السلســــــــــال ...
على الهون يا جرح المفارق وضيق البال
على الهون يا جرحٍ صطى بي وقدرته
اعزك لو انك جرح ومجاهدك قتال
وروضت جسمي لجل سقمك وصبرته
لجل من ملك قلبي من الجال لين الجال
وفجيت له بابٍ عن الناس سكرته
وحطيت له عن شمس قيظ الغرام ظلال
وشيدت له بيتٍ بقلبي وعمرته
عشقته ودللته وجريت له موال
تخيرت قربه ليتني ما تخيرته
رعى ريف قلبي لين صار الحشا مدهال
وعن مدهله جنبت غيره وذيرته
سقيته من عدود الغلا والغرام زلال
بعد ما جذب من دم قلبي وصدرته
اداري عليه من الزعل وازعل العذال
خطاه ان كبر في عين غيري تصاغرته
ترافقت انا وياه من يوم كنا اطفال
تكون غلاه بوسط قلبي وكبرته
قبل ما يغطي ليله المنتثر بالشال
سرقت الكرى من نون عينه وسهرته
نقش كل حرفٍ من حروفي على السلسال
تباهى بها واغاظ ناسٍ مجاكرته
كتبت القصايد في عيونه على اليامال
وليا مرني صوت النواخذ تذكرته
تكاثر علي الله يجازيه كيف الحال
وانا يوم اسوق العمر له ما تكاثرته
بعد كل هالتقدير والحب والاجلال
تغير وهقواته عليه مغيرته
لبسته ثياب الغطرسه لين جا يختال
كبر في عيونه يوم الاوهام غررته
واذا السالفه ضحك ومهازل ولعب عيال
خبطت الغصن لين ابرق الريش طيرته
خلصنا وقفلنا الصناديق بالاقفال
ومن جور حكمه كامل القلب حررته
للشاعر : تركي الميزاني ...
رد مع اقتباس
المشاركة الأصلية كتبت بواسطة دفنت قلبي ~
