[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
التعب للفاهم الحر والدنيا خباوي = والبليد ايعيش وايموت بالدنيا بليد
كل ماقرّبت للنورشفت إني عماوي = وكل ماحس بوجودي أحس اني فقيد
وكل مابرّقت بالناس هنّيت الخلاوي = وكل ماعاندت عقلي متاهاتي تزيد
المناوي بعض الأحيان ياعسر المناوي = من مجرد كسرة الخبز للعقد الفريد
اخطبوا فينا ونمنا على حسن القراوي = واقتنعنا بالقناعة بفتوى كل سيد
أكرمونا بالبقايا وزدناهم دعاوي = والعطش بكفوفنا صار شيطانٍ مريد
الفكر جسر التعاسة وعنوان الشقاوي = اسألوا من فكره أضناه في وقتٍ عنيد
لاتفكر لاتفكر... تعيش بلا بلاوي = آفة العقل التفاكير والجاهل سعيد
عرش كسرى والممالك اجل وش هي تساوي = دامها دِفْنَت مع الوقت في صحرا جريد
وش نبي مدري اش نبي لين صار العود ذاوي = من هو اللي بس فينا عرف وش هو يريد
ياطريقي انت غربة وانا عايش جلاوي = والظلام اللي بعيني ابد ماهو جديد
مظلمة والرجل تشكي من غياب المخاوي = ياخويي وين طوّح ... بك الدرب البعيد
كل ماأرسلت لك صوت ينكس لي صداوي = الجبل أشفق عليّه ولكن وش يفيد ؟!
آه ياكثر الصناديد وأصحاب النخاوي = في نهارٍ .... الرخا فيه هو بيت القصيد
وآه ياشح الرجاجيل وكفوف النداوي = لاتحيزم كل حرٍّ بمحزمه الشديد
فلسفة تعقيد مدري خرافات وحزاوي = والخرافة بعض الأحيان مصدرها أكيد
وحي شاعر يطرد الليل مفزوعٍ ضماوي = يكتشف في آخر الدرب إنه هو طريد
تقنب ذيابٍ تحوفه وهو طخّه سماوي = كنّها لامن رماها دعت هل من مزيد
والسلاح من الذخيرة يكاد يكون خاوي = مابقى ياكود طلقة تحيد أوماتحيد
ياأخي ياتعب الأفكار يامقسى الرجاوي = ليتني أقدر ( أطنِّش ) مثل كل العبيد
ياأخي انس الحكاية وخلك بالغناوي = كان ودك راحة البال والعيش الرغيد
اشطب التاريخ واحذر تصدِّق قول راوي = مالك ومال النياشين والمجد التليد
عش مثل ماعاش بصري قضى عمره هواوي = بين حلوات العذارى قضى عمرٍ مديد
وإن غلبك الطبع مثلي ترى مالك مداوي = غير تصبر والصبر مر ... لكنه حميد
[/poem]