بسم الله الرحمن الرحيم
السلام عليكم ورحمة الله وبركاته
شلوونكم جميع وعساكم بخير ومستانسين
اليوم قررت اخيرا اني افضي نفسي واحط هالموضوع لي سنتين كل ماجا الصيف بحطه وماتيسر بس اليوم زانت ابشركم
عندي موضوع حابه تشاركوني رايكم فيه بمناسبة حلول اجازة الصيف
الموضوع واضح من العنوان وبلاش مقدمات وكثر هرج وخلونا نتكلم بأريحيه وبلاش تنسيق جمل وبلاغه لان الوضع مزري جدا ومايسمح
الحين سلمكم الله ليه كل هالجشع اللي يصير بالاجازات ليه المستثمرين بلا رقيب وماخذين راحتهم يعني الواحد عشان يطلع يوم يمشي عياله وحريمته لازم يصرف اقل شي 300 ريال يعني بالنسبه للطبقه البسيطه مستحيل يقدر يطلعهم غير مره وحده طول الاجازه .
الواحد يروح وعشان يدخل المنتزه لازم تذكرة دخول الفرد 10 ريال ؟؟ طيب واللي عنده عائله كبيره مكونه من عشره اشخاص هذا في ادنى الاحوال لان في عائلات اكثر
يعني 100 ريال بسسسسس عشان يدخل المنتزه
واذا دخل بدا المنشار بظهر هالمواطن المسكين تذاكر الالعاب كل لعبه بمبلغ وقدره بعدين الاحظ دايم ان اللعبه اللي يحبونها الاطفال وعليها اقبال سواء كبار او صغار دايم تكون اغلى من غيرها ونرجع لموضوع الشخص المسكين اللي ربي كتب له يكون عنده خمسه او سته اطفال كحد ادنى خلو اللي عنده عشره واكثر هذا حالته ميئوس منها :(
بعد الالعاب نجي لموضوع الاكل والتموينات داخل المنتزه يعني على سبيل المثال ( الببسي ب3 ريال قبل لايصير بريال ونص ترى الحين مدري بكم بيصير + قارورة المويه الصغيره اللي برا بنص ريال عندهم بريالين + الشوكولاتات بجميع انواعها من 3 الى 4 ريال يعني كل شي الضعف او اكثر )
وين وزارة التجاره وين هيئات الرقابه وين هيئة السياحه معقول الكل نايم ومحد شايف وش يصير للمواطن عشان يطلع يرفه عن نفسه شوي هو وعياله ؟
واذا طلع المستثمر كريم وسمح بالتذكره للسياره كامله بدون عدد افراد تلقاه مجهز الصلخ داخل يعني الجلسات بـ50 والاسعار الضعف والالعاب لاتقل عن عشره
يعني باختصار ( ليتنا من حجنا سالمين )
وفي الاخر نسمع كثير صيفنا في بلادنا أحلى طيب بلادنا اكيد احلى بس ياليت الكل يلتفت ويبحث عن الاسباب اللي تخلي الناس يتجهون للخارج
هذا كله طبعا وحنا ماذكرنا جشع اصحاب الشقق المفروشه والفنادق بتركها لكم تتطرقون لها في ردودكم
اتمنى تعطوني رايكم بهالموضوع وبكل شفافيه
وكل صيف .... واجازتكم احلى
تحيتي للجميع