[poem=font="Simplified Arabic,4,purple,bold,normal" bkcolor="transparent" bkimage="" border="double,4,purple" type=2 line=0 align=center use=ex num="0,black"]
( شوقي لشوفك )
شوقي لشوفك شوق اهل نجد للسيل=عقب السموم وعقب حر القوايل
شوق اهل حايل للخلا والتعاليل= لاصارت الريضان مثل الخمايل
شوق العمى للشوف والبدر لليل=او راعي الغربه لفك الرسايل
ودي بشوفك قبل ما يتلف الحيل=قبل الفراق وقبل حفر النثايل
من يرحم اللي يشكي ببعدك الويل=حامي دموعه فوق خده همايل
مافي يده حيله ولامسعفه حيل=البعد سوى في خفوقه هوايل
توقفت دونه جميع المراسيل=وتعطلت عنده جميع الوسايل
انظم غرامي بك بيوت ومواويل=وش لي ببعدك غير نظم المثايل
واخرم لشوفك خرمة البدو للهيل=وليا امتلت وسط الشعيب الثمايل
حبك تعدى حب اهل مصر للنيل=يا مزبن الملهوف يا ام الجمايل
ياما ولد بك من سنافي وحلحيل=وياما رجع من هيبتك كل عايل
وياما سكن بك من قروم ومشاكيل=وياما حضنتي من كبار الحمايل
حبك سرى مسرى المثل بالسن الجيل=حب الجريفاني لضلعان حايل[/poem]