بسم الله الرحمن الرحيم
السلام عليكم
أكيد أنكم دريتو عن سفرتي الأخيره لمصر ودريتو عن سبب السفره الطاريء
أيه الدنيا صغيره والحشريين واجد أكيد أكيدالعلوم جتكم<<موسوس الله لايبلانا ههههههه
عاد أنا أبكع الحقيقه عشان تدرون أن أكثر الكلام اللي وصلكم غير صحيح<<نفس الحاله
ياساده ياكرام هذا صديقي الوحيد ورفيق دربي يحب بنت خالته حباً جما..
ويوم أن المسكين قرر يصارحها بالحب الدفين قالوا له صباح الخيررررر
البنت أنخطبت اليوم ..
اليوم لاااااااا.. قالو ألا والظاهر الجماعه طقوها بالملكه..
عاد صاحبي هذا أذا حب حب يعني ماعنده.. دخل في نوبه هستيريه ..
وبماأني أدري أن الرجال قول وفعل خفت عليه.. قلت سبحان الله لايسوي بنفسه شيء لاسمح الله ..
الرجال قول وفعل زي ماقلت لكم.. يعني لويطق الأنتحار براسه ينفذ على طول..
وبصراحه أنا ماني معترض على فكرة الأنتحار كمبدأ
بس ظروفي الراهنه ماتسمحلي أفقد هذا الشخص لأنه مصدر قوه وداعم رسمي لي..
يعني أطلق شنب مايقدر يقولي وش جابك مع سيب بيتنا بهالليل..:مزون:
للمعلوميه ترا ماني ((برخمه)) مررره مررره
بس تعرفون أني نشأت يتيم وعيال عمي ساكنين برى الرياض والوحده صعبه ياجماعه..
أصعب شيءعلى النفس أذا تجمعوا عليك عيال عم وأنت لحالك شيء يقهرصراحتاً
ياما سويت نفسي مريض عشان أمي ماتخليني أدرس <<يتكفخ فالطلعه ..
الله لايذكرعيالـــ....)) بالخير
المهم وش تسوي وش تسوي قلت في نفسي ياولد صديقك الوحيد تتركه لحاله بهالظروف مايسيييير..
ومن حسن الحظ أنه دوبي ماخذ قرض من البنك رحت وحجزت تذكرتين لأم الدنيا..
طبعاً ماحجزت ذهاب وأياب لأنه كان عندي أمل أن أهله يحولون عليه فلوس..
خصوصاً أذا درو أنه أكلها في زقمه وسافر معيي ماهو لخوفهم أني ماأصرف على ولدهم لاسمح لله..
لالا بس يعرفون أن حالتي لماديه ماش
المهم كلمته وقلت خلك برا جايك الحين..
أول مره قال لا لاتجيني ماني رايح معك..
فلت خلني أسوي فيها مهتم بوضعه وأصمّل عليه..
للأسف وافق من ثاني محاوله.. الله يهديه ماطول وإلا كان قلت سويت اللي عليك ياولد وماقصرت ..
تقضينا من البطحا وعلى المطار..خن بط في مطار القاهره ..أول تكسي ركبنا فيه وطرى علي أوديه مسجد السيده زينب..
مدري ليه طرى علي مسجد السيده زينب بس خمتني على الدين..
يمكن عشان الرجال ينشرح صدره أذا صلى.. مدري عشاني سمعت صوت ألأذان..والله مدري
بس الأكيد أني سويت نفسي أعرف الديره زين.. أيه عشان ماينصب علينا السواق >>أذكروا الله ترى العين حق
وبنبره فيها تقه واجد..قلت للسواق.. السيده لوسمحت ..
لاحضوا أني ماقلت بتودينا بكم عشان يظن أنا نعرف قيمة المشوار ومايزود السعر>>بعد أذكروا الله
المهم نزلنا في حي السيده وتفاجأت أن ماحولنا مسجد..
سألت خويي ياولد وين المسجد اللي نشوفه بالمسلسلات..قال أنا وش درااااااااني..
قلت أسكت ياغبي أنت ماتفهم أنت أبله تبي المصاريه يدرون أنا مانعرف شي وينصبون علينا
الهم ((أمرحنا))في فندق يمرش.. ماش ماهو بذاك الفندق اللي على البال ..
ومن صباح الله ((سرحنا))<<عشان أمرحنا ماتزعل ههههههههههه
نسوف مع هالشوارع ندور المسجد طبعاً بسريه تامه..الله الله أستعينواعلى قضاء حوائجكم
بالكتمان>> هذي مايحتاج تذكرون الله كأنها ماتحتاج ذكاء واجد..مدري
وآآآآآآآآآآه ثم آآآآآآآآآآآآه من الحب الدولي أثره بلوى.. تذكرون المسلسل اللي عرضوه في رمضان العام
مافيه بنت تبيع قرانيين أيييه اللي البلطقي جاب فيها العيد بعد ماشربوها بالخرابه
تذكرونها..ماتذكرونها دقايق بس أكلم خويي يعرف أسم الممثله ..
لحوووووول شكلي قلبت عليه المواجع ..يقول ناسي أسم الممثله..
بس المسلسل أسمه ((بنت من الزمن ده)) عرفتوها..
لقيت وحده نسخه منها وتبيع قرانيين بعد..
ولابسه زيها بالضبط رافعه ثوبها وعليها سروال أخظرطويل..
ورابطه راسها بفوطه برتقاليه..صح شكلها لك عليه بس لو يتعطيها خمسين جنيه تتزبط فيهم تطلع قمر
أول مره أحب خارج السعوديه .. ماش خبره كل مشاركتي محليّه
(( حب وفي ميدان السيده زينب تخيلوا وش بتكون النهايه ))
وهذا اللي قاهرني أكيد السفاره ماخلوا سعودي ماعلموه<<رجعت الوسوسه
ترى القصه واقعيه واللي ماهي عاجبته لايطول لسانه عشان مشاعري ماتتأذى
..
رد مع اقتباس
المشاركة الأصلية كتبت بواسطة الــــعــــاشـــق
