لمدة 3 -4 دقايق .. افركي جسمج بليمونه وكتي عليج ماي وخلاص طلعي ههههه خلصنا
* بعد الاستحمام
اذا خلصتي كل شي وقبل لا تطلعين من الحمام ( وانتوا بكرامة) رشي على جسمج
الزيت البخاخ من بيبي جونسون على زيت اللوز ريحته حلوه ويخلي الجسم
ناعم مثل الحرير .. وزعيه على كل جسمج
*قناع التونك في 5 دقائق
الحين اللمسات الأخيره لول .. في قناع جدا ممتاز هو عباره عن تونك في نوعين
واحد ازرق مكون من املاح البحر الميته هذا القناع مسووينه للي مستعجله
وراها سهره او مشورا مثلا وماعندها وقت تستخدم خلطات تاخذ وقت طويل
القناع اتحطينه على الوجه لمدة 5 دقايق وعقب تغسلينه بماي بارد
القناع الاخضر يدخل في مكوناته الشاي .. وهذا وظيفته التنظيف
انا شخصيا ماصدق هالسوالف بس فعلا هالتونك وايد حلو واتحسين بعده ان
وجهج فيه نضاره ومشرق اكثر
اسم القناع : Five Minute Miracle
Face Tonic
بعد ماتخلصين حطي كريم مرطب ( انا استخدم نيفيا الكريم المجدد ليلا
والمرطب نهارا , هو الوحيد اللي نفع مع بشرتي يمكن يختلف معاكم طبعا)
نتايج اي كريم تكون احسن مع التدليك يعني وانتي تحطين دلكي وجهج
* ترطيب الجسم
طبعا الجسم خلاص مايبيله شي سوينا سكرب طبيعي وسكرب معطر
بس علشان اتحسن بنعومه ( وخصوصا اذا بتروحين عند زوجج ) يكون احسن
لو حطيتي كريم على جسمج كامل .. انا احط الكريمات من Body & Works
انا شخصيا اعتبر هالكريمات رائعه مافي احسن منها روائحها اتجنن وتلصق
في الجسم طول اليوم ( زوجي يموت في ريحتهم ) بس اللي ماعندها ممكن تستخدم
كريمات البودي شوب في انواع حلوه
بالنسبه للأقدام والركبه والكوع , هالمناطق لانها اخشن من باقي الجسم
انا احط فازلين واخلطه مع كريم ثاني لان اتعرفون الفاولين وايد ثقيل
* ترطيب المنطقه الحساسه
اما المنطقه الحساسه انا وايد اخاف احط اي شي , فاخذ بوردة بيبي جونسون
واحطها في يدي عقب احطها على المنطقه من فوق وبعدها استخدم كريم بيبي
جونسون الوردي مال الأطفال ( طبعا بعد من فوق وعلى الجوانب مب داخل لول)
مايسبب اي حساسية ويخلي المنطقه ريحتها حلوه وفرش
وبسسس , هذي خطوات وايد بسيطه ومافيها اي تعقيدات .. بعدها بتحسين
بنظافه وصفاء , انا والله بعدها ماحط الا كحل خفيف ومرطب واروح حق زوجي
وماحصله الا يمدح في شكلي وريحتي لول بس خلاص عيب
رد مع اقتباس
