مميز ورائع (((تعلم الشعر بسهوله))) اسلوبه سهل وعباراته سلسلة

[عبدالهادي الجهني]

،

،


السلام عليكم ورحمه اله وبركاته

اخواني .. واخواتي

الأعضاء .. والزوار

اسعد الله اوقاتكم بكل خير



اليوم اضع بين ايديكم .. موضوع مميز .. ورائع .. لكل من لديه موهبة في كتابة الشعر .. وكذلك لكل من يحاول كتابة الشعر ..

وما يميز الموضوع .. بساطة عباراته وسلاسة اسلوبه ..

ولكن عزيزي القارئ .. احببت أن انوه الى نقطة مهمة جداً قبل قرائتك لهذا الموضوع ..

حيث أن الموضوع طويل جداً .. ولكي تعم الفائدة المرجوه ..

فأنا انصحك بقرائته ( بعد ماتخلص من النت ويكون بالك رايق وذهنك صافي )
..

لا احب أن اطيل عليكم اكثر من ذلك .. واترككم مع الموضوع ..





ملاحظة مهمة جدا: لمن هذا الموضوع

لمن يملك موهبة ويريد ان يطورها فقط



بقلم الشاعر (( يوسف الشقران )) ابوعيسى

نظرت إلي بعض الكتابات حول نظم القصيده
ووجدت انه بالاضافه إلى الأخطاء العديده في هذه المواضيع
أنها تتسم بالتعقيد للشاعر المتمكن قبل المبتدئ او من لديه رغبة لتعلم النظم

وبعد الاستعانه بالله

سأبدأ هنا سلسله دروس بعنوان :

(( تعلم الشعر بسهوله ))

وهي اجتهاد شخصي بحت ابتعدت فيه قدر الامكان عن التعقيد
وابتكرت بعض الامور وكتبت أبيات وقصائد خصيصا لتوضيح بعض النقاط فيه

وستكون مواضيعنا كالآتي :

- كيف تكتب القصيده ؟؟
- ظوابط مهمه للكتابه الشعريه
- خطوات عمليه لكتابه الشعر
- الفكره والقصيده
- ماهي القافيه ؟!
- المفرده واهميتها
- الوزن بشكل صحيح


هذه السلسله موجهه لمن لديه رغبه حقيقيه ليتعلم نظم القصيده المقفاه الموزونه

وكذلك سيجد من يجيد الوزن والقافيه مايفيده ولن أطيل أكثر بالمقدمه



وبأسم الله نبدأ







(( كيف تكتب الشعر؟؟؟ ))




1- فكره .

2- مفرده (حاول تكون المفردات اللي تستخدمها سهله ومفهومه ولاتعقد الامور)

3- قافيه ( لاتفكر فيها في البدايه راح تجي بروحها بس بعد البيت الاول التزم علي الاقل بالحرفين الاخيرين ).

4- وزن ( لاتشيل هم ) .

الخطوات:

1- اختر الفكره:

مثال :

( ابي اكتب للمنتدي ومولاقي كلام اقوله )


شلون اصيغ هالفكره ؟!؟!؟؟!؟!

اسال نفسي سوال شنو ممكن اقول؟!؟!

شلون ابدا ؟!؟!؟!

وشنو القافيه اللي اختارها ؟!؟!؟

- اجاوب :

اول شي انسى مسأله القافيه راح تجي بروحها ..

اهم شي فكر باللي ممكن تقوله حتى الوزن انساه وعبر عن اللي بخاطرك!!!

شلون ؟؟؟!


انت ودك تكتب للمنتدي بس مو لاقي كلام تقوله

قول مثلا :


ودي اكتب لي كلام ومالقيت اللي اقوله ؟؟!؟!!!


بدايه لشطر بيت حاول تكمله بنفسك


المطلوب انك تسترسل بالكتابه فقط

لاتنظر للوزن في البدايه

الوزن راح يظبط مع الممارسه

بس شلون اظبطه من غير تعقيد او التزام بالتفعيله وبحور الشعر مثل :


فاعلاتن مستفعلن فاعلاتن

او

فعلن فعلن فعلن فعل


وهلم جر ..


الاجابه سهله


في البدايه حاول تغنيها واذا جت بالغناء سهله وسلسه

فهي اقرب انها تكون موزونه


وحاول بأغاني مثل :

لمني في محجر عيونك .. لراشد الماجد

او اسمحيلي يالغرام .. لمحمد عبده

او تناسيني بنفس الموعد اللي به ذكرتيني .. لمحمد عبده

وانا اخترت هالاغاني بالذات لان كل وحده فيهم تخدم وزن معين

ومو بالظروره هالاغاني

الاغنيه اللي تبيها

المهم شيلها بطاروق تفضله وترتاحله



بالنسبه للقافيه

حاول تكون نهايه البيت من حرفين او اكثر


مثال :

(ودي اكتب قصيده في حب الوطن الكويت)

شلون اصيغها ؟!؟!

انت تحب الوطن؟!؟!

قول مثلا :

ودي اكتب لك قصيدة حب ياكويت وماقدرت اكتب ** لقيت اصعب مواضيع الهوى كلمات فـي حقـك


لاحظ ان الشطر الاول مو موزون حاول اتغنيها ..

حاول اتغنيها بنفس لحن تناسيني لمحمد عبده

تناسيني بنفس الموعد اللي به ذكرتيني

ماراح تغنيها بسهوله ...!!


حاول تصلحها :

ابي اكتب قصيدة حب ياكويت وعجزت اكتب ** لقيت اصعب مواضيع الهوي كلمات في حقك


حاول تغنيها وراح تمشي معاك ميه بالميه

او ممكن اقول :

احبك ياكويت العز ياتاج الفخر والطيـب ** احبك وارخص الغالي وابيع الروح لترابك

وعلي هالمنوال كمل ..


ولاحظ انك في البدايه ما اخترت قافيه

لكن هالقافيه راح تلتزم فيها بالابيات اللي راح تكتبها بعدين


(( ملخص الكلام ))

اختار الفكره واكتبها بطريقتك بأي شكل كان

وكمل القصيده كامله مع الالتزام بالقافيه

وفي الأخر حاول توزنها مثل ماوضحت في البدايه







(( ضوابط مهمه للكتابه الشعريه ))




الموضوع هذا ماراح يفيدك

الا لمآ تكون طبقت الكلام اللي بالموضوع اللي قبله


واذا انت ماقريت الموضوع الأول اللي بخصوص

( كيف تكتب الشعر )

فما راح يفيدك هالموضوع وراح اتضيع وقتك


الزبده :

بالموضوع الاول تعلمنا شلون نكتب شعر !؟!؟!

طبعا مافي شي بدون ممارسه

ولا تتوقع انك قريت معلومه خلاص صرت تعرف .. لا !

اسأل نفسك لما تعلمت القراءه والكتابه

كم اخذت من وقت وممارسه علي ماعرفت تقرا وتكتب عدل

( انا عن نفسي اكثر من سنه )

واسال نفسك وانت قاعد تكتب علي الكمبيوتر هالسؤال :

هل انا اكتب الحين بالكمبيوتر بنفس صعوبة وسرعة اول مره ؟؟!؟!

ما اعتقد ..!

لان كل شي مع الممارسه يكون اسهل ( حتى كتابة الشعر )


نرجع للموضوع

انا راح افترض انك قريت وطبقت اللي بالموضوع الاول

والنتيجه هنا .. هي انك الحين تقدر تكتب كلام موزون ومقفي

( هذا طبعا مع الممارسه والتطبيق!! )


لكن

هل الكلام الموزون والمقفى شعر ؟؟!؟!؟!؟!


طبعا لا ..


مثال علي هالشي


وهي سالفه معروفه عن واحد وفروا له كل الظروف انه يصير شاعر

وقعدوه بمكان حلو ماء وخضره ووجه حسن وقالوله قول شعر


شوفوا ايش قال :

وكاننا والماء من حولنا ** قوم جلوس حولهم ماء

؟؟؟؟....؟؟؟؟....؟؟؟؟


بالله عليكم هذا كلام ؟؟؟


اللي ابي اقوله ان مو كل كلام موزون مقفي شعر

لأن الشعر مشاعر تترجم بصور جماليه واضحه

وانتبه لكلمة واضحه هنا
ولحد يقولي لا .. المعنى في بطن الشاعر

لأن هالمقوله كان لها مناسبتها وهي غير صحيحه

المهم

انت تعرف تكتب كلام موزون ومقفى

( وهذا شي خلصنا منه )

وينقصك هنا انك تعبر عن مشاعرك

واللي يدور براسك وببساطه

وراح يكون هالكلام الموزون المقفي المعبر المفهوم الواضح ..

شـــعـــر

بس ؟!؟!؟!؟!

لا .. مو بس

في امور ثانيه

( وهذا اللي خلاني اكتب الموضوع )

امور ثانيه لازم الكاتب يحاول يلتزم فيها

وانا اقول .. يحاول

مو غصب


اتبع الاتي :

1-ابتعد عن الكلام اللي يمس الدين و والمقدسات

2- استخدم كلام مفهوم ( يعني مو تدور كلام قديم مو مفهوم وتكتبه )

3- استخدم معجمك الخاص ( راح اشرحها لكم )

4- عبر عن نفسك وبس ( لاتفكر برأي الاخرين )

5- لاتناقظ نفسك وواقعك بصوره غلط ( هم راح اشرحها )

6- لاتكرر القافيه

7- لاتكرر الألفاظ اكثر من اللازم

8- اكتب وانسى وأي فكره تطري علي بالك سجلها ولو بكلام عادي هذا اذا مو مستعجل


نقاط شكثر علي الفاضي صح ؟!


( لا .. موصح )

نبدأ من الاول مع الشرح :

1- ابتعد عن الكلام اللي يمس الدين و والمقدسات ..

واعتقد هذي الوحيده اللي ماتحتاج للشرح ..


2- استخدم كلام مفهوم ( يعني مو تدور كلام قديم مو مفهوم وتكتبه )

لأن البعض يدور وين الكلمه القديمه ويحطها

يا اخي الشعراء القديمين كانوا يستخدمون الكلام الدارج بحياتهم اليوميه

وهذا اللي خلاهم يتميزون

( ماراح ازيد كلام هنا لأني اعتقد انها وضحت)


3-استخدم معجمك الخاص ( راح اشرحها لكم )

لمى تكتب استخدم الكلام اللي انت تتكلم فيه .. لا تتعمد تستخدم لهجه مو لهجتك

ولا كلام مو من بيئتك .. مثال على هالكلام :

تخيل شاعر .. او خلينا نقول .. تخيل شاعره مثقفه

وتعليمها عالي وحضريه ( مع كامل احترامي وتقديري لهم ) وفري قالت هالبيت :

كل الاماني غاديه في يميني ** مير الظروف القاسيه ضيعتها

يعني شفيها لو انها قالت :

كل الاماني صايره في يميني ** بس الظروف القاسيه ضيعتها


يعني استخدم وابحث في معجمك الخاص وكلامك اليومي العادي

لا ترد لكلمات غريبه عليك


4- عبر عن نفسك وبس ( لاتفكر برأي الاخرين )

لمى تكتب عبر عن نفسك

وتأكد اذا كنت عفوي وصادق بتعبيرك .. انه كلامك بيكون احلى

ولكن اذا كنت تبي يقال عنك الشاعر الفلاني

فأقترح عليك .. انك تترك الكتابه


5- لاتناقظ نفسك وواقعك بصوره غلط ( هم راح اشرحها )

هذي بابداها بمثال وهو :


تخيل مثلاً ان هالابيات قالها شاعر مليونير او أمير ؟؟؟!!!!!!

شف حالتي فـقران والحال دوني ** والجسم من زود الفقر زاد سقمه

اقعد على السكه وانادي عطوني ** من مـال ربـي يـالاجــاويـد لـقـمـه


( راح تطق علي راسك وتقول الله يالكذب )

ولحد يقولي المعنى كيت وكيت انا لي الظاهر

وهذا اللي يفترض وانت تكتب .. تتبعه

يعني

بعد الكتابه الاوليه للقصيده

فكر بمعنى الكلام وتفسيره وبعدين اعتمده


6- لاتكرر القافيه

وهذي واضحه .. يعني لو عندي بيت شعر مثلا :

اقعد على السكه وانادي عطوني ** من مال ربي يالاجاويد لقمه


مايصير نفس القافيه بالابيات الثانيه ( عطوني ) او ( لقمه ) !

وان حدث .. فيكون ضعف

او لاغراض متعمده ومقصوده بس


7- لاتكرر الألفاظ اكثر من اللازم

لأن تكرار اللفظ الواحد بكثره .. يبعث الملل وكأنك مو لاقي الا هالكلمه تعيد وتزيد فيها

يعني مره قول ( احبك ) ومره ( اهواك ) ومره ( متيم ) ومره ( اشتاقلك )

كلها تعبر بطريقه او بأخرى عن الحب ولكن اللفظ اختلف


8- اكتب وانسى وأي فكره تطري علي بالك سجلها ولو بكلام عادي

( هذا اذا مو مستعجل )

وهذا من واقع تجربه .. سوي اللي اقولك عليه .. وعلى مسؤوليتي






(( خطوات عملية لكتابة الشعر ))


في الموضوعين اللي قبل عرفنا شلون نكتب شعر

( هذا المفروض .. يكون )


!!!!!.....!!!!!.....!!!!!


بس كل اللي فات كلام نظري

يعني نظرياً .. صح

يفترض بان اللي طبق الكلام في الموضوع الاول والثاني

خلاص صار يكتب شعر

بس هالكلام لازال نظري !!؟؟


انا ابي فعليا لما امسك قلم واكون ناوي اكتب شعر

هل راح اقدر اكتب شعر ؟!؟!؟!؟!؟




نعم تقدر




وهذا هو موضوعنا هالمره

وهو خطوات عمليه لكتابة الشعر

( وانا بطبيعة الحال افترض انك خلاص استوعبت اللي بالموضوعين اللي قبل )

خلينا اول شي نتفق على هالامر .. واللي هو :

إن القصيده ... قسمين


1- الفكره ( خمسين بالميه )

2- الصياغه والوزن والقافيه و .......الخ ( خمسين بالميه )


!!!!!.....!!!!!.....!!!!!



هذا اللي انا شايفه


مسألة الفكره ... ما اقدر اسوي فيها شي

هذي ترجع لك انت

وترجع لحياتك وترجع للموضوع اللي تبيه


ولكن الأمور الثانيه ... ممكن نتعامل معاها


(( الكتابه العمليه للشعر ))

وهالموضوع راح نقسمه لمرحلتين :


1- الاستعداد والتدريب

2- مباشرة الكتابه


المرحله الاولى :


1- الاستعداد والتدريب

لمى تبي تلقي محاضره او درس عن القدس مثلا :

لازم تقرا تاريخ القدس

وتقرا السياسه وتجهز امورك ..... صح ؟!!!؟؟!


قبل لانكتب


ياليت اتحاول قد ماتقدر تسوي هالامور :

1- اقرا شعر فصيح

( اول شي لاحمد شوقي والشعراء اللي عاصروه وبعدين اقرا المعلقات حتى لو مافهمتها )


2- اقرا واسمع لهؤلاء الشعراء

( خلف العتيبي - سليمان الهويدي - خالد الفيصل - محمدبن راشد المكتوم - سعود بن بندر - عبدالله الفيصل )

بس هذولا .. وانا مختارهم بالذات متعمد ..

مو معناتها مافيه غيرهم .. لا فيه

و يمكن افضل .. بس ابيك تسمع كلامي .. واعتمد


وارجووووك



اترك شعراء هاليومين لانهم راح يخربون مستواك

( شعراء هاليومين ذبحونا بهالكلام

نعنبوها ونعنبو جدها ويلعن خيرها والله ياخذ خالتها....

مادري أي غزل كله شتايم )


3- درب نفسك علي كتابة الشعر !!

شلون ؟!

انا اعطيك هالطريقه وحاول تسويها

اختار اي بيت شعر .. وحاول تكتب علي نفس منواله

وعلشان تسهل الأمر على نفسك

اكتب الكلمات اللي تخدم قافيتك برأس الصفحه .. عشان تكون حاضره قدامك

مثال :

والبيت لسعود بن بندر الله يرحمه

ياليتني بينـك وبيـن المضـره ** من غزة الشوكه الي سكرة الموت

برأس الصفحه اكتب الكلمات اللي تساعدك

مضره : مسره - مبره - جره - مره - مجره .......الخ

موت : فوت - صوت - حوت - قوت - مكبوت - .........الخ


واقعد ركّب

مثلاً :

نـاديـتلـك يـاغــايـتـي الـف مــره ** وان فات فينا الفوت ماينفع الصوت

ماشفت ياعمري بعمـري مسـره ** والضـيم فيني طـول الازمان مكبوت

وهلم جر ..

تحدى نفسك بالكتابه وحاول تكتب 4 او 5 ابيات

واذا خلصت اختار بيت غيره واكتب علي شاكلته

( وكرر هالعمليه لأن الممارسه مهمه )



المرحله الثانية :


قول بسم الله


قبل لاتبدأ


- تاكد انك اذا لقيت الفكره فـ ( خمسين بالميه من القصيده خلص )

- حط في بالك ان الكتابه امرها سهل مو شي معقد

- اعتقد وآمن بانك تقدر تكتب شعر

- تأكد ان المسأله مو الهام او وحي ينزل عليك

كل المسأله حاله من الاستعداد الذهني والنفسي والعاطفي

فهيئ الجو المناسب للكتابه بعدين راح تلقا الامر عادي

يعني جو الهدوء والمكان الحلو والبراد ..

وصدقني مسأله الجو المناسب .. بعدين تصير مالها داعي

يعني انا

ما اكتب الا وعندي ناس مزعجين يسولفون

او وانا اطالع مباراة كره قدم


المهم


صلي علي النبي


2- مباشرة الكتابه

أ - الكتابه الاوليه

ب - تعديل المعاني

ج - ضبط القافيه

د - ضبط الوزن

ه -اعتماد القصيده


وراح نتكلم عن كل نقطه على حده :


أ - الكتابه الاوليه

( اكتب بالفكره اللي تبيها و لاتعقد الامور ولا تركز حيل علي المعاني لكن حاول تكتب اللي في بالك وحاول تسترسل قد ماتقدر وكثر ماتستبسط الامر راح تلقاه بسيط )

( قول بسيطه ماتستبسطهاش ) ===>> مالها شغل بالموضوع ...!


ب - تعديل المعاني

( يعني مثلا لاتذكر المؤنث او تأنث المذكر ولاتجمع المفرد او تثني الجمع وانتبه للمعني اللي انت كتبته مو المعني اللي في بالك )


ج - ضبط القافيه

( والقافيه تكون من حرفين او ثلاثه في الغالب وانتبه للتشكيل

مثلا :

كلمه يختلِف بكسر اللام .. وكلمة اختلَف بفتح اللام !!

صحيح ان اخر ثلاث حروف نفس الشي .. بس التشكيل للحرف اللي قبل الاخير عفس الدنيا وخلاهم مايضبطون ...!

و ممكن تتبع الطريقه اللي قبل شوي

انك تكتب الكلمات اللي تساعدك براس الصفحه وتستخدم هالكلمات )


د - ظبط الوزن

( مسالة ظبط الوزن راح تكتسبها مع الممارسه

لكن الحين حاول تغنيها بنفس اللحن راح تجي معاك

و بالموضوع الاول سولفنا عنه )


هـ -اعتماد القصيده

( اذا كتبت قصيده واعجبتك اكتبها وانساها علي الاقل اسبوع وبعد الاسبوع اقراها طبق هالمسأله ولا راح تندم صدقني )



وانت تكتب


- حاول تبتعد عن القوافي الصعبه لانها راح تاذيك


- ولاتستعجل مسالة اتقان الوزن كل شي بالممارسه


بعد ماتكتب


- ابحث عن اخطاءك وانقد نفسك بنفسك

- قارن أي قصيده تكتبها بقصيده مشابهه لها

- اعرض محاولاتك علي ناس تثق انهم ينصحونك ولاتزعل من النقد ومو بالضروره ان اللي ينقدك

شاعر .. يكفي أي متذوق للشعر انه ينقدك اهم شي يكون صادق ..

( وللعلم النقد فيه بناء وفيه غير بناء

البناء هو اللي يقولك عندك خطا كذا وكذا ويبين شنو الخطا ووين صايراذا قدر ..

والغير بناء هو اللي يقولك انت عندك اخطاء ولايقول شنو او يقول لا فيها نواقص ولا يبين او يقول شنو هالنواقص )


شــوف


القصيده اساسها الفكره

فاذا الفكره اخذت 4 ابيات في التعبير عنها

فــ هالاربعه كفايه .. مو بالظروره اتمطط الفكره عشان اتصير طويله

عط كل شي قدره


ياما ابيات مفرده وبروحها تسوالها قصايد من مية بيت





(( الفكرة والقصيدة ))

بنكمل معاكم هالمواضيع وراح افترض انك قريت وطبقت اللي فات

واذا ماقريت المواضيع اللي قبل .. ارجع واقراهم


الفكره والقصيده :

الموضوع هذا ماهو إلا اضاءه لتوضيح الفكره بالأساس ومن باب المعرفه بالشئ

ومن باب قناعتي ان اي امر لما اعرف اجزاءه ، وشلون مركب وطريقة تكوينه راح يكون التعامل معاه

اسهل وابسط .

الكثيرين يعتقدون إن الفكره مجرد موضوع للقصيدة وبس !!؟

لكن اقول :

ان الفكره هي المخطط العام للقصيده اللي يبين الغايه والهدف منها ويوضح تسلسلها وطريقة بنائها

واذا انت حددت هالامور

مو المفروض انك تسوي مخطط يبين تصورك النهائي !؟!!!


انا ما احب اتفلسف او ادخل في متاهات مالها داعي


ولكن الموضوع هذا بالذات مجرد مافكرت فيه

لقيت افكاري تشعبت وتنوعت بشكل خلاني اتردد اني اكتبه بالاساس

ناهيك عن اني استفيض فيه

فلذلك وعلشان نصيب الهدف من هالموضوع ومن غير لانضيع ..


راح نتناول هالموضوع كالتالي وبالظبط بهالترتيب :


1- مفهوم الفكره

2- أقسام الفكره

3- عرض أمثله

4- صياغة قصيده من الصفر



خلك معاي




1 – مفهوم الفكره:


قلنا في الموضوع اللي قبل هذا إن الفكرة تمثل خمسين بالميه من القصيدة <<<< قناعه كاملة


أول شي لازم تعرف ان الفكرة هي أساس للقصيدة

( وأساس الفكرة .. هو أنت )

سواء تبي تقول شي , توصف شي , أو تعبر عن أي شي

- لا تتوقع إني أعطيك فكره جاهزة وأقولك تفضل اكتب !! ما اقدر

- كل اللي اقدر عليه إني أعطي شرح عام وخطه للتفكير عشان تعرف أنت وين تمشي وشنو قاعد تسوي بس


شنو أو ماهي الفكرة ؟؟ ( حلوه ماهي )

الفكرة هي المادة أو الإحساس اوالتصور الواضح اللي تبي تكتبه

وخلينا ننتبه لهذا الشي .. ان الفكره مو معناتها إني أبي اكتب غزل ، مدح ، هجاء ، وصف ، فخر .........الخ ..!

( يعني مجرد إني ابكتب قصيده غزل .. مو فكره ) !!


إنما الفكره مثل ماقلنا هي :

المادة أو الإحساس اوالتصور الواضح اللي تبي تكتبه

واهم شي ((( الواضح )))



2-اقسام الفكره


راح نقسم الفكره إلى 3 أقسام:

1- فكره أساسيه

2- فكره فرعيه

3- فكرة صياغه


1- الفكره الاساسيه:

وهي الخط الرئيسي للقصيده او مجموعة ابيات فيها وهي مثلاً :

اني ابغى ارسل رسالة عتب لصديق

او ابغي اعبر عن إحساس معين بخاطري او موضوع ابغي اكتبه .. خلال قصيده ؟!؟!


2-فكره فرعيه:

وهي فكره البيت بحد ذاته او الصوره الشعريه الخاصه فيه اوالخاصه بمجموعة أبيات شعرية

واللي تخدم المعنى العام

و احيانا ..

واقول احيانا ممكن تنفهم بمعني ثاني لو قرأت البيت بدون باقي القصيدة

يعني مثلا :

قصيده مدح لشخص معين

ومن ضمن الأبيات شبهته بنور الشمس ! <<< ( هذا مثال على الفكرة الفرعية )


3- فكرة صياغه:

وهي الحبكة في القصيدة او طريقة العرض والسرد ( وغالبا الابداع يكون هنا )


كلام مو مفهوم صح ؟!!


( إذا ما استوعبت هالنقاط لا تنزعج راح نشرحها بالامثله وراح تستوعبها عدل )



تراهن ؟؟؟!!!






3- عرض أمثله :

خلال الامثله اللي راح نذكرها .. راح تبين اقسام الفكره وطريقتها ان شاء الله


المثال الاول :


ابيك تقرا هالقصيده بشكل سريع .. وبعدين راح نعلق عليها


عن مستواي اليوم تسـأل شالاسباب ** والاسـئـله فـي مـحـتواهـا تـشـابـه

دكتـور تسأل والسـبب عيـن واهداب ** يوم امـتحـاني كـنـت احـاتـي غيـابه

يوم امتـحـاني عـشت في حلـم كـذاب ** صرت اكتب اشعاري مكان الاجابه

وشـلــون تـعـبـير الألـم فـيـه جــذاب ** مـنيـة حيـاتي شوف حضرة جنـابـه

في ضحكته يعزف على عود زرياب ** يرفـع بضـحـكِه كـل مـعـنى الـكــآبه

لـو عــذربـونـي مايـهـم الـتـعذراب ** الــواقــع انـي عـاشـقـن للـــذرابه

دكـتـور تـسـألـنـي !! أنا مسكر الباب ** حـتـى لـدروسـي مـا ألـقـَّي مجـابه



في هالمثال

الفكره الاساسيه :

غزل .. بطريقة اجابه علي سؤال دكتور بخصوص المستوى الدراسي ..!

فكره فرعيه :

تشبيه الضحك بعزف العود ..

( في ضحكته يعزف علي عود زرياب ) <<< ويمكن تكون هناك افكار فرعيه اخرى

فكرة الصياغه :

الجواب عن تدني مستوى الإمتحان خلال التعذر بوجود محبوبه غائبه ..

وصولاً إلى عدم التفكير بالدروس اصلاً ..



مثال ثاني وراح نشرحه اكثر


اقرا هالقصيده شوي شوي

وبعدين اقرا الشرح :


لو كان لون الورود اسـود ** والشـمـس بالليل مألوفـه

والثـور فوق الشجر غـرد ** والفيل يزحف علي الطوفه

أو الفـقـع بالـبـحــر يوجــد ** أو طارت أسـراب منـتوفـه

والصـين كانـوا عدد مفـرد ** والثلج في صيـفنا انشـوفه

او عمر الانـســان يتـجــدد ** او السـمـا بخيــط ملفـوفـه

وابلـيــس للـخيــر يـتـعـمـد ** والـجـن بالـطـيـب معروفـه

او بوش يرتاح لاسم احمد ** او الـيهـودي نـسـى خـوفـه

لايـمـكن الـعــرب تـتـوحــد ** وان صار ماقيل بـحروفــه



لو حاولنا نشرح هالقصيده


راح نلقا وبكل بساطه ان الشاعر يبي يقول :

ان اتحاد العرب مستحيل .. وعلشان يقول هالشئ ..

اختار انه يعرض ويقول عدد من المستحيلات .. ويوصل بالنتيجه انه حتى ولو حدثت هذي المستحيلات

فإتحاد العرب مستحيل ..! (( الله يخليلنا اتحادنا ويوفقه ))


والخلاصه


ان اتحاد العرب مستحيل <<< فكره اساسيه

كل مستحيل ذكره الشاعر <<< قكره فرعيه

عرض المستحيلات والوصول الي النتيجه بالنهايه <<< فكرة صياغه


وبشكل ثاني :


حسب التقسيمات اللي اتفقنا عليها فيمكن نقول ان :

الفكره الاساسيه هي :

اتحاد العرب مستحيل

الفكره الفرعيه:

في هالقصيده 14 فكره فرعيه

( ولاحظ ان كل نقطه فيها صوره مختلفه )

وهي بالترتيب :

1- لو كان لون الورود اسـود

2- لو الشمس بالليل مألوفـه

3- لو الثور فوق الشجر غـرد

4- لو كان الفيل يزحف علي الطوفه

5- لو كان الفقع بالبحـر يوجـد

6- لو طارت أسراب منتوفـه

7- الصين كانوا عدد مفـرد

8- الثلج في صيفنا انشوفه

9- عمر الانسـان يتجـدد

10- السما بخيـط ملفوفـه

11- ابليـس للخيـر يتعمـد

12- الجن بالطيب معروفـه

13- بوش يرتاح لاسم احمد

14- اليهودي نسـى خوفـه



فكرة الصياغه :

وهي طريقه الشاعر في انه عرض المستحيلات ووصل للنتيجه اللي يبيها

فالشاعر هنا بدأ في قول :

لو كان ..

وبعدين ؟!؟!!

الشمس بالليل مالوفه - الثور فوق الشجر .........الخ

واخر شي انتهى في :

لايمكن العرب تتوحد ..


راح اكتفي بهالمثالين عشان مايطول الموضوع


ولو ان في بالي امثله ثانيه فيها فكره اساسيه وحده ولافيها أي فكره فرعيه وفكرة صياغتها هي نفسها الفكره الاساسيه

يعني مثلا سرد قصه بطريقة قصيده

( نفس قصيده امير الشعراء احمد شوقي اللي في بدايتها يقول برز الثعلب يوما في شعار الواعظينا ... )


ومثال ثاني مليان افكار فرعيه وفكرة الصياغه فيه رائعه

( في قصيدة ايليا ابوماضي اللي اولها – قال السماء كئيبة وتجهما )

عموما ...

اذا مافي فايده من هالكلام فـ إن شاء الله راح تلقى بالنقطه الجايه فايده


5- صياغة قصيده من الصفر :

مثل ماقلنا قبل

اكتب موضوعك بتعبيرك العادي وبعدين رتبه :

الخطوه الاولى :

اكتب الموضوع اللي راح تصيغه بطريقتك وحاول تسترسل وتكتب قد ماتقدر

الموضوع مثلا :

( القصيده تتكون من ابيات شعريه

والبيت الشعري يتكون من شطرين

صدر البيت وعجز البيت

ولازم يكون للبيت قافيه نلتزم فيها تتكون من حرفين في الغالب

وطبعا لازم كل بيت يكون موزون حسب البحر اللي ماشيه عليه باقي القصيده

ولازم نختار الالفاظ اللي تساعدنا في التعبير المناسب والدقيق قدر الامكان عن الفكره اللي نبيها

لان الفكره بالنهايه هي محور القصيده وموضوعها

وبطبيعة الحال يختلف الشعراء في تناولهم وصياغتهم ونظرتهم للافكار ويكون تميزهم في طريقة التصور الكامل لهذه الافكار )


الخطوه الثانيه :

حاول تجزئ افكارك .. يعني تحطهم بطريقة نقاط بهذا الشكل :

- القصيده تتكون من ابيات شعريه

- البيت الشعري يتكون من شطرين صدر البيت وعجز البيت

- البيت لازم يكون له قافيه نلتزم فيها

- القافيه تتكون من حرفين في الغالب

- لازم يكون موزون حسب البحر اللي ماشيه عليه باقي القصيده

- ولازم نختار الالفاظ اللي تساعدنا في التعبير المناسب والدقيق قدر الامكان

- الفكره هي محور القصيده

- يختلف الشعراء في تناولهم وصياغتهم ونظرتهم للافكار

- ويكون تميزهم في طريقة التصور الكامل لهالافكار


الخطوه الثالثه :

حاول تفهم هالنقاط وتستوعبهم عدل وحاول تضيفلهم

وابدا ببيت منهم اذا قدرت

واذا ماقدرت لو شطر بيت

ومو بالظروره بنفس الوقت

واسال نفسك اذا كتبت شطر بيت او بيت

هل ممكن اصيغه بشكل احسن او لا ؟!؟!

بعد ماتكتب البيت الاول اللي مقتنع فيه

خلاص الجزء الصعب انتهى

( لان القافيه تحددت ولأن البحر ( الوزن ) اللي راح تمشي عليه صار موجود )

حاول تكمل باقي الابيات علي نفس منواله ونفس قافيته ولحنه

ومو شرط يكون ترتيب ابياتك بنفس الترتيب اللي حطيته بنقاط (( اللي بالخطوه الثانيه ))

لكن استخدم النقطه المناسبه واللي تشوف انها ماشيه حسب حاجتك


الخطوه الاخيره :

اكتب القصيده وحاول تراجع معانيها

وبعدين حاول تشيلها ( تغنيها ) بلحن ثابت

واذا مشت بهاللحن .. حاول تغير اللحن كذا مره

واذا لقيت انها ماشيه بسلاسه بالأغنيه فهي تماااام .. ( بس مو تعوج لسانك تمشيها غصب ) .




النتيجه النهائيه اللي طلعت معاي لقصيدتنا :



البيت له صدرن وعجز وينـتهي في قافيه ** يـحـكـم بوزن ايكـون واجب نلتزم في وزنته

الصدر فيه اول شطر والعجز شطره ثانيه ** والـقـافـيـه حرفـيـن او اكـثر باخـر شطـرته

والوزن له رنة جـرس لابد تطلـع صافـيه ** لابــد يـنـسـاب الـكـــلام ابنـزلـته او رفــعتـه

ولانـسـيـت المـفرده ماظـن هـذي خـافـيـه ** من صاغ بيت ايدور اللفظ الحسن في لفظته

واهـم من هـذا وذاك افـكــار تكـتب وافيه ** روح القـصـايـد فكـرها ولكـل شاعـر نظـرته

احـلى القصـايد ماتمـيز في معـاني كافـيه ** والبـيت صـوره مبـدعه في فـن ترسم حبكته



( مشكلتي انا طلعت معاي موزونه من البدايه وصدقني هالامر بالممارسه ( واللي يقولك علم العروض والتفعيله قوله استرييييييييح ) ولاشي غير الممارسه )



ولاتظن هالنتيجه راح تطلع معاك من اول او ثاني او سابع محاوله ..


ولاتظن انك بعد فتره من الممارسه راح تكون مظطر اتسوي هالخطوات كلها ..


بالعكس راح تلقى نفسك مباشره رايح للخطوه الاخيره


(( وكل شي مع الممارسه يصير ))


انــتــهــى

منقول منقول منقول منقول

للفائدة

،

،

،

[لــيــل]

جزاك الله خيراً على النقل المميّز والرائع.....

شرح وافي وسلس جدّاً... وترتيب وتسلسل في الافكار.....

اغلب الخطوات اطبقها..الاّ انْ اختار بيت لكبار الشعراء واطبق عليه....

واحبُّ كثيراً القراءة لـِـ"خالد الفيصل".."وعبدالله الفيصل"...و" سعود بن بندر"....

والبيت الذي ذكرته" لسعود بن بندر" هو من اجمل الابيات التي حفظتها....

اما الامير "خالد الفيصل" فقصائدهُ تجبركَ على قراءتها رغماً عنك......

خطوات سهلة وبسيطة يستطيع ايّاً كان تطبيقها....

لاعدمناك...ولاعدمنا مشاركاتك....

دمتَ بحفظ الرحمن....

تحيّتي وتقديري لك....

[عبدالهادي الجهني]

جزاك الله خيراً على النقل المميّز والرائع.....

شرح وافي وسلس جدّاً... وترتيب وتسلسل في الافكار.....

اغلب الخطوات اطبقها..الاّ انْ اختار بيت لكبار الشعراء واطبق عليه....

واحبُّ كثيراً القراءة لـِـ"خالد الفيصل".."وعبدالله الفيصل"...و" سعود بن بندر"....

والبيت الذي ذكرته" لسعود بن بندر" هو من اجمل الابيات التي حفظتها....

اما الامير "خالد الفيصل" فقصائدهُ تجبركَ على قراءتها رغماً عنك......

خطوات سهلة وبسيطة يستطيع ايّاً كان تطبيقها....

لاعدمناك...ولاعدمنا مشاركاتك....

دمتَ بحفظ الرحمن....

تحيّتي وتقديري لك....

،

،

الرائعة/ ليلي


مقدر لمرورك واضافتك الراقية

الشعر مبني على اسس

واول تلك الاسس بل اهمها

الموهبة الشعرية

ثم

تأتي

الرغبة للتعلم

ثم

تأتي

الممارسة


تقبلى احترامى

،

،

،