اليوم بسولف لكم عن الماسنجرات ومغامراتي الماسنجرية الهوتميلية
منذ نعومة اظافري في الانتر نت
كان طموحي أن احصل على ما سنجر وكنت اعتقد انه جهاز اضافي يآتي مع الكمبيوتر
(( ابوي وعدني بماسنجر اذا جبت شهادة الجامعة ))
المهم صار عندي ماسنجر وبرقم سري مميز وكان اول ماسنجر استخدمه
[email protected] <<< صراحة كل اللي يشوفه يقول حرام ان هالماسنجر معك
" لااحد يضيفه لاني ما افتحه نهائياً "
والله لا يوريكم هبلت بالعالم كل ما لقيت ماسنجر مرمي هنا او هنا لقطته واضفته عندي
وفي يوم من الايام وبينما انا وحدي في الماسنجراغيّر في اعداداتي الشخصية
إذا بوحده تطلب اضافتي
أنا فرحت لانها الوحيده أون لاين ويوم دريت انها بنت زادت فرحتي ولا تسألون ليه
وداربينا حوار جاب لي المغص :(
أنا احلف انها شنب وهي تبت يمين انها بنت ولا تزوجت :(
مدري ليه مركزه على انها ماتزوجت اكثر من تركيزها على انها بنت ( يمكن تخطط علي
المهم من كلامها واضح انها بدوووية وبدوووية وبقووووة
واحس انها تكتب وهي مقرطه في برقعها
ومرة قالت لي برب بلم شعري ( آي : عن اذنك سأجمع خصائل شعري )
والمرة الثانية قالت لي انا مقدر المس الفارة اخاف تصير بيضا
وقلت لها ليش توك عاجنه لك قرص ؟؟
قالت لا بس حاطه مناكير بيضا
قلت لها اخبر اللي يموت تصير اظافره بيضا << سدة نفس
ومره قالت لي وجهي بااااارد قلت لها توك تدرين ؟
قالت لا بس انا حاطه قناع للبشرة ..!!
وجلست احوس معها ساعة لين عرفت القناع
لانها تكتب كلمات لا تكتب في عالم النت
كلمات تنطق فقط
** فاصل **
كلمات ليست كالكلماااات ياخذني من فوق كيبوردي يزرعني في احلى البخشات
** عدنا **
ومن ابرز الكلمات اللي جابت لي الصداع
الماسنجر معيّي يشتغل = آي رفض تسجيل الدخول
هه وهه ومهوب لذيك الدرجة = آي حالته متوسطة وليست كما تريد
لعنّة = اللعن : الطرد والابعاد من رحمة الله والمقصود هنا الرفض بشدة
وجع و وجججججججججع = وهو نوع من الآلم وقد حذف الفعل والتقدير وجع يوجعك ياسعد
فيان = آي أين مكانه على وجه التحديد
تسيف امسيت = آي هل نمت جيداً
ومن الغرائب مع هذه الفتاه أنني حين سألتها كيف حصلتي على جهاز الكمبيوتر الخاص بك قالت : قلت لابوي
طق لي نت وطقه لي عساه ذخر فديته
قلت في نفسي والله لو انه جاب لك مكينة خياطه انه اصرف لك واوفر لابوك
ومره من المرات كنت اكلمها ولا ترد وقلت لها وش مشغلك
توقعوا وش قالت ؟؟؟
قالت : احمل فلاتر للفتوشوب
قلت : اعقببببببببببي اعقبي منتي بهينه ياراعية الخياطة .. وش اللي طمرك على الفتوشوب
صراحة اصدمتني بقووووة
وتعلمت اني ممكن اطلع هكر
إذا راعية الخياطه عرفت الفتوشوب فأنا تقاسيم وجهي تقاسيم وجه هكر
وبدل ماينادوني الناس يالخكري بينادوني يالهكي ههههههههههههههههههههههههه هههههههههههه
وقررت اني اتعلم آي شيء يطيح قدام خشتي يعني لو واحد يسوي لي توقيع اناشبه لين يعلمني كيف سواه
وقررت ايضا اتخلص من الناس المتخلفه اللي معي بالماسنجر " اهل السوالف "
واولهم نواف اللي حاط لي بلوك ولا معه بالماسنجر إلا انا وبرطم وجالسين بمقهى واحد :(
*
*
ما ودي اطول عليكم
بس اوعدكم بحلقات اسبوعيه لبعض مغامراتي الماسنجرية
عناوين بعض الحلقات
** سهم والاربعين شنب في ماسنجره
اقتباس من الموضوع __________
سهم هذا حكايته حكايه ..... مجمع الشنبات في ماسنجره .. عيال عمه + مدرسين + شعار من كل المنتديات
+ وسليم الباكستاني اللي يفرمت جهازه كل اسبوع ..................... ومعه بنتين وحده منهم عن مية بنت
لها 16 ماسنجر والثانية ماتنشاف خير شر ......... وحاط توقيع بالماسنجر (( يالله حيهم ))
_________________
** برطم ابوالحذف واللنكات الغريبة والخط الوردي
اقتباس من الموضوع __________
برطم غير الناس كلهم .. اول شخص يسوي له بريد ويلقى خمسة بنات جايين هديه مع الماسنجر ...... ومن يومها وهو يكتب بالخط الوردي ............. وعنده استعداد يحط اي عبارة توقيع له بالماسنجر مثل .......
_______________
** الرهيبة ام التصريف كله
اقتباس من الموضوع __________
اهذي صاحبة اطول ضحكات ماسنجرية ... ومستحيل تركز معك بسالفه لمدة خمس دقايق .... واحيان تستأذن قبل الفجر وتقول بتسحر أو بوتر .... وياحبها للوجيه التعبيرية لانها كسوله مافيها شده تكتب او لانها ماتركز بآي سالفة ..... حتى توقيعها بالماسنجر وجيه تعبيرية ...
__________________
** حساسة والاربع واربعين ايميل
اقتباس من الموضوع __________
هذي يبيلها موضوعين عشان اعلمكم عن سوالفها بالايميلات .... يحلفون ان بل غيتس متوعد بها يقول : فيه واحد من الشرق الاوسط فاهم الماسنجرات غلط ........ احيان اسلم عليها في ماسنجر وترد في الثاني ... الله من السرعة في يدينها (( اااااهب )) ....
__________________
كذلك ستجدون الكثير والكثير من الاسماء
مجروحة الزمن + قيثارة الشرق + مغربل + سعود + الجريح + وليف + النصاب
وغيرهم الكثير في حلقات اسبوعية
انتظروني
رد مع اقتباس
-new.gif)
