[IMG]http://althahebh.********************************************/shams-alnahar.gif[/IMG]
جيت لك احتاج قربك.. ضاقت بعيني الوسيعه
جيت لك كلي حزينه.. غادي شموخي انكسار
جيت لك دمعه وهمسه .. تنخي العمر وربيعه
تنخي اللي من أعدّه بدنيتي شمس النهار
جيت قلبك .. جيت عطفك .. جيت لاحساسك جميعه
وماقصدت اني اشوف لدمع عينك انهمار
ضعت كلي بدمعتينك .. الا حزنك ما استطيعه
جفت دموعي الهميله .. وصار حالي انبهار!!
من دموعك طاح قلبي .. والحزن لك مو طبيعه
وأدري ان دموعكم يوضع لها ألف اعتبار !
ابتسم يله عشاني .. بسمتك وين البديعه؟
والله حزنك هد قلبي وأطلق بوسطه عيار
يله ياقلبي عشاني .. طفلتك أنا المطيعه
ابتسم تكفى طلبتك .. لايجيني انهيار
ومن جرح قلبك وقلبي .. يابعد عمري نبيعه
عنك قلبي مايميل .. وغيري مالك اختيار
طفلتك في قلبها لك بانيه قصور ٍ منيعه
لك لوحدك يا أميري .. ساكن ٍ ليل ونهار
طفلتك لا ماتخونك .. والوفا لقلبي شريعه
ياحبيبي لايغرك حكيهم ذولا الصغار
ياربيع العمر والله وحدك انته في الطليعه
أنت لي دنياي كلها .. هذا انته باختصار
وبصراحه ياحبيبي .. دمعتك هاك السويعه
ولـّـدت فيني غرور وكبرياء وافتخار
تحياتي،،