السلام عليكم ورحمة الله
للتواصل فقط, أهديكم هذه المتواضعة وسامحونا على مسكة الخط,,,
[poem=font=",6,darkblue,normal,normal" bkcolor="transparent" bkimage="" border="none,4," type=2 line=0 align=center use=ex num="0,black""]
كم واحدً يرمي ويحْسبه بيصيب = وما كل من لا من نوى شي صابه
وكلً له آمال وآماني ومطاليب = وما كل من لا راد مطلوب جابه
ويالله يالمعبود يا عالم الغيب = يالواحد الي كل خلقه تهابه
أفرج لمن هو بالعنى طاله الشيب = ميل عليه الوقت وأفنى زهابه
عذروبه وعذروب أمثاله الطيب = في عالمً ما حسبوا له حسابه
الصدر مجلس والحنايا معازيب = لهمومي الي كلها ما تشابه
والضيف له عند الأجاويد توجيب = وقلبي يجود لضيفه الي غدى به
يا قلبِ يا زبن الجروح المعاطيب = يالي تلوع في صباه وشبابه
يا قلب خذ من حكمة أهل التجاريب = كان الزمن حاباك والا أنت حابه
ما فات فايت والمؤمل ترى غيب = لا تقلب العمر بسواتك كآبه
وحاجات عمري أولوية وترتيب = ما قصر عن الواجب ولا طرد سرابه
واجزي واكافي راعي الطيب بالطيب = وعندي على المقرود صبر ورحابه
واسند رفيقي لا دهته المصاعيب = واشيل حمله لين أخفف مصابه
أدرى وأداري مع جميع الأصاحيب = والي جفاني قلت طاح ابحسابه
وما كل صاحب ينحسب فالمكاسيب = وما ضر قلبي غير زود الحبابه
جربت ناس وشفت منهم أعاجيب = أهل الحكي ولا السراير خرابه
الي خذلني في نهار المواجيب = والي ليا قفَّى رفيقه حكى به
ويا قلب خلك من ظلام السراديب = أبغيك تزرع لك بـ لآمال غابه
ودنياي مهما كدرت لي مشاريب = كم حر قبلي قد تكدر شرابه
دنيا تحبَّل للبشر بالمقاليب = يشبع بها الحصني وتجوع الذيابه
غدر وخيانة وانفلاتً و(تغريب) = وش عاد باقي للعرب من مهابه
واليوم بنت اللاش بين الأشانيب = تامر وتنهى والمبادي مُذابه
وما عمرها قد عاشت الشات والذيب = الا مسافة مخلب الذيب ونابه
وللطيب منهاجاً وللخبث أساليب = والحر حرً والزلابه زلابه
ويا قلب كانك يجذبنك جواذيب = لديار ولا اصحاب ولا قرابه
أبشر بعزك لو على ضمَّر النيب = وادري دهاك اليوم شوق وصبابه
شوقً يسوقك يم سيد الرعابيب = أبو جديلً يتعبه لا مشى به
ذاك الجفول الي بخل بالمكاتيب = ما يامن أحدً فيه حتى ثيابه
نظرة عيونه لي سلاماً وترحيب = وصده سؤالً ما لقينا جوابه
يا ما سهرنا من عيونه مصاويب = تدمي حرابه مير محلى حرابه
ودامه تربع من ورى هالمحاديب = يامر على العينين حضرة جنابه
وياقلب كانك طاولتك اللواهيب = وكسيت وجهي من همومك شحابه
دمعة خشوعً في ظِلال المحاريب = نرجي بها الي ما يخيب الرجابه
يكشف هموم القلب ويمن ويجيب = ما نلتجي بغيره ونرجي ثوابه
والعمر رحلة والمنايا كلاليب = والي خطاك اليوم باكر صوابه
وكلً له آمال وأماني ومطاليب = والعبد ماله غير ما في كتابه
[/poem]
وسلامتكم,,,,
وهذه القصيدة على اليوتيوب لمن يريدها سماع
YouTube - ‫ط¹ط¨ط¯ط§ظ„ظ…ط****ط³ظ� �� ط¢ظ„ ظ…ط´ط§ط±ظٹ .ظƒظ… ظˆط§ط****ط¯ظ‹ ظٹط±ظ…ظٹ ظˆظٹط****ط³ط¨ظ‡ ط¨ظٹطµظٹط¨‬‎
رد مع اقتباس
المشاركة الأصلية كتبت بواسطة ساميه
