[align=center]للرجال فقط[/align]
[align=justify]ياجماعة الربع عندي موضوع ودي اطرحه واطب في بطنه والعن وا........ بعد وابيكم
تشاركوني ...
الموضوع هو الزواج , واه يا حمزة اقصد اه يالزواج .
يبدأ الشاب في التفكير بالزواج من اول يوم يشتغل فيه ,,, ومن يوم يستلم اول راتب وهو يحن
على امه ( يمه انا كبرت واشتغلت وصار عندي راتب – يعني فيه ناس يشتغلون بلوشي – وودي
اتزوج واكمل نص ديني ) تفرح الام طبعاً وتبدأ تعدد له وش رايك في فلانه والله انها وش حلوها
شعرها , خدودها , عيونها ,,,,, لين يضيع الرجال ويحب وهو ماشاف مغير من الحكي وتشتغل
عنده الهواجيس والاحلام الورديه ويقوم يسمع راشد وعبدالمجيد وكاظم وهو اول مغير ابونايف
وحلسات بعد , تروح الام لابوه علشان تفاتحه في الموضوع وكلها عشم انه يوافق , طبعاً الابو
ماعنده مانع وخصوصاً اذا تخيل نفسه وهو طاق البشت وراز وجهه عند الحريم وقاعد يتهزز
ويتميلح . شوي الا تولع لمبة التفكير عند الابو انا من حيث المبدأ ما عندي مانع بس ( ايوه ) من
وييييييييييين بيتزوج ولدس انتي ووجهس انا ما عندي ولا قرش كل الي في حسابي عشرتلاف
ناوين ازودها على قيمة موتري واغيره , روحي قوليله اركد لين تجمع لك كم قرش وبعدين فكر
يالمنتف , تحاول الام معه تكفى يابو فلان دبر حالك تسلف بع الارض الي في زحل لكن الابو
متمسك برايه , تستسلم الام وتروح للولد وتدخل عليه الغرفه وتلقاه جالس على اعصابه وعرقان
وحالته حاله .... هاه بشري ... والله وش اقولك ابوك ماعنده مانع من حيث المبدأ ( احلا ,, معها
رابع جيم ) الزبده , بس يقول خليه يجمع له كم قرش ويرتب اموره وبعدين يكون خير .
ينصدم الولد بالواقع المر وتتعب نفسيته وشلون بيجمع ومتى وراتبه مغير ثلاثه ونص وبعدين كيف
بيعيش بدون فلانه وهي كيف بتعيش بدونه ( وفلانه ماتعرفه اصلاً ) ويبدأ الولد يطول برا البيت
ماله خلق يقابل ها الشايب البخيل وصار يسهر كثير .
وبعد كم شهر يحس الابو بالتغيير الي صار لولده ويكتشف انه هو السبب فيقرر في النهايه انه
يزوجه يجتمع مع زوجته والولد ويبلغهم بالقرار يطيرون من الفرحه وتبدا الام تخطط بنسوي
وبنسوي وهم ما بعد لقو بنت الحلال . المهم يبيع الابو الارض الي في زحل بخمسطعشرالف على
العشره الي في حسابه وتحط الام خمسه جمعتها طوال خمسه وعشرين سنه زواج ويبيع الولد
الكامري باربعين ويشتريله اكسنت بخمسطعش تمشي الحال ( اهم شي المكيف ) ويصير معهم
خمسه وخمسين الف !!!!!
المهم يتقدمون لاهل البنت ام خدود وعيون وشعر وبعد السؤال وحرق الاعصاب يوافقون بس
بشروط :
1- المهر خمسين الف .
2- تسكن بشقه بلحالها .
3- الزواج في فندق او صاله في احد احياء الشمال ( مهوب الشفا والا البديعه )
4- يسفرها بعد الزواج لمدة عشرة ايام على الاقل خارج المملكة .
5- يسوون حفلة خطوبه وماعندهم مانع اذا في استراحه .
6- الدخله تكون في فندق خمس نجوم . ثلاث ليالي على الاقل .
7- الذهب ما يقل عن عشرين الف . غير الشبكه انت وذوقك .
8- بس .
المشكله ان ها الحكي ما صار الا بعد ما الولد شاف فلانه ام خدود وعيون وشعر ( وهو مستحي
اصلاً ورايح فيها ) يعني ما انتبه الا للون التنوره ويمكن شم ريحة العطر بس . وهو اصلا ما شاف
من جنس الحريم الا امه والسرلنكيه حقة جيرانهم وهي تكب الزباله الصبح . يعني الولد تولع
وضاع , الابو يقول وشلون بندبر هاالي طلبوا وانا الي معنا يادوب المهر . والولد ما بقى الا
يصيح مسيكين لدرجة انه قام يرفع صوته على ابوه وامه , تصرفوا ما علي منكم ياربيييييييييه (
صار هزار ) المهم دورو لهم واحد من هوامير الونيتات الله يخليهم لنا علشان يدينهم ولقولهم واحد
طيب وبن حلال باعهم الونيت بخمسه وثمانين اقساط قيمة القسط الفين وشراه منهم بخمسة
واربعين ( تبون تبيعون علي والا انتم حرين بيعوه في أي مكان , بس انا فلوسي جاهزه ) المهم
بناءً على طلبات الجماعه والامور الاخرى الموضوع يبيله ونيتين غمارتين وونيت غماره , يتحمل
الابو اقساط ونيتين والولد ونيت واحد قسطة الفين وهو راتبه ثلاثة الاف وخمسمية ريال
؟؟؟؟؟؟؟؟؟؟؟؟؟؟؟؟ ( الحمد لله ) .
وتعدي الايام ويملك الولد ويقوم يتلكك بأي شي علشان يتصل عليهم عل وعسى ترد هي والا
يزرق لبيتهم ويترزز ويتميلح وهي بعد ما تقصر معه بذاك الاسلوب والا اذا صار بيجيهم تعدلت ولا
كنها رايحه لعرس . والولد يحترق ويحلم بأنه بيعيش حياة ما يشوفها الا في الاحلام وتمر الايام
ويتزوجون . واول ثلاثة شهور تمر زي الساعه حياة ولا احلى منها ويرجع الولد للدوام مبسوط
نشيط ويمر شهر ورا شهر وتبدأ المشاكل تظهر ( راعي الونيت يبي القسط ,,, وخصوصاً ان عليه
قسط متأخر لأنه ذاك الشهر ما دفع وهذولا عسى ما يمسكون عليك شي ,, يذلونك ,, تلفونات
وزيارات وشكاوي وفضايح , والمكتب العقاري يبي اجار الشقه ,, وواحد متسلف منه خمستلاف
علشان سفرة شهر العسل مغير يحدده , وكلهم يبون حقهم وكلهم معهم حق , وتزيد
الضغوط ,,مسكين الولد كل يوم على ها الحاله . يرجع للبيت علشان يرتاح وينسى همه شوي
يرجع وهو مأمل ان ها الي في البيت بتنسيه المشاكل شوي , وهو عند الباب ما دخل يسمع
صوتها تسولف وتضحك بالتلفون مع صديقتها , امها , اختها , قطوتها أي شي ... . لكن يوم دخل
الا وش يشوف قدامه ؟ وحده جالسه رابطه راسها لابسه اشين شي عندها ويوم سمعت صوته
كشرت وقامت تتونون كنها عجوز , يسلم عليها يالله ترد يسألها سلامات وليته ما سألها ! تشغل ا
المسجل , انا راسي ,,, رجولي ,,, ظهري ,,, ما رقدت طول الليل وانت مغير تشاخر ما دريت
عني , وتراني ما سويت غدا ما قدرت , تعبانه , يرد خير حبيبتي مهيب مشكله اروح اجيب والا
اطلب بالتلفون , ترد هي اطلب لك بالحالك انا مالي نفس وهي توها لاغه الفطور بنت ال........
يحاول معها لكن ما فيه فايدة , تنسد نفسه ويقول لها انا بروح ارقد واذا قمت يكون خير , ترد
عليه وتقول له لا تطول علشان ابغاك توديني لبيت اهلي خواتي متجمعات , يرد خير انشا الله ,
راح يرقد في المجلس علشان ما تزعجه وهي تلبس , المهم يوم صحى الا وش يشوف قدامه .
نانسي ,, هيفاء ,, باسكال ,, يخسون ,,, يقوم يتميلح ويستخف دمه وهي ترد عليه وتقول
كان ما قمت هذا وانا قايلتلك لا تطول يالله قم ودني بسرعة ,, يرد عليها حياتي طيب اكل أي
شي , تقول ما سويت شي , طيب بيالة شاهي , يابن الحلال اذا وصلتني ارجع واشرب الي تبي
يعني حتى لاتدخل تتقهوى في بيت اهلي , وهم طالعين ,,,, شف الصينية الي في المطبخ الي
فيها الكيك والبسبوسة جبها ما اقدر اشيلها ثقيله وحارة .......... توها تقول ما سوت شي – طيب
حطيله قطيعه في صحين .
المهم يوصلها ,, يوم جت الساعه حدعش يتصل عليها ترد عليه تو الناس خلني جالسه شوي ,,
يابنت الحلال انا بكره وراي دوام . اف ناوي ترقد بدري الليله صحيح انك شايب ( تقولها بدلع ) ,,
يقول لا مو قصدي اذا تبينا نسهر نسهر ليش لا ,, تقول خلاص شوي واكلمك بس اتعشى , يرد
عليها حتى انا ما تعشيت , تقول له خلاص قوم سولك بيض وتعشا لين اتصل عليك ,, يسويله
عشى ويتعشى و يقعد الرجال يقلب في ها الدش وهو يراقب التلفون ( على نار قاعد ) كل شوي
رافع السماعه يشوف هو التلفون شغال , مسكين ,,,, ويوم جت الساعه وحده ونص الا حضرتها
متصله يالله تعال ولا تتأخر , يوصل عند باب بيتهم وتطلع هي واختها ويركبون معه يالله وصل
اختي لبيتها هو ساكن في الروضة واهلها في الصحافة واختها في الشفا يعني مشوار ساعه
على الاقل المهم طول الوقت وزوجته تسولف مع اختها وتضحك وهو في داخله مبسوط ويقول
في نفسه شكل مزاجها رايق , بس وصلو اختها ومشى الا وسدحت المرتبه شوي ,, حط يده على
يدها الرومنسي وخرت يدها بقوه عنه وعطته نظره على كيف كيفك , يسألها وش فيك تقول له
اف اسكت عني تراني مصدعه وتعبانه ومالي خلق لأي شي . ويرجعون للبيت وترجع هي زي ما
كانت قبل يطلعون .[/align]
[align=center],,,, ولكم تحياتي
بريق الماس [/align]
رد مع اقتباس
المشاركة الأصلية كتبت بواسطة (مـــرام)
