[poem=font="Arial,5,blue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
رغم إني أكره حديث المال والاقتصاد = اليوم ابفتي كمايفتي الامام الفقيه
قضيت عمري وأنا أفضِّل لزوم الحياد = وهاالحين أبنحاز للرأي العجول السفيه
أصدرت حكمي ( حرام ) إيضيع رزق العباد = تحويشة العمر من دور الذهب والجنيه
صح إن الأسهم بها ربح وخسارة وكاد = لكنْ بعد فيه طعنة نصب تذبح نزيه
مافي مبرِّر لما يحصل بدون اجتهاد = مهما يحاول يمرِّرها علينا النبيه
كل العوامل تقول إن الرخا بازدياد = دخلٍ خيالي مع استقرار واللي نبيه !
طفرة عظيمة وهبها الله لأطهر بلاد = ولاة أمرٍ أهَل فزعة بياض الوجيه
لو فيه أزمة أو إن السوق يشكي كساد = نقول يمكن يطيح السوق ! مالت عليه
روسٍ كبيرة يجيها الربح فوق المراد = وبنوك مصّت دماء الشعب من غير ليه
بدال وادي يبون من الذهب ألف واد = ماكن الإنسان له ربٍّ يجب يتّقيه
( معادلة ضلم ) والاطراف سينٍ وصاد = مجهولة الحل واذكي إنسان فيها يتيه
( مؤامرة ليل) حيكت والعرب بالرقاد = والشعب ولاّ ولا مسؤول سمّا عليه
(خطة خبيثين) سفّتنا صنوف السماد = الدرس قاسي إلياساعتك محدٍ وعيه
لامن صرخنا عطونا بنج ( فيه ارتداد) = حتى غدا البنج من إدْمانّا نشتهيه
الجرح توِّه ولايمديه يوجع فواد = الموت قدّام ! ويل الناس مما يليه
هذي مصيبة ولا ينفع معاها اللباد = من يكتم الحق شيطانٍ مريدٍ كريه
أبرفع الأمر للحاكم مليك البلاد = أبو الفقارى رهيف القلب وأشكي إليه
(عبدالله الخير) خير الناس طير الهداد = مافيه أمرٍ أبو متعب عجز يحتويه
فَزْعَتْك فزعتك عبدالله ترى الشعب باد = مافيه غيرك الياضاقت علينا نجيه
( على الحديدة ) غدينا (بح ) عقب الحصاد = ياكثر ( لازم ) عجزنا اليوم لانشتريه
اليوم وَصْلَت معيشتنا جموع الجراد = وفوق الخسارة غلا الأسعار مانقتويه
صار السعودي يابو متعب كسير الفواد = من بؤس حاله بكى (الهندي ) عطوفٍ عليه
على كفيله بكى (العامل ) ولاذاق زاد = يقول : بابا أنا راتب ترى ماأبيه
ألينك إنه وفيٍّ شهم حرٍّ جواد = يفداه ( الأشقر ) وابو شامه ومن له شبيه
الحال صعبة يابو متعب وفيك السداد = واللي يجي منك يابونا ترى نرتضيه
نبي الحقيقة ترى للكبد فيها براد = تكفى ترى الشعب يدعي لك ويرفع يديه
لاتعتبرها - معاذ الله - منا انتقاد = إلاّ ثقة فيك ياللي بروحنا نفتديه
وإنْ كان حالت مشاغلكم ترى الحب زاد = رايك ترانا برغم جروحنا نقتديه
فيك العوض فيك وإلا المال دربه نفاد = والعبد ماله عن القسمة ستارٍ يقيه !
شعر \ حمدان سالم العنزي – عرعر -[/poem]