السلام عليكم
كيفكم عساكم تزقحون ومستانسين ومبروك عليك العشر ومن العايدين والله الله في الضحايا الطيبه ياللي تبي تضحون :)
بالصراحه انا عندي موضوع احترت وين احطه فيه لكن سويت قرعه ومناقصه ورست المناقصه على هالقسم .....
بعض الناس انهبلت ولا هي منهبله خلقه السالفه ومافيها يالربع والنصوص والكاملين :)
وانا اتصفح في احد المواقع التجاريه الخاصه بالبيع والشراء في العقار لو اخاف اني اسوي لهم دعايه كان قلت لكم اسمه لكن مايهمكم اسمه يهمكم موضوعي :)
الا اشوف هاك الاعلان
اللي واصله الردود فيه حوالي 200 رد بيت للبيع وقريه كامله للبيع
لظروف السفر والابتعاث ؟!!!
وبسعر مغري بترا فيان
وحاط رقم جواله
المهم وانا ادق عليه قلت قام حظك يابو صلوح وتبي تشتري لك بيت شمال الرياض :)
حلم اي مواطن سعودي وربما اصبح مستحيل :) في هذا الوقت ...
ولعله يبيع ومحتاج ونستفيد كم قرش بعد ترميم البيت
وجلست افكر وين هالحي فيه الي اسمه ترافيان
مايهم يمكن من الاحياء الجديده وطقتها
وانا الي ادق
حاط صدى اغنية طلال مداح كنغمة رن (مقادير ياقلب العناء )
قلت شكله عنده ظروف قاهره والرجال غرقان لراسه ويبي يبيع باسرع وقت
وارجع ريوس للاعلان قلت ابي اشوف السوم كم ان كان هو حول فلوسي ابي اتفاوض معه واناضر الى السوم بحدود 2500 قلت حلو شكلهم يقولون ب250000
لكن الربع مخطين في الكتابه
المهم
رد مرحبا
قلت السلام عليكم
قال وعليكم السلام
كيف حالك اخوي ان شاء الله تمام
قال الحمدلله
قلت شفت اعلانك لبيع البيت
البيت جديد ولا قديم ؟
قال جديد من بدايات 2007
قلت كم سيم وحدك يالغالي
قال منيب طماع
وتراي سمح
وانا الي اقول بقلبي عساه دور وفوق شقتين ابي اسكن واستثمر وفيه مسبح وبايكه وبيت شعر
ومكيفات اسبيلت والبويه بروفايل والواجهه حجر والجيران زينين والمساحه مناسبه
المهم قلت وش المواصفات
وهو الي يقول
اخوي من جد فرصه لاتفوتك قال اسم الولد الله يسلمك قلت منير الله يجيبه ان شاء الله :)
قال هذي الموصفات يابو منيرقريتي في ترافيان
وانا الي اهوجس واقول شكله مطنوخ راعي قرى وشاليهات ومنتزهات
قلت الله يزيدك من نعيمه
شوي ويقول
عدد السكان 4077
لها 6 قرى فرعية
قلت ماشاء الله تبارك الله
اشتراك قوي 20 على السيرفر
ترتيب القرية 1250
فيها320 ذهب (قلت شكل البير الارتوازي يسمونه ذهب من زود غلاه )
والمطلوب 2500ريال يالشيخ
قلت وش الي ب2500
قلت بقلبي شكله مكثر اللبن او ان البيت فيه مشكله او عليه من قروض الصندوق العقاري دبل وثري او فيه جن :) وش هالسعر
اكيد انه مهوب صاحي لا بالله 2500اكيد مهبول ولا يحسبني باستاجر يومي
وانا الي اسئله
بكم
قال 2500
وانا الي اصرخ واقول انت صادق ولا تمزح
قال جاد يابو منير ولولا الظروف قسم بالله ما ابيعها ؟؟؟
وانا الي اسئله الصك بسمك ؟؟ البيت عليه مشاكل ارث او غيره ؟
الحي معتمد من الامانه ؟؟؟؟؟
الخدمات واصله ؟؟
قال ياخوي انت وش فيك اي ارث واي مشاكل واي خدمات وهو الي يحطه على السبيكر
قلت شكلي احرجته والرجال حساس
قلت له
والبيت وينه فيه ؟؟؟؟؟؟
قال بترافيان
قلت وترافيان باي مكان ؟
قال ايش ؟
من قال ايش قلت شكلي غلطت قلت ياشيخ
الله يطول بعمرك حي ترافيان وين مكانه فيه ؟
لان كل يوم طالع حي جديد بالرياض وتمشي جهت الشمال شكلها خمس سنوات وتدق في المجمعه شمالا ورماح شرقاً
قال تستهبل انت ؟
قلت لا والله منيب استهبل اول مره اسمع بالحي
قال اي حي
قلت اللي انت باني فيه حي الترافيان
وهو يضحك واسمع ضحكات من حوله اثره حاطه ع السبيكر
قال انت ماعندك كمبيوتر قلت الا عندي كمبيوتر ولو ماعندي ماحصلت اعلانك
قال ولا عمرك دخلت ترافيان قلت ابد مااعرف هالحي
حدي منتديات الاسهم ؟
قال ترافيان لعبه
واشتراك السيرفر33
قلت وش تقول ؟
وانا اقطع الخط
مااستوعبت السالفه وش
وطار الحلم وقلت تبطي عظم ياصالح ماشريت بيت
واخذ خمس دقايق
ويدق علي قال ياخوي ترى فيه زبائن يتصلون يبي يشترون لا تفوتك القريه
قلت اقول
مايشتري منك الا المسطول اللي مثلك
انت فاضي
واصحاب العقول في نعمه
قال الشرهه ماهي عليك على اللي يبي لك الخير
قلت انت وجهك وجه فقر اصلا
ياحسافه سبع دقايق اتصال قضيتها معك يالنصاب
عاد عمي كان جالس بجني
قال صالح
قلت نعم
قال نعامه تفقع وجهك
انت ماعندك اسلوب
كيف تتصل على الرجال تبي تشتري منه البيت ثمن اخرتها تتكلم عليه
قلت اقول ياعمي
ليتك تسكت عني
بلاك والله ماتدري وش اللي يبيعه
قال اصلا وجهك ماهو وجه يبي يشتري بيت
انت حدك خيمه عمودين وتخب عليك
قلت اقول سامحك الله ياعمي
وسبب لي هالبيت الشحناء بيني وبين عمي :)
وتاليها حسبي الله ونعم الوكيل
وحسبي على ترافيان هبلت بشبابنا هالالعاب
تحياتي لكم
رد مع اقتباس
المشاركة الأصلية كتبت بواسطة غلا أبوها
