السلام عليكم ورحمة الله وبركاته
إليكم هذه المحاولة علها أن تحوز على رضا ذائقتكم
الكامل الله والبشر ما تقبل أنصاف الحلول
والمصلحة غبة بحر واهل المصالح حوتها
راعي الفضيلة فارقه ربي عن اصحاب الفضول
لو كان في وسط المحافل تجتول ببشوتها
تبني مفاخرها على تاريخ ماضين الفعول
ولا بقا في امجادها ياكود نبرة صوتها
المال لو يشري مجامل ما قدر يشري قبول
وقلوب خلق الله لها بيبان مثل بيوتها
الانسان لغزٍ ما قدر في حلّه ارباب العقول
كم جثةٍ دفنت ومات السر في تابوتها
والناس ما ترضى الغموض اللي يوردها الذهول
ولا تبي شيٍّ من اطراف الصحيح يفوتها
اصدق مع الله يصدقك والكذب راعيه مخذول
ولا تلتفت للتهمة اللي ما تجيب ثبوتها
اعرف حقوق الناس واستر عيبها واحفظ الاصول
والناس حذرا لا تجي سبة لقطعة قوتها
لا تفرح بزلاتها , كل ارتفاع وله نزول
راعي الشماتة تالية الايام هو مشموتها
واهل المروّة لا تواخذها على جهل الجهول
واللين والحكمة تمهّل لا تحرق كروتها
الصبر مفتاح الفرج والزرع يثمر لو يطول
وقرايبك مثل الصلاة اللي تحل وقوتها
هذي تجارب والزمن لو دار في الاربع فصول
غُرّ النوايا باذن ربي ما تضيع بخوتها
واعمارنا مثل الزهور اللي تواليها ذبول
يا الله بحسن ختامها لا من تدانى موتها
محبكم
عبدالله بن راجس الخضاري الدوسري
::
::
رد مع اقتباس
