يا ظالمه يا ظالمه
ياللي بجرحي عالمه
إن جيت ابشرح لك عناي
لا شك منتي فاهمه
كل السوالف مبهمه
ودروب حبك مظلمه
والحال ربي يعلمه
همي بقلبي كاتمه
لا صارت القصة كذا
ما عاد ابي هذا وذا
وش فايدة حبك إذا
أموت وانتي سالمه
لو جيت ابحسبها لقيت
إني كتبتك ( ألف بيت )
ما بين ( لو ) وبين ( ليت )
سهرت وانتي نايمه
قلتي لي ( احسن ) نفترق
قبل المشاعر تحترق
وانا اللي اول استرق
لحظات اظنّك هايمه
وانتي خذيتي الحب مزح
وانا خذيت الحب جرح
دامك هدمتي كل صرح
فالحل ( ضربه حاسمه )
الحين في عيوني تساوى
لو نفترق وإلا نتخاوى !!
والحب لا منّه تهاوى
فرقاه حاجة لازمه
الحب عقاله قليل
يا اللي هويتي ( عشق ليل )
ربي جعلني لك خليل
( عاقل تحبّه غاشمه )
العشق في ( علم النحو )
( فاعل ) ويمحينا محو
والجو لو إنه صحو
دنياك دايم غايمه
تلغين إحساس الحبيب
اللي على جروحك طبيب
كلمات يفهمها اللبيب
يا هوه شكلك واهمه
لا تحسبين الحب حرب
إن جيت شرق ألقاك غرب
وإذا ( قسمت ) ألقاك ( ضرب )
وفي ( الضرب ) اشوفك ( قاسمه )
حبيت اعلمك الوضوح
وانتي نويتي لي الجروح
لو كنت في ظلمك ببوح
ثلثه يهزّ العاصمه
الله الله في خصامك
والعتب داخل كلامك
والا انا ما اسأل علامك
واثق بأنك لايمه
لو قلت اسامح ما يسامح
خافقٍ قبل امس جامح
لا الخيال ولا الملامح
ولا قصايد حالمه
ولا العذر وإلا ظروفك
أو صدى نبرات خوفك
حلفتي إني ما اشوفك
وش فيك منتي عازمه ؟!!
بكرة تجين او بعد بكرة
تطرين حب ٍ مات ذكره
وانا اللي لا عزّمت أكره
اكره ولوّك نادمه
ما عاد ينفعك الندم
تحيين حي من العدم
او تعمرين اللي انهدم
وقلوبنا متخاصمه
حبك يسّمى ( مهزله )
لا بد قلبي يعزله
كنتي على ارفع منزله
والحكم عاف حاكمه
والحكم عاف حاكمه
والحكم عاف حاكمه
رد مع اقتباس
المشاركة الأصلية كتبت بواسطة عشق ليل
