أعزائي / بعد التحية وفائق الاحترام ...
احرجتوني بأستقبالكم الحار , بس قبل ما ابداء ودي اوضح لكم قصة اسمي ( بريق الماس ) اذا يهمكم والي ما يهمه يغير المحطة .
طبيعي أن أول ماتقرون الاسم على طول يشتغل شريط مزعل فرحان بنت النور ... وتقولون وشذا الرومانسي الي دخل عرض ( رومانسي ومزعل .. ايه هين ) وطبيعي انكم عارفين معنى الاسم الي اخترته أو تعتقدون كذا ... لكن في حقيقة الأمر الموضوع يختلف بالمرة وها الاسم له قصه راح أقولها لكم لكن بعد الفاصل الإعلاني ( يكون تشويق ) ....
القصة : يوم من الأيام كنت انا واحد الأصدقاء في زيارة لإحدى الدول العربية المجاورة ( مهيب مجاورة مره .. هه يعني ) المهم هالديرة مشهورة بالشاي الأخضر وجوها بارد شوي وكنت أنا وصديقي نعز شي اسمه شاهي لدرجة انا شناطنا مافيها هدوم مغير شاهي ( امزح وحده صغيرة فيها هدوم ) . المهم يوم وصلنا ذيك الديرة وكانت أول مرة نزورها خذينا لنا ذيك الغرفة في ذاك الفندق منيب قايل اسمه علشان ماتدرون أن الديرة الي انا اقصد ( المغرب ) ( أحلى يعني شوفوني رايح المغرب ) المهم جلسنا شوي مير كان تشتغل خرمة الشاهي , كان نطلب - فاصل أعلاني – يوم جتنا الفاتورة لين سعر الشاهي يروع يعني بحسبة بسيطة حدنا يومين بس , والروحه للمطار مشي بعد , المهم اني اقترحت على صاحبي ان مدام عزبتنا معنا و ( البريق ) معنا ليش مانصلح الشاهي حنا ( حنا والا مناكير .. قدييييييييم ) المهم قال كيف وحنا في فندق مهوب شقة الله يشق بطنك ( اصله عصبي شوي ) قلت بسيطة نشتري لنا غلاية والا ( قز) من ذولاك الي على كهرب ونقوم ندهر , جازت الفكره لصاحبي ونزلنا على طول نتمشى وندور الي حنا نبي ( مطفوقين ) وكان الجو وش حلوه مطر وعواصف وبرد على كيف كيفك ( على فكه سفرتنا كانت في الشتاء – كيفنا وش دخلكم ) المهم رحنا لسوق عندهم .. نسيت اسمه .. زي حراج بن قاسم ( قوية ) ومرينا من عند ذيك العجيز الي حاطه لها مضلة وقاعده تبيع ( بسطه ) وحنا نتفرج على بضاعتها شفنا ذاك القز الصغير الي على كهرب 220 يحبه قلبك , من نظافته وحلاوته تحس ان ها العجيز لاقيته في .... المهم شريناه – ما عندنا وقت – رحنا ووسعنا صدورنا , يوم رجعنا للغرفة وكنا متعشين ذيك العشوة المعتبره ,, قررنا نسوي شاهي ( الله لايعيد ذاك الشاهي ) المهم عبينا البريق مويه ( يعني وش بتعبيه ) وحطينا شاهي تلقيمة من زود الخرمه وشبكنا القز في الكهرب الـ220 وقعدنا نحتريه لين فاح - كهرب 220 مش أي كلام – وقمت وكالعادة بما اني احب اللقافة يعني ( خدوم ) باصب الشاهي - فاصل اعلاني – وما امداني احط يدي على ( البريق ) الا وذيك الرفسه من خويي ( بزعمه يمزح ) الي خلت ضغطي يوصل بقيق كان ارفع البريق وانطله مع الدريشه من الزعل ( زين ان حنا في الدور الارضي .. والا كان علوم ) ( فندق ودور ارضي ... يالله ) على شان كذا اخترت بريق الماس لآن لفظها جميل ومعناها اجمل . والا انا اسمي خالد مسميني على جدي عبدالله ....
ولكم تحياتي ,,,,
رد مع اقتباس
اشوني منب الابريق مير
