.
حوالي دقيقه
أبشر بعزك يالغضي جيت أبشرك=جيتك وانا عاشق ضما جف ريقه
وناديت الك ياشوق ما جيت أوخّرك=ودعني وكـــــلٍ يتابــع طـريـقـه
جيتك أبــاكحّـل عيوني وانــــاظرك = وأنبش معاك الذكريات العتيقه
من شان أسولف لك بحالي واخبرك=محتاج من وقتك حوالي دقيقه
أشرح لك الموقف ثواني وأخيّرك =وإخـتـار مــــا بيني وبين الخليقه
إنت الوحيد الي جرحني وعاذرك= وانت الوحـيـد الي تـنـسم رحيقه
لو غبت عن عيني أبنشد وأدوّرك=عاشق ضناه الشوق فاقد عشيقه
وخليت انا ربعي على شان خاطرك=واعطيت الك كل العهود الوثيقه
وما عاد بعد اليومِ لا يمكن أهجرك = حبي لك أتكوَّن معي بالسليقه
تبي تــدلل عــاد , مـاني بجـابـرك = لـكنّ في صدري بـلاوي وضيقه
والفرق واضح بين الايمان والشرك = مثل الفرق بين الوهم والحقيقه
لــو نـاسي الماضي تمهل وأذكّرك =يـــوم التقينا والـمـشـاعر رقيقه
قمت آتنومس بك واقلّب دفاترك = لين الحواس الخمس شبت حريقه
وما زال برقبتي علامات أظـافرك = لـكن جــروح الـقـلـب تبقى غميقه
مــا ني مــعــايــر لا ولا جيت أحــذرك = ما عاش مخلوق ويعاير رفيقه
وفي ذمتي ما جيت أبجرح مشاعرك = لكن فـراقك لا ولا عـاد أطيقه
ناجي الصقار
الشاعر ناجي الصقار محـتـاج من وقـتـك حـوالي دقـيـقـة
رد مع اقتباس
