الوجه لو يضحك ترى البغض مكشوف
تأتي عليه من اللسان الدلايل
***
في هرج عن معناه مايل ومحروف
يكشف من أعماق النفوس الدخايل
***
وينبِّه الواقف على حيد وهيوف
لا تطيح رجله في دقاق الحبايل
***
ليه الكلام مشرَّع أرماح وسيوف
من دون داعي حق حرب وهوايل
***
فرسانها في ملبس الغدر والخوف
وميزانها بين الموازين مايل
***
كم ظرف مشيته وكم ظرف موقوف
راعيه عن عدل المناهيج عايل
***
مدري متى يستوعب العقل ونشوف
ونجيب من حلو الكلام المثايل
***
الكلمه الحسنا لها فعل معروف
مثل النسيم اللي يسوق المخايل
***
ينزل هميله فوق ريضان وخيوف
وتفيض من بعد الدهور المسايل
***
يزهر بها عشب المودات ويزوف
ويغسل بها حقد الصدور الغوايل
***
يا هيه ما يمضي على الناس موصوف
ما تاه عن درب المعاريف سايل
***
هذي رسايل خط بنظام وحروف
لو ما يعدل الحال خط ورسايل
***
والطيب ما بين الرجاجيل مالوف
والعذر ما يزري عيال الحمايل
***
رد مع اقتباس
