السلام عليكم ,,,
كيف الحال والأحوال إن شاء الله كل أبوكم بخير ,,,
موضوعنا الذي سوف يدرج على طاولة النقاش هو شغل البيت
سمعنا من قديم الأزل إن المرأه لازم هي اللي تكرف بالبيت تغسل وتطبخ وتنظف وتربي ووووو إلخ
مثلاً تجيك وحده كبيره بالسن تقول حنا منول نقوم ببيوتنا ونشتغل وكل شي على روسنا
طيب وش شغلك ياحظي
- تقولك نروح نحطب (نجمع أعواد نوقد بها النار ) ,,
>> وش سويتي تجمعين عودان هذا موب شغل
- أنظف البيت ,,
>> أصلاً البيت طين ترابه به يمكن تنفضين لك كم بطنيه وإلا فرشه يقالك نظفتي ,,
- نغسل الملابس ,,
>> ملابسهم تقعد عليهم يومين وإذا موب ثلاث وإذا إفصخوهن ذيك الساعه تربصهن بطشت وهذا هو الغسل
- ونطبخ عشانا بأنفسنا ,,,
>> إيه تمدين السفره سلطات ومقبلات ومقليات ووو كله رز أبيض وكان عليه قطعة لحم زين وين التعب ,,
- ونقوم على بزارينا ,,
>> بزانهم مصلحهم الله الواحد يقوم وينطلق مع هالبران وإذا أذن المغرب جدع رأسه ونام ماتعبت
عليهم وطبعاً مايمرضون موب مثل بزران هالوقت البزر من يقوم إلين ينام وهو متعلق برقبة أمه ,,,
وإذا قالت وحده أبجيب شغاله تساعدن شمتن بها الخلق الرفلاء والرمه اللي مدري وش بها والله فلان
خسران يوم يأخذ وحده مثلها ويبدن الأسطوانه حنا منول مادخلناهن بيوتنا (أصلاً منول ماعرفتن
الشغالات ) وعند أرواحهن إنهن منول يشتغلن ,,,
شغل البيت حالياً يختلف تماماً عن السابق ,,,
يعني الأم ماراح تلحق على شغل البيت لحالها لابد لها من مساعد ألا هي الشغاله ,
فأنا من وجهة نظري أرى أن وجود خادمه في البيت شيء أساسي
وموب معناته إن الوحده لاجابت خدامه إنها فاشله بالعكس راح تفرع وقت أكبر لتربية أولاده
ومتابعتهم
الإنسان له طاقه والمرأه موب آله تطبخ وتغسل وتكوي وتكنس وتربي بزارينه وووو إلخ
وماتجيب خدامه علشان مايقولون عنه الناس إنه فاشله وما تعرف تدير بيت ,,,
:: ::
الزبده من الكلام /
أنا أؤيد وجود الشغاله بالبيت ودي بعد نجيب شغاله ثانيه ,,
* وبعدين فيه شيء ودي أقوله ترى موب عيب إن يشتغل بالبيت ويساعد بدل ماهو بس ينتقد ويدعي الكمال
فالرسول اللهم صلي وسلم عليه وهو صفوة الخلق يساعد أهل بيته وأنتم موب أعز من الرسول ,,
أنا خلصت كلامي ,,
الكلام لكم أنتم ,,
- هل وجود الخادمه في المنزل يدل فشل المرأه ؟
- هل قيام الرجل بأعمال المنزل عيب وإنقاص لرجولنه ؟؟
- هل تشتغلين بالبيت وهل عندكم خادمه أم لا ؟؟ (للصبايا )
ووسلامتكم