دحوم وينك....!!!!

[طالبة قانون]

"دحوم وينك...تكفى تعالي الكلية ...فديتك واالله الله لايخليني من ها الصوت وراعية"
بتقولون وش المناسبة لاسلام ولا غيرة ..السلام عليكم
هذة وحدة كانت تكلم اخوها بصراحة عجبني اسلوبها ...يعني با الاول قلت وش ذي ...
مع السوالف عرفت انها البنت الوحيدة من 4 شباب وامها متوفية ...فسألتها من باب الاستغراب :لية ها الاسلوب؟؟
قالت ابيهم يعدوني لهم اخت وصديقة وامي وخالة وحتى جدة ههههه...
فعلا لية مانتعامل مع اخواننا بها الاسلوب ..اتوقع مافية بنت الا لها اخ ...
يعني لو اروح سوق اذكرة بتي شيرت ...او جنز ...او حتى "كبك"
اجلس معاة قهوة وشاهي واسالة كيف دراستك ....وش مسوي بدوامك...
جاء متاخر مثلا :انشغلت عليك ...ما تبي احط لك عشاء ...!!!لاتزعل يااخوي بس اخاف عليك من لي غيرك..!! انادية مثلا باسم يحبة "ابو سعود"..."ابو خالد" عطاني فلوس جعلها عشرة "كثر الله خيرك" تعدل وتظبط بيروح زواج خوية "وش ها الزيييين صلاة على النبي محمد"وشوفي الكشرة لا عاد لاصار مريض هذة عاد مايبيلها كلام
انا احس لو احنا البنات لو نتعامل معهم كذا بيحس ان فعلا اختي تحبني يعني اشياء كثييييييييرة اقدر اسويها ومع الايام بيتغيري وتلاقينةهو من نفسة يقولك صاري كذا والله ضايق من ذاك الشي ...!!
فاحسيت ان احنا بنات حواء مقصرين بحق اخوانا نوعا ما!!!فعلا لية مايكون اسلوبنا كذا من باب الاحترام !!!
>>واذا ماجاز لكم الموضوع احذفوة لاني بصراحة احب اتكلم با العامية..!!!

[ريـمـانـاآ]

وش دعوة اكيد جاز لنا ونص .. =)

فعلا .. هذا المفرووض اللي يصيير .. الاحتراام المتبادل بين الاخت واخووها ..

لأن هو الذراع اليمين والعزوة والسند للبنت بعد أبوها ..

مشكوورة اختي على موضوعس المميز ..

لاخلا ولا عدم ..

بانتظاار جديدك المميز ..

[طالبة قانون]

فديت ها الطلة ....

[أبوعبدالرحمن]

الله يعطيك العافية اختي

وطرح جميل لموضوع لم يتطرق له أحد سابقاً ولم أشاهده في المنتديات

يسعدني أن أتابع الأراءحول ما قمتِ بطرحه هنا

تحيتي لكِ

[نبض الامومه]

شـكــ وبارك الله فيك ـــرا لك ... لك مني أجمل تحية .
فديتهم والله
من غير أخوانا ما نسوى شي

[حسن1981]

طالبة قانون
فعلا موضوع مميز
لابد من كسر الحواجز بين الاشقاء سواء الاخت لاخيها والاخ لاخته
شـكــ وبارك الله فيك ـــرا لك

[ريموو]

وليه ينحذف يالغلآ طرحك للموضوع واضح ورائع وجاز لي
ليس مجاملة بل حقيقة
وبصراحة أأيد آن كل البنوتآت يتعآملوت مع آخونهم كذآ
عسآنآ مآننحرم منهم


ننتظر جديك ياطالبة القآنون

[طالبة قانون]

يالبى وجودكم هنيا...لكم ودي ووردي

[عبدالله بن راجس]

الله يعطيك العافية اختي

وطرح جميل لموضوع لم يتطرق له أحد سابقاً ولم أشاهده في المنتديات

يسعدني أن أتباع الأراء لما قمتِ بطرحه هنا

ياليت جنسك كثير بجد
تحيتي لكِ

[حنكشة]

اللــه يعطيك العافية وكثر من امثالـك

[جروح نازفة]

[align=center]

موضوع غاية في الروعه
لكن بالنسبه لي مو جديد تعاملي مع اخواني بهاذي الطريقة ومو قصدي امدح نفسي لكني تربيت على هاذي العادة وبصراحة الاخوان سند في كل الاحوال ومانعرفهم الا وقت الشدايد حتى لو كانوا شوي عصبيين
تقبلو تحياتي

[/align]

[محمد بن ضاوي]

طالبة قانون ...


حقيقه ابدعتي في موضوعك ومثل ماقالو الاخوان اللي قبلي انا والله اول مره اشوف موضوع مثل كذا

يسلم فكرك صراحه على هالفكره والمبادره الطيبه

اما بالنسبه للتواصل بين الاخوان فهو للاسف يشكي ههههه قلوب قاسيه ماتبين عواطفها ابد

صحيح انو في حب كبير بس بدون مايبان
وتبين الصراحه اجمل مافي الموضوع سالفة الهدايا ليتها تتم ههههه

[سليمان الذويخ]

يعني لو اروح سوق اذكرة بتي شيرت ...او جنز ...او حتى "كبك"

مسكين يا اللي مالوه دحووم

اما عاد ( كبك ) هذي شيء
طيب واللي مثلي كلاسيكي ما عمره لبس ولا لمس هالكبك اللي يقولون



صراحة :
كثير من البنات والعيال ( شبابنا )
يفتقد للعاطفة
وفقير جدا بالرقة في التعامل مع اهله

وهذا يعود لسلوكيات مجتمعية ( جلفه و فظه ) ليست من الإسلام في شيء

وإنما الزمنا انفسنا بها فكانت على حساب ديننا

بعضهم تجده يبخل بكلمة طيبة على اخته أو خالته مثلا
ويغدق بها على تافهة اصطادته بطريقة من طرق الاتصال !!

ربنا سبحانه وتعالى عندما وصف نبيه الكريم عليه أفضل الصلاة وأتم التسليم قال :

( وإنك على خلق عظيم )
وقال سبحانه :
( ولو كنت فظا غليظ القلب لأنفضوا من حولك )
وقال :
( لقد جاءكم رسول من انفسكم عزيز عليه ما عنتم حريص عليكم بالمؤمنين رؤوف رحيم )

اين من هذا من يقول لمحدثه : امي ( اعزك الله )
او : الحرمه ( اكرمكم الله )
اف له ولما قال !
ايساوي امه او زوجته بما يستحق ان نقول عند ذكره ( اكرمكم الله ) !!!؟؟؟؟


موضوع راقٍ و راق لي
بارك الله فيكم و وفقكم

[صالح الروقي]

سلمت الانامل
اختي طالبه

وسلم فكرك النير

موضوع مميز وهادف

ويتناول نقطه مهمه غفل عنها الكثير من الاخوان
سواء اخ او اخت

وعزي لمن ليس له اخ او اخت

الف شكر لك اختي

ولك ودي وتقديري

[black_water]

مشكوورة اختي على موضوعس المميز ..

لاخلا ولا عدم ..