[poem=font="mudir mt,6,white,bold,italic" bkcolor="black" bkimage="" border="none,4," type=2 line=0 align=center use=ex num="0,black""]
من وين جابك هواك و ويـن وداك=يااجمل هديـه بخـل فيهـا زمانـي
ازرع أمل و اتَخيّـل يـوم لقيـاك=و اجني ألم صدمة الواقـع و اعانـي
الى متى و الامانـي تنبـت اشـواك=و انـا اترجـاك يـاورد الامـانـي
طوّلت و انـا انتظـر طلّـة محيـاك=إرجع . من البُعـد جانـي ماكفانـي
لو شفتني كيف انا عايـش بليـاك=وشلون اعيش الدقايـق و الثوانـي
اغيب حتـى اتجـاوز حـدّ الادراك=و احلم بوصلك و ارد افيـق ثانـي
ياللي تميّزك عـن غيـرك مزايـاك=مابين خدٍ كريـم و طـرف انانـي
في مفرق الصدر سحـر عُمـان فتّـاك=و في شفّتك رقية السحـر العُمانـي
ياطول صبري و انا واقف ترجّـاك=و انته تطاوع غـرورك و تعصانـي
تعزف حروف الغياب المرّ و اقـراك=و الكون كلّه من اسبابـك قرانـي
تعال خذني من اسر الواقـع هنـاك=و ابي اخذك عن نظر قاصي و دانـي
بانفاك ياعالمـي و اكـون منفـاك=في مملكـه داخـل اسـوار المحانـي
و اسقيك نبع الغلا و ارويك و ارواك=و اكسب حنانك و اعيّشّك بحنانـي
اكتبك روح القصيـده و اتهجـّاك=ياوزن شعـري و قافـه و المعانـي
لامن تخيّلت وصفك قلـت حيّـاك=يالشعر خذني على الطرق و خذانـي
بس الزمن عن عيونـي ويـن وداك=يااجمل هديـه بخـل فيهـا زمانـي[/poem]