السلام عليكم ورحمة الله وبركاته
تحيه طيبه
هذه مصافحه بعد طول غياب
أتمنى أن تتقبلوها كما جاءت مني
علماً بأن باب النقد والتوجيه مفتوح
مع تقديري وشكري العميق للأستاذه أمل عبدالعزيز على رزع الثقه في دواخلنا
تدري انا والحزن
لاضقت هوّ الرفيق
وبالمثل لمن يضيق
امشي معه كل طريق
[poem=font="Traditional Arabic,6,black,bold,normal" bkcolor="transparent" bkimage="" border="none,6,gray" type=1 line=0 align=center use=ex num="0,black"]
والله إن الحزن ماهو غريب إنه يزور = وأبرك الساعات هي ساعةٍ لي جابته
أكرمه بالدمع وأنحر لجيته السرور=ومجلسي مايحكمه غيره وجماعته
بس هذا اليوم بالذات ماطاب المرور=قعدته طالت عليّه ولاهي عادته
من صباح الله معي لين جا وقت السحور= قلت صبراً لازم انه يكون براحته
في ثلاث وفود تم التقدم والعبور=والعدد ضاق بعيوني وجفني باغته
وفد أول كان ابويه ولاغيره حظور=قمت اركب في خيالي واشكل قامته
ضحكته طيبتْه صدق المحبه والشعور= قوته باسه مع عقله ورجاحته
وفد ثاني قايده فاقده من كم شهور= ماني مصدق اخويه عيوني شافته
قلت اضمه وسط عيني وطوّيها زهور= واشبع عيوني لانها صراحه جاعته
وطاحت الدمعه على ساعته ام السيور=ليت راعيها معي لأجل يلبس ساعته
وفد اول ثم ثاني لفوني من قبور= ليت قبري بينهم والنصايب نابته
ثم جاني وفد ثالث مقدمهم ثبور=بينهم حظ عيونه عليه شامته
وبينهم هم تمركز وعشعش بالصدور=بين قلبي والشرايين تلقى حانته
بينهم ليل طويل يوازي له دهور=يجمع الساهر بدنيا غرور خانته
بينهم لب ولكن على هيئة قشور= من صديق كان والحين وشهي خانته؟؟
بينهم من يبلسون الوفا بثياب زور=وما تبقى من بلاوي فهي متفاوته
وفد ثالث كان له اكبر حظوظ الظهور= وانتهت والثالثه اشهد انها ثابته
هاك ياحزني بعد دمعتي طيب البخور= مابعد عودٍ قعود والمثايل فايته
شكلك مشبه علي اني ايوب الصبور=عالعموم إصبح على دمعتين خافته
لاتجافيني ولاتقطع وتعلن دبور=خل أشوفك والليالي فرحها عافته [/poem]
رد مع اقتباس
[/align]
المشاركة الأصلية كتبت بواسطة ماجد نصار
